Yuda 1

1 # Mat 13:55; Mrk 6:3 Kore ana palai naa keing'uaa Yuda, laisiaayiani le Yeso Kristo oara sii lalache le Yakobo.

Kairoroki lolo ooipoto, oaatachama ꞉Nkai Papa, neirritita ꞉Yeso Kristo.

2Metoponari taatua ntae lng'ur o seriani o nchaman.

Laiteng'enak le sapare

3Lacham lainien, kore abaki aata yieunoto oleng naigerokinyie ntae naipirita ana jeunoto niking'ar, kadol ajo keirikino naigeroki ntae, alej payie inyoknyok aanya larrabal le inia kurukoto nemeibelekenya aikata, naitarasakaki apa sinyat le Nkai. 4Amu keteleliakinete atua ntae ltung'ana ooigerokaki apa nkiguana ewoun eng'or. Kore ninche naa ltung'ana lemeyanyit Nkai, neibelekenya munyani e Nkai ang aaitaa nkoitiei naasie asat e aanyit, neany Yeso Kristo oara ninye apeny lkitok, naa ninye apeny Laitoriani lang.

5 # Nai 12:51, Nki 14:29,30 Kore abaki iyielolo ntae kuna pooki, naa kaitaparru ake ntae nchere keitejewua apa ꞉Laitoriani ltung'ana lenyena alaku ang'as to nkop e Misiri, kake neitoki aidakie tesiedi lolo leitu eiruk. 6Naa nejia sii eikuna ꞉Nkai lolo malaikani, laa kore duo eyiere neitiemu mpaach e nkitoo naatipikaki, neing'uaa ꞉ninche inie ng'oji nayiere payie ewuenie. Neen ꞉Nkai ninche taatua naimin, too lgiitani loo senke lemedung'o aikata, ana metabau kenya nkiguana e inia parri kitok. 7#Ng'as 19:1–24Kore sii apa Sodom o Gomora o lkerenketi oonyikita, naa nejia etaasa ninche tana laaduo malaikani. Ketaasa ninche loloito, neitoki aairukurukore ng'uarrat aas ntabo to mboita e sesen. Neaku apa ninche nkitanyanyukoto amu ketudung'okaki nkiguana e nkima ee ntarasi.

8Kore eyia, nejia eas lolo tung'ana. Kore te nkitoria ee nkidetidetat enche, neidach seseni lenche, neitoki aany nkitoria e Laitoriani, nedek loaata nkitoo e chumata. 9#Dan 10:13,21, 12:1; Mbo 12:7, Nkit 34:6, Sak 3:2Kake kore abaki Mikael ilo kitok laa lmalaikani, eorro sesen le Musa o Chitani, naa eitu emen ninye nedung'oki nkiguana, kake ketejo, <<Miking'odia ꞉Nkai!>> 10Kore kulo tung'ana, naa kedekita ntokitin nemeyielo, neitoki aaidakie ate tee nenia tokitin naamusoo aajo kera torrok. Naa kore sii abaki nenia naamusoo, naa kemusoo abaki ng'uesi nemeitoki eyielo.

11 # Ng'as 4:3–8, Nki 22:1–35, Nki 16:1–35 Oi siake ninche! Amu keima nkoitiei e Kain, netapalikita ate ntorno e Balam, aa inia torno taa e lubo nayieu payie elaki. Netanya ꞉ninche Kristo, neidakieki tana neikunaki Kora payie eany Musa. 12Kore kulo tung'ana naa soito oopi ooricho le atua nkare. Lolo laa kore too sukukuuni linchi nedaa tenebo o ntae meata nkanyit, aa ate aapeny eing'or. Kera nkidis nemecha naya siwuo, nera sii lkeek lemeata lng'anayio nkata e ndung'ore, ootuata katare netodotunyie taa ntana. 13Naa laing'ok le nkare ninche oaanang'u labur le asat enche e anyit, nera lakir oong'orori. Naa keitibirakaki apake ninche negut e naimin ee ntarasi.

14 # Ng'as 5:18,21–24 Kore apa Enok, ilo laa le ntowuo e sapa ta Adam, naa keibonua mbaa naaipirita tung'ana laijo kulo ejo, <<Ng'ura! kelotu kenya Laitoriani o nkalupuni o nkalupuni ee sinyat lenyena, 15paa kore pooki ng'ae nedung'oki nkiguana, nemeatae ltung'ani torno lemeiteyielo ꞉ninye ntorrok pooki naataasa meurie Nkai. Neiteyielo aitoki lolo aing'okok torrok nenia baa torrok nairoro aarie ninye.>> 16Kore kulo tung'ana naa kecham aaing'unyung'unya nemeitoki naitiemu, neirukurukore ng'uarrat enche torrok, neikarrie ate, neitemelok nkutukie payie etum inia nayieu.

Nking'odia o nkiteng'ena

17Kake kore ntae lacham lainien, entaparru mbaa naatejo apa lkipaareta la Laitoriani lang Yeso Kristo, ewuon eng'or. 18#2Pet 3:3Amu ketiakita ntae, <<Kore kenya ta nkata e nkiting'oto naa keatae ltung'ana ooikordodicho neirukurukore ng'uarrat enche torrok e anyit ta Nkai.>> 19Naa kulo tung'ana ooyau oro, nera lena kop, nemeata Ltau le Nkai.

20Kake kore ntae lacham lainien, entechetu ate te inia kurukoto inchi sinyati naisul pooki, iomonmon to utaroto e Ltau Sinyati. 21Entewueni taatua nchaman e Nkai, iyanyutata lng'ur la Laitoriani lang Yeso Kristo meitabaki ntae nkichon ee ntarasi. 22Naa entoduaa lng'er lolo oata lng'ach, 23nintejeuu lkulikae aawuapu taatua nkima, nintodoldol lkulie lng'er irritata ate, imbaii abaki nkila enche naiduruko taa mbaa torrok e sesen.

Nkisisa

24Kore ilo oidim atirripo ntae metaa mirrorrorro, nepik ntae tekue nkintoo enye miatata ntioto ing'idada, 25ilo laa ninye oara Nkai aang nabo, nera Laitejeunoni lang taatua Yeso Kristo, nenye nkisisa o nkitoria o ngolon o nkitoo, apake eitu eitibiri nkop o taata o ntarasi! Aamin.

Currently Selected:

Yuda 1: saq

Highlight

Copy

Compare