Mbolunoto Mbaa naaituruku
Mbaa naaituruku
Kore ltung'ani oji nkarna Yustin otii apa nkata ee larin 100 lekue eidipaki aatiuu Yeso, neipidiu ninye ajo kore Yoana oara laigeroni le mbuku e Mbolunoto naa Lkipaaret le Yeso oji Yoana ong'ar kina o Yakobo. Kore ana buku naa ketii mbaa naatodua Yoana o mbolunot naatang'amayie ninye apa eena to lkuran oji Patimos. Keidimai payie eigeroki ana buku matejo lari le 65 eidipaki aatiuu Yeso inia kata apa ewuon era Domitian Kaisari le Rrom. Kore too kuna ng'amat naa keikerkei ltung'ana tanaa Lkipaaret oji Yoana laigeroni le ana buku, kake keatae rereii oonyunyuk te nkigerore too Lomon Supati ooigero Yoana o mpala e Yoana o mbuku e Mbolunoto. Kore ana buku naa keata mbaa kumo e mpukunoto e nkigerore ee nkutukie ee Semitik, naaku keidimai paa keigeroki tekue to nkutuk e Lburania tanaa Aramaik neitokini tesiedi aaiger to nkutuk ee Lgirriki.
Kore ta ng'amata naitoricho Kaisari oji Nero, neitami sina sapuk lairukok le Kristo, naleng terichet lari le 64 o le 68. Tana ng'amata apa etaraki Paulo o Petero metuata. Meatae apa sina otumo lairukok le Kristo to lolo Kaisarini oare ooijiputua Nero aa taa Pespasian o Tito. Kake neitokini apa aaitam lairukok le Kristo sina ta ng'amata e Domitian. Meng'amaa apa Kaisari ajo kore lairukok le Yeso neitaa Yeso Laitoriani lenche naa inia payie eany esai Kaisari. Kore ana buku, naa keigeroki te inia ng'amata e sina.
Keata ana buku orat are. Kore nekue aa taa motua ekue metabaki ne uni, netii mpala naaigerokaki nkanisani sapa e Asia Kini, kore nkae orati aa taa motua e ong'uan metabaki ne tikitam o oare, netii mbaa naatodua Yoana o mbolunot eidikidikunye naaipirita mbaa naapuonu easichereki nkitanyanyukot. Kore mbaa kumo naatodua Yoana neibung'a o ng'amata nabo ana ake netiu chiaake taa mbaa tenenyauni tee nkutukie ee Semitik. Kore laisomani le ana buku naa keyiere payie enyok aning'u neiko mbaa teneirukurukunye, kake kegol inia tanaa kore lkerreti ling'uaa nenyau chiaake mbaa eidikidiku aang'asu taa naatasate tekue.
Kore nenia baa naatoduaa Yoana neipirita ntorroni naibooyo Nkai o ngoro e Nkai o neiko Nkai teneiteme ntoki pooki naas ntorroni o mirata e Chitani o ngolon pooki e ntorroni. Neipirita sii nchukunoto naibala e Kristo o larin 1000 le ng'amata nalotu Kristo aitore nkop o nkiting'oto e nkop neijipu nkitibirata e nkop ng'ejuk o chumata ng'ejuk, inie nemeatae mparrunoto e ntorno o nyamalitin, o inie aitoki naa kore lkiye o sina, nkichirata o mion, naa ntokitin naaima. Indim aing'urai motua e tikitam o obo lkereri le oong'uan.
Currently Selected:
Mbolunoto Mbaa naaituruku: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy