Yakobo 1

1 # Mat 13:55; Mrk 6:3; Asat 15:13; Lga 1:19 Kore ana palai naa nanu Yakobo, oara laisiaayiani le Nkai o la Laitoriani Yeso Kristo eing'uaa.

Kairoroki lolo mareita tomon o oare#1:1 Kore mareita tomon o oare tene neipirita ltung'ana pooki loo Lyiaudi ooiruko Yeso. oaatasachayieki aasachaki atua loreren.

Saanat o ng'iriata o nkurukoto

2Lalachera o nkanachera ainien, enting'idata katukul, tinitumtum saanat naapaapaacha, 3amu iyielolo aajo kore tenesaani ntae tankaraki nkurukoto inchi, nitumtum ng'iriata. 4Naaku naa, enchoo ng'iriata inchi ebulu katukul, payie iakuku ltung'ana ootubulutua aaiputakino taa mbaa pooki, meatae hoo ntoki nang'oriki ntae.

5Kore teneatae taatua ntae lotong'orika ng'eno, enchoo eomonu ta Nkai naa ninye naicho pooki ng'ae eyieu nemebuaaki aing'ode, naa keichori ninye. 6Kake teneomonu, enchoo eomonu to nkurukoto meata hooyia lng'ach, amu kore loata lng'ach naa inji etuwuana ana laing'ok le mpaso ookutaa lkutati aya neyieu. 7Kore ltung'ani laijo ilo, naa meyiere abaki nerachaki nkue ajo keitoki etum ta Laitoriani, 8amu kore ltung'ani oanya namu are taa mparrunot, naa meata nkitachoto too nkoitieii enyena pooki.

Ndorropicho o parakuoicho

9Kore ltung'ani omena oiruko Kristo, keyiere payie eng'ida tankaraki /nailiepunyie ninye ꞉Nkai aitaa le Kristo. 10#Isa 40:6,7Kake kore lolo oaara parakuo, oi eng'ida tankaraki naitodowua ninche ꞉Nkai aitaa le Kristo, amu kerrarra ake parakuoichio ana neikunari ntapuka e soro. 11Amu keiliepu ndama eirewua, nepejoo nkujit o ntapuka e soro, netoi ntapuka nerrarrarri, neichunye supaticho enche. Nejia sii eikunari ltung'ani parakuoni eloito ake ninye kue tee siaatin lenyena.

Sinaitin o ntemat

12Kemayiana ilo tung'ani ong'iri taatua sinaitin ooitami, amu kore payie eidip aimai sina, netum nkopiyia e nkisulata aa taa nkichon ee ntarasi, naitayia Nkai lekutuk ajo keicho lolo oaacham ninye.

13Kore naa tenetemi ltung'ani, mincho ake ejo, <<Nkai naatemita.>> Amu metemi Nkai to ntorroni, nemetem sii ꞉Nkai ltung'ani. 14Kake ng'uarrat enyena torrok naatem ltung'ani, neyiataki ntorroni. 15Kore naa ana naiturukumu ntoki neicho, keiturukumu sii ng'uarrat torrok neiu ng'oki, kore payie eitore ng'oki ltung'ani, neiu lkiye.

16Lalachera o nkanachera ainien, emincho eitopong'ori ntae! 17Kore nkichooroto pooki supat nemeata ng'orikinoto naa chumata eing'uaa, etodowua eing'uaa Papa oitibira ndama o lapa o lakir pooki le chumata, ilo lemeikonyi hoo aibelekenya anaa eikonyi aiwuatuwuata. 18Kore apa te yieuna enye, neicho iyioo metiini nkata e are aimu rerei lenye odede, payie kiaku ltung'ana lenyena oogeluno taatua ntokitin pooki naitibira ninye.

Tining'o nias nejo rerei le Nkai

19Enteyielo naa, lalachera o nkanachera ainien nacham, nchere meata lobo linchi lemesioki aning nemeipirriki airo nemesioki sii agoro, 20amu kore ngoro e ltung'ani naa meret ltung'ani oitaa ꞉Nkai loosipat. 21Naaku naa, enturrai mbaa pooki naaidurukie ntae o ntorno nataa kitok oleng, ning'amaa to mborron ilo rerei otipika Nkai atua ltauja linchi, oidim aitejeu nkichui inchi.

22Naa entaa loaas ana nejo rerei le Nkai, namara ake looning apeny rerei, amu isapsap ate tiniasias inia. 23Amu kore ake loning ilo rerei nemeas ana nejo, naa inchi etuwuana ltung'ani ochil nkomon enye te kitaap, 24kore payie eidip atichila, nelo te inie nerikino ake inia kata netiu duo nkomom enye. 25Kake kore ilo tung'ani ochekino aing'or aitibiraki inia kitanapata e Nkai e nchaman nalaku ltung'ana, nelo kue eas ana nejo nemerikino naatining'o, naa kemayian ꞉Nkai te inia naasita.

26Kore tenejo ltung'ani kera ltung'ani oyielo Nkai, kake nemeirrita lng'ejep lenye, koon ake esapita naa kore inia najo keyielo Nkai naaku ake pecheu. 27Kore yielounoto e Nkai naiken ꞉Nkai Papa lang ajo kedede, naa inia nairrita nkera okichono o nkoilia tee sinaitin lenche, neirrita koon payie mejing atua ntorroni nati nkop.

Currently Selected:

Yakobo 1: saq

Highlight

Copy

Compare