Lburania 2

Emintololoki njeunoto e Nkai

1Kore tankaraki inia, keyiere nikimbung aaitirrichaki inia nikitining'o payie meiwuang'ieki ake neitopong'ori iyioo. 2Amaa tanaa kore nkitanapat naaichorua ꞉Nkai aimu lmalaikani neasicho, naa kore lotigila nenia kitanapat o ilo leitu ening Nkai neitemei ana nairirikino, 3kaji kipokie iyioo tinikintololoki ana jeunoto nawuenyi natilimua apa Laitoriani, neitisipaki aitoki iyioo ꞉lolo ootining'o apa Laitoriani tee nkiyiaa enche? 4Neitisipua sii Nkai ajo kedede inia limunoto enche tee asat naaitodolu nkitoo enye o mbaa e nking'asia o asat napaapaacha e ngolon enye o tee nkichoorot e Ltau Sinyati naaichorua ana nayieu ninye.

Ketaa Yeso ltung'ani payie eitejeu iyioo

5Mara apa lmalaikani eichoo ꞉Nkai meitoria nkop nalotu, naa ninye taa kiimakita, 6#SNk 8:4–6kake keigeroki too Lkigerot Sinyat ta nkae ng'oji aajo,

<<Ng'ae ltung'ani metaa intaa toki,

tanaa nkerai e ltung'ani eji metaa ing'or?

7Intodoyie ninye taa lmalaikani te nkiti kata,

ninchopoki nkopiyia e nkitoo o ne nkanyit,

8nitipika ntoki pooki taabori nkitoria enye.>>

Kore payie eji etipika ntoki pooki taabori ninye, naaku meatae ntoki natung'ayie eitu epik taabori nkitoria enye. Naa kore eyia, ewuon mikidolita etii ntokitin pooki taabori ltung'ani.

9Kake ikidolita Yeso, oitodowuaki te nkiti kata aaitaa kini taa lmalaikani, etipikaki nkopiyia e sinyaticho o ne nkanyit amu ketumo mion ana metua, paa kore te munyani e Nkai neye anang ltung'ana pooki.

10Amu Keiririkino ta Nkai inia naa tankaraki ninye payie etii ntokitin pooki naa te ninye etaa ntokitin pooki, payie eicho Yeso, ilo laa ninye oatang'asua njeunoto enche, meitabai inia nayieu ninye te mion naimayie, nerikoo nkera enyena kumo metang'amu nkitoo enye. 11Kore Yeso o lolo ooitaa ꞉ninye sinyat, naa ilo Papa obo eing'uaa, tankaraki inia payie medol Yeso anyit teneipot ninche ajo lalachera o nkanachera enyena 12#SNk 22:22ejo,

<<Kaibalunyie kenya nkarna ino tekue lalachera o nkanachera ainien,

naisis nkarna ino tekue lturrur loo ltung'ana linono.>>

13 # Isa 8:17, Isa 8:18 Naa kore aitoki,

<<Kapik nkurukoto ai atua ninye.>>

Neitoki ajo,

<<Nele nanu o nkera naichoo ꞉Nkai.>>

14Naaku kore amu nkera ee ltung'ana nenia kera naata seseni oaata nkiri o lodo, nelotu sii Yeso eata sesen otuwuana lenche, paa kore te lkiye lenye neoru chitani ngolon, naata apa nkitoria nayeunyie lkiye. 15Nelaku lolo laa kore mperot pooki ee nkichoni enche netowuana era rrindiki le ng'ureticho e lkiye. 16#Isa 41:8,9Nedede taa ajo mara lmalaikani eyewuo aret kake ichoi e Abraam. 17Naaku tankaraki inia payie eitaaki too nkoitieii pooki ana lalachera o nkanachera enyena, payie etum ataa laitainoni la lasar oata lng'ur neisiligai te siaai le Nkai, netum Nkai atapaliki ltung'ana lenyena ng'ok. 18Kore amu keimayie Yeso sina o ntemat, keidim atereto iyioo tinikitum ntemat.

Currently Selected:

Lburania 2: saq

Highlight

Copy

Compare