Lburania 1

/Keirorie iyioo Nkai aimu Nkerai enye

1Kore apa naa keirorie ꞉Nkai lmakui lang nkatitin kumo o too nkoitieii kumo aimu loibonok lenyena, 2kake kore taata too kuna perot e siedi, naa /keirorie iyioo Nkai te Nkerai enye. Netegelua ꞉Nkai ninye metaa ntokitin pooki nenyena, naa te ninye sii apa eitibirua nkop. 3Kore Nkerai e Nkai naa ninye naitelioo nkitoo e Nkai, netiu to mpukunoto enye ana ake netiu Nkai, naa ninye oibung'uta ntokitin pooki to ngolon kitok e rerei lenye. Kore payie eidip aitibira nkoitiei naitukorieki ltung'ana ng'ok, newuon ta nkaina e tetene e ilo Ooisul pooki.

Keikitok Nkerai e Nkai alang Lmalaikani

4Kore tankaraki nataa ninye kitok oleng alang lmalaikani, neichori nkarna kitok nalang nenche. 5#SNk 2:7, 2Sam 7:14; 1Ng'a 17:13Amu alo too lmalaikani etiaka aikata Nkai,

<<Ira iyie nkerai ai,

nataa anapar Papa lino?>>

Nejo aitoki ta nkae ng'oji,

<<Kaaku nanu Papa lenye

neaku ninye nkerai ai.>>

6 # Nkit 32:43 Naa kore aitoki payie eirriu ꞉Nkai inoti lenye oata nkitoria nkop nejo,

<<Nchoo metasayia ꞉lmalaikani pooki le Nkai ninye.>>

7 # SNk 104:4 Kore taa naaipirita lmalaikani nejo,

<<Keitaa lmalaikani oara laisiaayiak lenyena siwuo,

neitaa nkima nailu.>>

8 # SNk 45:6,7 Kake nejo ta naipirita Nkerai enye,

<<Kore nkitoo ino iyie Nkai, naa kewuon ntarasi o ntarasi,

naa intoricho te kitoria ino te sipata.

9Itachama sipata nimba ntorrok.

Naaku naa Nkai, kore tankaraki inia ikitegelua iyie Nkai ino,

nikimput ng'ida aitalang lkulie pooki.>>

10 # SNk 102:25–27 Neinyiaka sii ajoki,

<<Laitoriani, iyie apake oitibira nkop ta ng'asunoto,

naa siaai laa nkaik inono keper.

11Keidaari ninche, kake ibik iyie ntarasi,

nemutari ninche pooki ana nanka musana.

12Ipiyae iyie ninche ana lkila,

ninturraa ana nanka natumute,

kake mimbelekenya iyie,

nemeiting aikata larin linono.>>

13 # SNk 110:1 Kake amaa keatae aikata lmalaika lenye otiaka ꞉Nkai, <<Towuana ta nkaina ai e tetene ana maichoo lmang'ati linono ndacha murto?>> 14Amaa, mara lmalaikani pooki nkiyeng'eta naaisiai Nkai oorewi metereto lolo ootum kenya njeunoto?

Currently Selected:

Lburania 1: saq

Highlight

Copy

Compare