2 Timoti 4
4
1Kaareki aitaarriyian iyie tekue Nkai o tekue Kristo Yeso, oiguanare looichu o lootuata, o tankaraki nalotu ninye aitoreicho ana Lkinkii, nchere 2tilikoi rerei le Nkai. Tonyuaa tilikoi ta nkata naichiaakino o ta nkata nemeichiaakino, tobuaaki ltung'ana, ntaarriyiana, nintogol. Taasa kuna baa, te ng'iriata kitok ninteng'enicho mbaa pooki. 3Amu kelotu kenya nkata nemeidimare ltung'ana nkiteng'ena nadede. Kore neas ninche, naa ng'uarrat enche erubare neiturrurroki ate laiteng'enak oojo mbaa naayieu nkiyiaa enche nening. 4Keiken nkiyiaa enche payie meitoki aaning ndedei, neinining nkatinin nemedede. 5Kake kore iyie Timoti, taa ltung'ani otem mbaa nkata pooki, ting'iria taatua sinaitin, taasa siaai oyiere neas ltung'ani olikoo Lomon Supati, nintabaya nkisiaayiare nikinchooki.
6Amu etabawua nkata naye, neisuari nkichui ai ana lasar. 7Atama larrabal supat, kakueta naidipa inia kuetata, naibung'a nkurukoto. 8Naa kaaiteng'elakaki nanu nkopiyia naichori loosipat, inia naaicho ꞉Laitoriani, oara ladung'oni le nkinguana, te inia parri. Namara nanu ake apeny eicho, kake keicho lolo pooki oaanyuta lotunoto enye te nchaman.
Nkae kitaarriyiana naichoo ꞉Paulo Timoti
9Timoti, tonyuaa tesieku wou ene natii. 10#Lkol 4:14; Pil 1:24, 2Lkor 8:23; Lga 2:3; Tito 1:4Amu kore Demas, naa kaatung'ayie alo lkerenket le Tesalonike, tankaraki nacham mbaa e nkop. Nechomo Keresekenes nkop ee Lgalatia, nelo Tito nee Dalmatia. 11#Lkol 4:14; Pil 1:24, Asat 12:12,25, 13:13, 15:37–39; Lkol 4:10; Pil 1:24Luka ake apeny otii ene tenebo o nanu. Tumo Marko, nilotu ene o ninye, amu laisiaayiani le tipat ninye te siaai lai le likoroto. 12#Asat 20:4; Epe 6:21,22; Lkol 4:7,8Kairruayie Tikiko mechomo lkerenket le Epeso. 13#Asat 20:6Naa kore tinilotu, tichilu nanka ai sapuk e oriong natung'aka apa Karpo te lkerenket le Tiroa niyau sii nenia bukuii, naleng nenia e nchoni.
14 #
1Tim 1:20,
SNk 62:12; Rrom 2:6 Kore Alekisanda, ilo kunoni, naa kaitaasa mbaa torrok oleng. Keitalak ninye ꞉Laitoriani nenia baa naitaasa nanu. 15Tirripo abaki iyie koon te ninye amu kenyokita aiboyoo likoroto ang.
16Kore apa amituta koon aaiguanareki nkata ekue, naa meata hoo laayewuo ajing nkoriong. Kaatung'aitie ltung'ana pooki, naa oi siake meipari ninche inia! 17Kake kaatereto Laitoriani naaicho ngolon payie atum aidipa likoroto ai ee Lomon Supati, netum loreren pooki aatining. Naaku, aaitayiaki to nkutuk e lowuoru. 18Kaalaku nanu ꞉Laitoriani taatua mbae pooki torno, naaya nkitoria enye e chumata te seriani. Metaa nenye nkisisa ntarasi o ntarasi. Aamin.
Nkirorokino e Paulo e siedi
19 #
Asat 18:2,
2Tim 1:16,17 Roroki Prisika#4:19 Kore Prisika naa ninye ake aitoki eji Prisila. o Akuila o nkaji e Onesiporo. 20#Asat 19:22; Rrom 16:23, Asat 20:4, 21:29Etowuana Erasito te lkerenket le Korinto, natung'ayie Toropimo emuai te lkerenket le Mileto. 21Tonyuaa tesieku wou ene, ewuon eitu ebau ng'amata e nkijepe. Ikiroroki ꞉Eubulo o Puden o Lino o Kilaudia, o lalachera o nkanachera pooki naairuko Kristo.
22Metaa Laitoriani tenebo o iyie, neaku munyani enye tenebo o ntae.
Currently Selected:
2 Timoti 4: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
