1 Timoti 4
4
Laiteng'enak le sapare
1Keibalunyie ꞉Ltau Sinyati aipidaki nchere kore taa ng'amat e siedi naa keing'uaa lbata nkurukoto, neirukurukore ltauja oaasapicho o nkiteng'ena ee lairiruani. 2Kore inia kiteng'ena naa keimu ltung'ana oaasapicho neitaakino, ootiminchiraki ltauja metaa merokure emusu nadede o nemedede. 3Nemitiki ltung'ana eyemicho, neitoki sii aamitiki enya mbata ee ndaki naaitayia Nkai payie eng'amaa ta nache ꞉lolo ooiruk neyielo ndedei. 4Amu kore ntoki pooki naitibira Nkai naa keisupat, nemeata ntoki naanyi teneng'amari ta nache, 5amu keitisinyi te rerei le Nkai o to nkomono.
Laisiaayiani supat le Kristo Yeso
6Kore tininteng'en lalachera o nkanachera kuna baa, niaku laisiaayiani supat le Kristo Yeso, neitodolu inia ajo itubulua taatua rerei le nkurukoto o le inia kiteng'ena supat nirukurukore. 7Tapaachere nenia atinin nemeitaa Nkai toki nemeata tipat, kake nteng'ena koon payie iaku ltung'ani ourie Nkai. 8Amu kore tenelo ltung'ani alak nkejek naa keata inia nkini tipat te sesen lenye, kake kore uriata e Nkai naa keata tipat taa mbaa pooki. Amu keata lekutuk le nkichon e taata o ne kenya, 9naa rerei ilo oirukoi, neichiaakino neng'amari pii. 10Kore tankaraki inia, ikiasita siaai to nyuata o te nkinyinyiret, amu Nkai naichu etii siligi lang, laa ninye Laitejeunoni loo ltung'ana pooki, neisul too ꞉lolo ooiruk ninye.
11Intaarriyianicho, ninteng'enicho kuna baa. 12Nimincho ltung'ani kimen iyie tankaraki nira lelerie, kake kore te rerei lino o to wuanata ino o te nchaman ino o to nkurukoto ino o te sinyaticho ino, taa nkitanyanyukoto naduaaya lairukok. 13Kore nias ana mayeu, tonyuaa somaki ltung'ana Lkigerot Sinyat, nintaarriyian, niteng'en. 14Mintololoki inia kichooroto nikitii atua, nikinchooki apa ta naibon payie kinteleki lturrur laa lpayiani le nkanisa nkaik. 15Tipika kuna baa atua ltau lino, nimbung payie edol ltung'ana pooki aajo iloito kue. 16Toduaa koon o nkiteng'ena ino, niwuon taatua nenia baa, amu kore tinias nejia, naa intejeu koon o lolo likining iyie.
Currently Selected:
1 Timoti 4: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
