1 Timoti 5
5
Nteng'ena ltung'ana pooki ta nkanyit
1Mikurrakino lpayian kitok te iyie, kake irorie ninye ana ninko papa lino. Ntaarriyiana ltung'ana leleru ana ninko lalachera linono, 2nirorie ntomonok arrarrin ana ninko ng'utunyi o ntomonok leleru ana ninko nkanachera inono, te sinyaticho pooki.
Nkitaarriyiana naipirita nkoilia
3Iyanyita nenia oilia nemeata ltung'ani oibung'uta. 4Kake teneata nkoiliai nkera anaa nkera ee nkera enyena, keyiere ang'as tekue neyielou ꞉nenia kera aajo keichiaakino neyanyita neret nkang enche, errinyoki nache lolo ooitubulutua ninche, amu ana naiting'id Nkai. 5Kore nkoiliai nemeata ltung'ani oibung'uta, natung'ayieki aa ninye apeny, naa ketipika siligi lenye Nkai elej neomon kuarie o parkiji meichoo reto. 6Kake kore inia nayieu newuon nkata pooki anya rraa e nkop naa ketua eichu. 7Ntarriyiana sii ninche nenia baa, payie meata kenya nakurrieki. 8Kake kore tanaa keatae lemeibung ltung'ana lenyena, nelus le nkang enye naa keiturrayie ninye nkurukoto, neaku keitorno alang leitu eiruk. 9Kore nkoilia naaichiaakino netum reto ta nkanisa, nchoo metaa nkoiliai naiputaka larin ntomoni ile inger, naa nayema apa lpayian obo. 10Netisipuaki aajo ketaasa mbaa supati: keitubulua nkera enyena aitibiraki, neitoomono lomon ta nkang enye, neituko nkejek ee sinyat le Nkai, netereto lolo oaata sina, netonyuaa aas ntoki pooki supat. 11Kake tanya iinger nkoilia leleru, amu kore payie eitore ng'uarrat e sesen neitoorere ate Kristo, neyieuu neigili aayem. 12Naa kore tankaraki inia, neyaki ate nkiguana torno amu ketigila lekutuk lekue lenche oitaitua payie eigeri. 13Kore aitoki, neitomok ninche ate wuanata e pecheu erukurukoo nkajijik. Tapala duo abaki inia wuanata enche e pecheu, kake keitoki aaku nkaimeteteelok, neyieu neyielou mbaa namara nkunenche, neiro mbaa nemeyiere payie eiro. 14Naaku kayieu payie eigili aayem nkoilia leleru, netum nkera, neramat nkang'ite enche, payie metum ꞉lmang'antita mpaach naitamie ninche anyit. 15Amu, keidipa nkulie aaibelekenyata, neirukurukore Chitani. 16Tenetii ntomononi nairuko Kristo neata nkoilia ta nkang enye, nchoo enap ninche payie meicho nkanisa nkirochi, netum ꞉nkanisa atereto nenia naaichiaakino reto.
Nkae kitaarriyiana naaipirita larikok le nkanisa
17Kore lolo payiani oorikorita nkanisa aaitibiraki naa keichiaakino neichori nkanyit neitokini aalak, nelus lolo oonyok aalikoo rerei le Nkai, neiteng'enicho. 18#Nkit 25:4, Mat 10:10; Luka 10:7Amu kejo Lkigerot, <<Miyen lmong'o nkutuk emanaa aidong nkano>> nejo ta nkae ng'oji <<Kore laasani le siaai naa keichiaakino payie elaki.>> 19#Nkit 17:6, 19:15Ming'amaa ajo kedede rerei opiki lpayian le nkanisa, mara itumo sipata too ltung'ana oare tanaa okuni. 20Kore ilo ochekino aas ng'ok, ng'odia tekue ltung'ana pooki payie euriei lolo kulie.
21Kaaitanap iyie katukul tekue Nkai o Kristo Yeso o lmalaikani oogeluno, payie iimbung kuna kitanapat, nimidung mbae nimisip, nimiata ngela.
22Mimpirriki aiteleki ltung'ani nkaik apik rikore, nimichulare sii lkulie too ng'ok enche. Rrita koon payie iwuon taatua sinyaticho.
23Mintoki amat nkare narok apeny, kake tamata sii nkini aichuo e lmusabibu tankaraki nkocheke o nchalan nikirrachu chiaake.
24Keatae ltung'ana ooibala ng'ok enche, neiturukuto ng'ok enche meiguanareki, kake kore noo lkulikae naa keibalunyieki tesiedi. 25Keibala sii chiaake asat supati, naa tenemeibala keibalunye ake.
Currently Selected:
1 Timoti 5: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
