1 Petero 5

Nkitaarriyiana taa lpayiani o lkulie tung'ana pooki le nkanisa

1Kore ara nanu lpayian le nkanisa, nara sii lobo oata sipata naipirita sina oatama apa Kristo, nara long'arieki nkitoo naibalunyieki kenya, kaitaarriyian naa taata lpayiani linchi le nkanisa ajo inji: 2#Yoa 21:15–17Errita mboo e Nkai natung'aka ninye ntae entaa laing'urak. Naa kore iasitata inia, eng'ura ninche, mara ana nayieunyieki ntae te ele siaai kake tankaraki nichamaa ilo siaai ana nayieu Nkai, namara sii payie itumiemie ntoki kake tankaraki nichamcham aaisiaayia ninche. 3Nimimbookiki lolo ootipikaki nkaik inchi nkop, kake entaa nkitanyanyukoto supat naduaaya ninche. 4Naa kore kenya tenelotu Lchekut Kitok, nitumutum nkiraoni e nkitoo nemomuta aikata.

5 # Rach 3:34 Kore naa ntae oaara leleru, entodoi ate too lpayiani le nkanisa. Nemeata linchi, pee era lpayian anaa ltung'ani lelerie, lemerretena payie etum aisiaayia likae to mborron, amu,

<<Keibooyo ꞉Nkai looiliepie ate,

kake neicho munyani enye looitodou ate.>>

6 # Mat 23:12; Luka 14:11, 18:14 Entodoi naa ate taabori nkaina nagol e Nkai, payie etum ninye ailiepunyie ntae ta nkata enye. 7Emiing'ach, entung'aki Nkai mbaa pooki naaitanyamal ntae metanapa, amu keing'or ninye ntae.

8Entaa ltung'ana oaaparricho aitibiraki, nirritata ate amu kore lmang'antita linchi Chitani naa kemanaa ana lng'atuny oipurruto, eyiaya ltung'ani oijioo. 9Emboi ninye, mingusgus taatua nkurukoto ang. Iyielolo naa aajo ketipikaki lalachera o nkanachera inchi to nkop pooki, mbaa e sina naatuwuana kuna.

10Tinindipdip aaimai sina te nkini kata, kore Nkai napeny munyani pooki, inia naipoto apa ntae te Kristo payie ing'arng'ar nkitoo enye nemeiting aikata, naa kerrinyoki ntae atua mbaa supati, neitogol ntae, neitacheyie payie mingusgus. 11Metaa ngolon nenye ntarasi o ntarasi. Aamin.

Nkirorokino e siedi

12 # Asat 15:22,40 Kaigeroka ntae ana palai dorrop aretito Silas, lalache laiken ajo kera lalache oisiligai. Kaigero aitaarriyian ntae nalimu sipata ajo munyani nadede e Nkai ana. Entacho naa teinia munyani! 13#Asat 12:12,25, 13:13, 15:37–39; Lkol 4:10; Pil 1:24Kore sii nkanisa natii Babilon#5:13 Kore Babilon tene naa nkarna e onyet e lkerenket le Rrom otii apa ꞉inia anisa., nategeluaki ana ntae, naa keiroroki ntae. Neiroroki sii ntae Marko oara nkerai ai. 14Erorokinoto to ngusoto e nchaman#5:14 Kore ngusoto naa nkoitiei apa nairorokinereki te inia kata.. Metaa seriani tenebo o ntae pooki otii atua Kristo.

Currently Selected:

1 Petero 5: saq

Highlight

Copy

Compare