1 Yoana 1

Rerei le nkichui

1 # Yoa 1:1 Kore ilo otii apake ta ng'asunoto, nikitining'o, nikitoduaa too nkonyek ang, nikimbung'a taa nkaik ang, naa ninye ilo rerei le nkichui likilikoo. 2#Yoa 1:14Kore inia kichui naa /keibalunyieki, nikitoduaa, nikilimu, nikilikoo sii aajo nchere ninye nkichui ee ntarasi natii apa tenebo o Papa, neinyiaka sii aipung'oki iyioo. 3Ninye kitoduaa, nikitining'o, naa ninye kiliki ntae payie itumtum nchula o iyioo. Naa kore nchula ang naa nchula e Nkai Papa lang o ne Nkerai enye Yeso Kristo. 4Ikingerito iyioo ana, payie eitabari ng'ida aang.

Nchula nikiata o Nkai o looiruko Yeso

5Naa ele taa lkilikuai likitining'o te ninye nikimbalie taa ntae aajo, kore Nkai naa wong'an, nemeatae naimin taatua ninye katukul. 6Kore tinikijo ikiata nchula o ninye nikipuoito taatua naimin, naa ikisapicho nimikiasichere ndedei te nkichon ang. 7Kake kore tinikitii atua wong'an ana payie etii ninye atua wong'an, naa ikiata nchula maate. Naa kore lodo le Nkerai enye Yeso, neitukoo ng'ok ang pooki. 8Kore tinikijo mikiata ng'ok, naa ate kisapita nemeti ndedei atua iyioo. 9Kore tinikimbalie ng'ok ang, naaku kepaliki ninye iyioo, neitoki aitukoo iyioo ntorroni pooki, amu keisiligai ninye nera lopeny sipat. 10Kore tinikijo eitu kias ng'ok, nikintaa ninye losapicho, naaku meti rerei lenye atua iyioo.

Currently Selected:

1 Yoana 1: saq

Highlight

Copy

Compare