1 Yoana Mbaa naaituruku
Mbaa naaituruku
Kore laigeroni le ana palai naa Lkipaaret le Yeso oji Yoana, oiu ꞉Salome. Kore apa Salome, naa keng'arrochuaa o Maria, ng'otonye Yeso. Kedoli kuna baa taatua mbuku e Matayo, to motua e tikitam o sapa, lkereri le onom o ile, o taatua ne Marko, to motua e tomon o ile, lkereri lekue, o taatua ne Yoana, to motua e tomon o saal, lkereri le tikitam o imiet. Kore apa Yoana naa keng'arrochuaa o Yakobo, nera apa ninche o Petero looiteng'eni le Yeso oonyikita ninye oleng. Kore metii kuna pala enyena uni, ninye aitoki oigero mbuku naji Lomon Supati le Yoana o Mbolunoto. Naa kore abaki melimu kuna pala aajo ng'ae oigero, keatae mpukunot kumo ee rereii oonyinyuk too Lomon Supati ooigero Yoana, metaa meatae lng'ach ajo mara lobo ake laigeroni loo pooki. Kelimu sii lpayiani le nkanisa apa ekue sipata aajo, kore laigeroni loo kuna pala naa Yoana. /Keigeroki kuna pala pukura uni matejo nkata nabo ake too mperot e siedi eng'or lkiye le Yoana, terichet lari le ntomoni isiet o imiet o ntomoni saal o imiet, eidipaki aatiiu Yeso. Keidimai paa keigero Yoana Lomon Supati lenyena tenebo o kuna pala te Epeso, natii Asia kini, inie netii nkop e Taki taata. Ketibiko ninye te inie taa larin lenyena le siedi era larikoni le nkanisa oyanyiti oleng.
Kore tana palai naigero Yoana naa keyieu payie eitaarriyian lolo ooigeroka payie eata sotua tenebo o Nkai o ninche maate. Neitoki sii ajoki lolo oigeroka metoduaa ate te nkiteng'ena e sapare, naji doketisim, naany ajo, kore Yeso Nkerai e Nkai, naa eitu eini era ltung'ani neitu sii eye era ltung'ani. Kejo apa ninche nchere kore Mesia naa nchi apake etuwuana ana ltung'ani kake nkiyeng'et ake pii, naa ketung'ayie sesen lenye ewuon eitu eri metua to lmusalaba. Kelioo sii ajo kejoito Yoana payie eirritae ate tankaraki nkiteng'ena e sapare naji gunositisisim nang'asuta. Kore inia, naa nkiteng'ena e sapare najo kore ake pooki nayiere te nkichon e ꞉ilo oiruko Yeso naa payie eata yielounoto nadede e nkiyeng'et, naaku kore inia kata menya ajo nyo ias te sesen lino. Kore tee ninche mara toki tanaaku ias mbaa nemeichiaakino nijo ake aitoki kairuko Yeso. Neibalunyie Yoana katukul ajo kore inia yielounoto naiteng'enicho lolo aiteng'enak le sapare naa sapare kitok oleng. Kore yielounoto nadede naa Ltau Sinyati eing'uaa. Neitai sipata ajo kore Yeso, Nkerai e Nkai ee ntarasi, naa ltung'ani apa pii, neitarrapicho sii tipaticho e nchaman o mpalikino o nchula o mirata e ng'oki o sipsip e njeunoto o sinyaticho o nkichon ee ntarasi.
Currently Selected:
1 Yoana Mbaa naaituruku: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy