Rooma 9

Gimtee Mellayi maa ga aparre

1-2Mileŋ na kappenta ma Masi, na beneyyatoŋ seene ka, na borolla ɗa kadar na aaweero zorontiyo suura o raɗɗo ma gakamma ɗa galbantu. Beneytu keeke pa, gi mooyitu ma passalla ka samaane o ka miɗɗa gaariyaw ma Ruuhanti Mellayi kadar ga ay seene. 3Ampane kee, gii dewɗo na aŋakke ga Mella boolinno o na deeɗo jagenta min oko Masi ku maa gu seneetaw ku baltu koo Yawudigee deeɗo najjiyenta. 4Guta pa ay giimi ku Isirayel, maa ga Mella leyyiy gu deeɗe rontee. Ay oko guta maa ga gaariyooca darjanti, o maa ga onniɗe liŋgaŋgee o maa ga biryoogu hukumnigeetee. Ay oko guta kulla ga gaariyoo baŋ gu aabaddaa goo me, o ga beneyyiyoo ma kee ka biraawi barkaŋgeyyo. 5Guta pa ay ronco kookuwee ku tippa ku ibinenta, o ga Masi, gata maa ga Mella aparre, gu weyya min oko guta aleŋ ta giimo ma ziiti, gata ma ay Mella ma aaye kayaaco lawwi paracco. Ga dee logenta diiman diiman! Amin.

6Aɗoŋ lee ɗa kuu ga beneyti Mellayi leyya ɗa kanti, asan gu giimi ma okomma min balti kaakatine kee Yakub maa goo Isirayel ay paracco ɗa gu ay giimi ku Isirayel ma ay gimtee Mellayi maa ga aparre. 7A giimi ku balti Biraayim pa kulla, ay paracco ɗa gu ay rontee, asan ga Mella beneyyiyee oko Biraayim gaa: «Ay ma Isaaka appe gu ronco roncam asiɗo jibba#9.7 Elloŋ Diilo ta Lawwi Paracco 21.12..» 8Beneyyi keeke pa gareene kadar gu rontee Biraayim ku aatti paracco ɗa maa ga Mella bakammikiko aleŋ rontee. Maa ga bakammikiko ay miici ma deero rontee saananti beneytí barkane maa ga beneyyikiti min omma. Ay kotti maa ga bakammikiko aleŋ giimi ku balti Biraayim, 9asan ga beneyti Mellayi maa ga beneyye gaa ga leeweega oko Biraayim ay keeke: «Sokotta oko wikinne keeke na akka yooka, naa asicca gassa Sarra daaccum gii weewiyam miica#9.9 Elloŋ Diilo ta Lawwi Paracco 18.10..»

10Gata pa ay keeke ɗa ka. Lekka kulla ma deeti oko Rebekka. Gita pa ma mittí ka kayti ka, gata ma ay kaakatine kee Isaaka, gi weyyee maajibi. 11-12A innasoopa gu miici kooko, omma gu weeɗiy o gu leeɗo ka samaane e baŋ pa ka miɗɗa, ga Mella aparre paaɗe kaƴi. Gata leewiya paaɗe kanti min omma, gaa apirɗiy giimi. Apirti pa gita aaye pe oko kollo maa ga kolowɗiy giimi, kolay ɗa oko lubbico maa gu leewa. A maa ga kanti maa ga wereɗɗe paaɗe pa min omma nuntiɗo, ga beneyyiti oko Rebekka gaa: «Ka tatta akkee lubba oko ka rootta#9.11-12 Elloŋ Diilo ta Lawwi Paracco 25.23..» 13Keeke pa wagee ma kee ka Kitamniti Mellayi maa gee: «Na ƴekkiya Yakub, Ezawu pa na poociya#9.13 Elloŋ Malasi 1.2-3..»

14Oko keeke ke beneyya pe kee me? Ke leewa aɗɗe kee ga Mella ɗayaŋ ɗa? Kaw, keeke ay tirta ɗa! 15A gata pa, Mella beneyyiyee oko Muusa gaa: «Na kawayyee oko gimu maa na aŋka na kawiyiyyee o na ella saamuwti oko gimu maa na aŋka na elliɗo saamuwti#9.15 Elloŋ Oomiti min Masir 33.19..» 16Keeke deewa ɗa ma aŋkiti gimi e baŋ pa ma gaartee maa ga dekerre ga lewɗo, innasoo ga ay ma Mella kayti ka, gata ma kawayyee oko gimi. 17Aattí Kitamniti ga Mella beneyyiyee oko sultan ka tatta ka Masir kee Parawon gaa: «Naata leyyum gimu tatta ku maa na gaariyyamca gudirantu oko kii o oko giimi paracco, o maa gu semeetaw deeɗo ibinenta dunuune parattí#9.17 Elloŋ Oomiti min Masir 9.16..» 18Ay goŋŋakite pe ga Mella kawayɗee oko maa ga aŋka o ga lewɗeeca kayaati talta oko maa ga aŋka gi deeɗo talta.

19Ma beneyyi keeke pa ku enaano kuu: Gaa Mella leewa goŋŋakite pa, ga ayme payya ga loomoyɗiy giimi? Ay ŋa pe ga gimu ma gederra ga pocowɗiya latta maa ga Mella aŋka? 20Kii appe ɓa ay we pe, gimta, maa ki melewɗiya kee ka Mellayi? Kitamniti Mellayi beneyye gee: «Diiba ta geewenta soo gederra aɗɗe gi leeɗe oko gimu ma geewica gee: “Ayme ki leeɗinoo goŋŋakite#9.20 Elloŋ Esaya 29.16, 45.9.?”» 21Gekeewa gederra ga leeɗo latta maa ga aŋka ma diiba. Min diiba gita ka, ga gederra ga geewiɗo maatiki kaƴi ma samaane maa gu cemekka laalaŋgeyyo ka, o maatiki kaƴi pa maa gu cemekka kulla meene gu loboɗɗiki. 22Ka Mellayi pa kulla maa ga leelo ay gata ka ma ay gaaro teete. Gata pa aŋke ga gaariyya bogorti o gu giimi ibinicca gudiranti. Ay ɗakko appe ga hamalɗiy ma sabur yaata guta ma issiyee boŋso o gu sare katta ga misilɗiy. 23Wikinne maani ga hamalliy asan ga aŋke kulla ga gaariyyooga ayaawuwtí darjanti oko giimi daare, guta maa ga kawiyyoo, guta maa ga hassalle min omma gu deeɗo nunta ma gata darjanti. 24Giimi kotti pa, ay keeta maa ga kolle. Kollo taata pa ay min aacco Yawudigeyyo ɗa ka, innasoo ga kolle kulla min aacco giimi ma ay Yawudigee ɗa. 25Keeke pa ay gata maa ga Mella beneyye aattí Kitamniti ma nabiinice Ozee maa gaa:

«Giimi ma ay gimtaw ɗa,

na akkiy kolla naa gimtaw,

o guta ma ay koo ku ƴekkenta ɗa,

na akkiy kolla naa kuu ƴekkenta#9.25 Elloŋ Ozee 2.25.»,

26o ga Ozee beneyye payya gaa: «Oko were kaaka saa kulla maa ga Mella beneyɗiyo gaa: “Kuŋ ay gimtaw ɗa”, ga ay iŋaakite saa kulla maa gu giimi asiɗiy kolaa goo rontee Mellayi, gata ma ay Miltí hayaatanti#9.26 Elloŋ Ozee 2.1..»

27A innasoo ma gaarco giimi ku Isirayel ga nabiinice Esaya beneyye raɗɗa ma ur̰uuti gaa: «Caŋ gu giimi ku Isirayel dee maani aleŋ ƴiiro tee ta biití baharriti, ga paalta ka min aacco ma akka gassa najjiyo, 28asan maa ga Mella Miltine beneyye gaa ga leewa kiɗaati, ga koɗok ga akkiya tattipa paratti#9.28 Elloŋ Esaya 10.22-23..» 29Keeke pa ay gata payya aleŋ maa ga nabiinice Esaya beneyyeero min omma gaa: «Gaa Mella Miltí gudiranti alɗine mira ɗa giimi ku baltine, ke deewa aleŋ giimi koo ku geegar ka Sodom o ma ka Gomor#9.29 Elloŋ Esaya 1.9. Giimi ku geegar ka Sodom ma ka Gomor pa, ga Mella bitty ta mak mak oko gaarco ku miɗɗa ta kaw maa gu leewa. Elloŋ kulla Diilo ta Lawwi Paracco 19.23-28..»

30Oko keeke pa haŋka, ke beneyya pe kee me? Maa na aŋka beneyti ay keeke: Giimi ma ay Yawudigee ɗa ma deyekke ɗa gu deeɗo ɗayaŋ unti Mellayi, deero gaarenta ɗayaŋ unti ma amanno. 31A innasoo gu giimi koo ku Isirayel ma deyekke gu gaariɗo ɗayaŋ unti Mellayi ma jobbico hukumnigeetee sariyee ɗa oko kanco hukumnigeyyo. 32Ayme gu alɗiyo sara ɗa? Ay asan gu deyekke ɗa gu deeɗo ɗayaŋ unti Mellayi ma amanno. Oko kanco ka gu moyee goo e ga ma lubbico maa gu leewa gu dewɗo gaarenta ɗayaŋ unti Mellayi. Keeke pa ay gata ma n̰aamiy condoldol aleŋ gimu ma baɗɗe ma dambu. 33A gata pa, ay aleŋ maa ga Mella beneyye Kitamniti gaa: «Elloŋga samaane! Na dowwa geegar ka Siyon dambu ma baɗakkay giimi, o ga bagakkay. A innasoo ga gimu ma duwca galbanti oko gata on̰aa ɗa ta kaw jaaliti#9.33 Elloŋ Esaya 8.14-15, 28.16..»

Currently Selected:

Rooma 9: mmy

Highlight

Copy