Rooma 8

Hayaatane ma asaa min oko Ruuhanti Mellayi

1Ma beneytu keeke appe paratti na garaatoŋ kadar ga haŋka gu giimi ma kappenta ma Iisa Masi, gi parlanti Mellayi bagay ɗa payya ta kaw. 2A gata pa, gimu ma kappenta ma Iisa Masi, gi Ruuhanti Mellayi ma beraa hayaatane hekemeyyaa. Hikimiyo taata pa, cimminee, kee gassiɗiy kayyeetine min oko hikimiyo ta zunubgeyyo o ta muuti. 3Keeke pa, ay gata maa gu hukumnigeetee Muusa gederre ɗa liyawti, asan ga gimu ma jobokka kanti ka lekka ɗa gudirane ku maa ga jobbiyya kanco hukumnigeyyo. A Mella soopa tattipiya maa gu hukumnigeetee Muusa gederriyee ɗa. Gata pa n̰aamiya Runti, ma zii aleŋ ka giimo kee aɗe ma leewa zunubgee maa ga deeɗo saɗikane ta saamiyco zunubgeyyo. Ma keeke pa, gi parlanti Mellayi baagiy zunubgee ma aaye zeneeco giimi ma leewa kanco ka. 4Mella pa leyya keeke, ku maa ke tattipiyya ka ɗayaŋ maa gu hukumnigeetee enewɗinee. Haŋka pa, ke jobokka pe kee ka Ruuhanti Mellayi, ke jobokka ɗa payya kantine ka.

5A guta pa giimi ma jobokka kanco ka, gi mooyico parattí ay oko ma daanayo ka. A giimi soo ma jobokka kee ka Ruuhanti Mellayi, gi mooyico ay oko ma daanati oko Ruuhanti Mellayi. 6A gita pa mooyo ta gaarco ma daanayo ka, katawkiko muuti, a innasoo gi mooyo ta gaari ma daanati oko Ruuhanti Mellayi katawko hayaatanti o aapiyati. 7A guta pa giimi ma moyaa oko ma daanayo ka, guta kotti ɗakattiya Mella o gu jobokkaa ɗa kee ka hukumnigeetee. Guta gederra ɗa ta kaw jobbico. 8Giimi ma jobokka kanco ka, guta kotti gederra ɗa gu deeɗe daanee oko Mellayi.

9A kunta soopa jobokka ɗa kantoŋ ka, ku jobokka maa gi Ruuhanti Mellayi aŋka, asan gi nowotte galbigeetoŋ. A gata pa, gimu ma lekkica ɗa Ruuhanti Masi, ay gimti ɗa oko Masi. 10Gaa Masi aaye galbigeetoŋ, caŋ gu zeneetoŋ matakka saananco zunubgeyyo, gi Ruuhanti Mellayi pa ay hayaatantoŋ, mileŋ ku deero gaarenta ɗayaŋ unti. 11Mella pa ay gata ma naɗiya Iisa min aacco giimi ku mattenta. Gii Ruuhanti nowotte galbigeetoŋ pa, ga gata kee ma naɗiya Iisa Masi min aacco giimi ku mattenta beraayooca hayaatane ma Ruuhanti oko zeneetoŋ maa ga kanco ay muutu ka pe.

12Ay ɗakko appe seneeta, ga lekkiɗo latta maa ga illa ke leewaa. Latta kaaka pa, ay ke nuntiɗo aleŋ maa gi Ruuhanti Mellayi aŋka, ay ke alɗo nunta ɗa aleŋ ta gimu ma jobokka kanti ka. 13Kuu nunteero aleŋ ta gimu ma jobokka kanti ka, ku matakka. A innasoo, gii ay ma Ruuhanti Mellayi ku deeway gaartoŋ ku miɗɗa ma daanayo oko zeneetoŋ, ku gasakkaca hayaatane. 14A guta pa giimi maa gi Ruuhanti Mellayi garaayooga botol ka jobbiti, ay guta ma ay rontee Mellayi. 15Kunta pa gasseero ɗa ruuhane ma leewatoŋ lawwee o gi yokaatoŋ payya ɓayaawi. Innasoo ku gasseero Ruuhanti Mellayi ma leewatoŋ rontee Mellayi o ga ma gita ke cayyakka kee: «Baaba, Tattini!» 16A gita pa Ruuhanti Mellayi, ay gita saa ma garawwiyooga oko ruuhaŋgeetine kadar ke ay rontee Mellayi. 17Mileŋ ke ay rontee pa ke lekkica kulla haggantine oko lawtee Mellayi. Gita pa ke gasakkaca sawa ma Masi. Mileŋ ke oyowwica diigane ma gata, ke gasakkaca kulla ma gata darjane.

Darjane ta omma

18A naata pa moyaa kadar ga ma seene gu diigaŋgeetine koo ku haŋka dunuune teete ay latta rootta ta kaw min oko darjane ta omma maa ga Mella akkine gaara. 19A gita pa kilgane parattí ocokkiya ta tirta teete wikinne maa ga Mella asicca gaara darjanco rontee, 20asan gi deero hikimiyenta ma gudirane ma gayawwiti ɗa maatiki. Keeke pa deero ɗa ma aŋko tantí, innasoo ga ay Mella ma aŋke gi deeɗe hikimiyenta. Gaa ma kaaka aɗe gi ocoɗɗe ma amanno 21kadar ga Mella akkica cimma min gudirane ma negekkaca o ma nowottaca aleŋ lawwa. Ma kaaka pa, gi gasakkaca kayaatí o darjane aleŋ ta rontee Mellayi.

22A keeta pa, ke lekka kabarre kadar ga ya haŋka gi kilgane parattí neƴekka aleŋ daate ma deegeyye ma buybuyne. 23Gata pa ay gita ɗa ka ma neƴekka. Innasoopa, ga keeta kulla neƴekka ɗakko galbigeetine kadar ke ocokka ta tirta teete wikinne maa ga Mella asinne gaara kadar ke ay rontee o ga asiɗiy cimma zeneetine min diigaŋgeyyo. Ampane kee pa, ke lekkica paaɗe Ruuhanti Mellayi, gita ma ay barkane ta omma min oko barkaŋgee maa ga aŋka ga birinne. 24A gata pa keeta gassica paaɗe najjiyo o ke ocokka missa kadar ga akkine najjiya ta kaw. A innasoopa, kee ellaa paaɗe maa ke ocokke kee, gi ucaw taata gaame paaɗe, asan gi ucaw lekka ɗa payya oko maa ke ella paaɗe. 25A innasoo kee ocokke ma amanno latta maa ke ella ɗa, ga kaaka pa ke ocokke ta tirta teete ma baatiynuwe.

26A Ruuhanti Mellayi pa kulla asaa gaayitine oko keeta ma lekka ɗa gudirane. A gata pa keeta, inno ke ibina ɗa samaane aleŋ maa ga Mella aŋka. Ruuhanti Mellayi soopa, ay gita saa ma eneeneega Mella ma neƴƴo maa gu galbigeetine gederra ɗa cimmiti. 27Mella pa, gata ma ellaa tak ma aaye ɗakko galbigeyyo, ibinya saa pe maa gi Ruuhanti aŋka, asan ga ay ma aŋkiti oko gata gi Ruuhane enewɗiyooga oko gimtee.

28Ke lekka kabarre kadar gu garrarri paracco ma asaayo oko giimi ma ƴekkaa Mella o ga kolowwiy aleŋ kanti maa ga aŋakke liyawti, ga leewayo ka samaane. 29Giimi kotti pa, ga ebenniy min omma o gu guta saa kulla maa ga leewiy min omma gu saabiyɗo saa tak Runti, ku maa ga deeɗiyo bikirrico oko seneeta ku maani. 30Guta maa ga min omma saa ga leewiy goŋŋakite, ga kolowwiy kulla oko gata. Guta maa ga kolowwiy pa, ga garawwiy ɗayaŋ unti. Guta maa ga garawwiy ɗayaŋ unti pa, ga issiy kulla darjanti.

Samantí ƴekkiti Mellayi

31Ay ini me payya ka ƴiila maa ke beneyya min oko keeke paratti? Mileŋ ga Mella appe aaye ma kantine, ga ay we payya ma gederreene? 32Gata icceegu ɗa ya paalta ka kulla diigaŋgee oko Runti, wikinne maa gaa birinneega soo saɗikane oko kee parattine. Gaa Runti ka kulla ga birneega, gu lawwi daare ga bereeneegu ɗa aɗe kulla malan̰ e? 33Ay we ma gederra ga luumiyɗiy giimi maa ga Mella aparre? Lekka ɗa, asan ga ay gata ka saa ma gaariy ɗayaŋ unti. 34Ay we payya ma baaginee ma parlane? Lekka ɗa ya gimu. Iisa Masi pa maateero oko keeta, ƴiila min oko keeke pa, ga naɗe min muuti. Gaa nowoɗɗe tiyaawati Mellayi ga enewɗineega.

35A gata pa, caŋ ke aaye diiganti e baŋ gu garrarri siiƴinee, caŋ gu giimi deegeyyane, e baŋ ga maatiki ka tiyaawi e baŋ ga ka issiti ke lekka ɗa, caŋ gu gaari ku miɗɗa ke ellay gu asaa e baŋ gi jollo, ga lekka ɗa ya latta kaƴi ma jagakkane min ƴekkiti Masi. 36Gaari kooko pa paracco ay seene aleŋ maa gi Kitamniti Mellayi beneyye gee:

«Kulla meenti buuni ni aaye ɗa arro ma muutu

asan ni ay gimcam.

Giimi leewikini aleŋ tamee ma ay koo ku diyaawi#8.36 Elloŋ Soom 44.23..»

37A innasoopa, ga min aacco diigaŋgee kooko paracco ni oomeero ma nosorro ma kakee. Keeke pa, ay ma Iisa Masi, gata ma ƴekkane. 38A gata pa naata leelo ta tirta teete kabarre kadar ga lekka ɗa ya kaƴi ma gederra ga jaginne min ƴekkiti Mellayi maa ga lekkine: bala ga muutu, o bala gi hayaatane, o bala gu malaykatnigee o bala gu taattuweeco ma aaye uwwa, o bala ga ka haŋka o bala ga ma akka asa, o bala gu guta ma lekka gudirane, 39o bala ga latta ma aaye uwwa e baŋ pa ma aaye aattí kiɗaati, o bala ga latta kaƴi maa ga Mella kelgeyye. Ƴekkiti pa gaarenta paaɗe ma Miltine kee Iisa Masi.

Currently Selected:

Rooma 8: mmy

Highlight

Copy