Rooma 15

Diyyu ki deeɗee daanee oko giicum

1A gata pa, keeta maa gi amannitine talta oko Iisa Masi, ga lubbitine ay ke gaayiɗiy seneetine maa gi amannico talta ɗa. Ay tirta ɗa ke lewɗo latta ma daaneene oko keeta ka. 2Ga kulla kaƴi aɗe diyyu ma liyaw ta samaane, ga deeɗee daanee oko giiti maa ga gaayiyya ga maaɗicca amanniti oko Iisa Masi. 3Masi pa, gata diyyeero ɗa latta ma daanee oko gata ka. A innasoo aleŋ maa gi Kitamniti Mellayi beneyye gee: «N̰ilaakico giimi ma n̰elekkam yookiyaw pe haŋka oko naata#15.3 Elloŋ Soom 69.10..» 4Latta paratti ma kitipiyenta min tippa aattí Kitamniti Mellayi pa, kitipiyenta ku maa ga garinne beneyyiŋgee. Guta pa esekkeene baatiynuwe o gu gayaane ke dekerɗo maa ke ucicca asawti Masi. 5Ga Mella, gata ma ay Milti baatiynuwwi o ga Miltí dekerriti, biraatoŋ gudirane maa ku nuntiɗo daana beenannitoŋ o gi mooyitoŋ deeɗo kaƴi ka aleŋ maa ga Iisa Masi aŋka. 6Kaaka pa, ga parattoŋ ma galbane kaƴi ka o aleŋ gimu kaƴi ka ku logokkoŋga Mella, gata ma ay Tatti Miltine kee Iisa Masi.

Iisa Masi ay oko giimi paracco

7Ga kulla kaƴi aɗe oyyiya giiti aleŋ tee ta Masi maa ga oyyittoŋ ku maa gu semeetee Mellayi deeɗe cipilenta. 8Naata pa beneyyatoŋga keeke: Masi deero lubaakaco Yawudigeyyo ku maa ga tattipiyya ka Mellayi maa ga beneyyiyoo oko kookuweeco gaa ga beraayooga. Ma goŋŋakite pa, ga garaa kadar ga Mella melaa ɗa maa ga beneyye. 9Masi pa, gata aseero kulla ku maa gu giimi ma ay Yawudigee ɗa logiyya Mella asan ga kawiyyoo. Keeke pa, ay aleŋ maa gi Kitamniti Mellayi beneyye gee: «Ay oko keeke pe na asiɗum loga min aacco giimi ma ay Yawudigee ɗa o na asiɗum ree oko cipilco semeecam#15.9 Elloŋ 2 Samiyel 22.50 o Soom 18.50..» 10Gii beneyɗe payya gee: «Giimi ku ballee paracco parhinoŋ ma gimtee Mellayi#15.10 Elloŋ Ɗillico Hukumnigeyyo 32.43..» 11Aatti were kaƴi payya gee: «Giimi koo ku ballee paracco, parattoŋ ku logoŋga Mella Miltine o gu giimi paracco ku dunuuniti nabbassiya#15.11 Elloŋ Soom 117.1..» 12Nabiinice Esaya pa kulla gaa: «Gimu kaƴi min oko burgutti Zesee akka asa. Ay gata maa ga Mella akka cipila, gaa hikimiyɗiy giimi koo ku ballee paracco, guu asiɗiy duwa galbigeeco oko gata#15.12 Elloŋ Esaya 11.10..» 13Mella beraatoŋga ku maa ku ocokke ma amanno. Kaaka pa, na enaa ga unitoŋ ta calay calay ma parhane parattí o ma aapiya aattí amanniti oko gata. Kaaka pa, ma gudirantí Ruuhanti Mellayi ku ibiniyya ƴiila kadar ga maa ku ocokka ku akkiya gassa.

Lubbiti Pol

14Seneetaw, haŋka pa ma kee ka gaartoŋ, na caɗawwica kadar ku unenta ma gidaanuwe o ku ibinya latta paratti ma awayyatoŋ o ku gederra ku garawɗiyo beneyyiŋgee oko gittoŋ. 15Innasoopa, ga oko wereeriyiŋgee daare koo ku maktuptu teete na kitipiytoŋgu saa waŋ waŋ bala ɓayaw. Gata pa, ay ku maa ku mooyiyya maa ku ibina paaɗe. Naa gederre na kitipiyɗe goŋŋakite pa, ay ma gidaanuwti Mellayi maa ga gaariyaw 16maa na deeɗo lubaakati Iisa Masi oko giimi ma ay Yawudigee ɗa. Lubbitu maa na leewa pa, ay maa na biriyya ziitu tee ta kaw taasití kabarre ta daana ma asaa min Mellayi. Gata pa ay maa gu giimi ma ay Yawudigee ɗa deeɗo aleŋ saɗikane ma deewee daanee oko Mellayi o gu deeɗo giimi maa gi Ruuhanti Mellayi dowwe oko gata ka.

17Ay ɗakko appe, mileŋ na kappenta ma Iisa Masi na alɗo parhanne oko lubbi maa na leewee oko Mellayi. 18A naata pa, aŋka ɗa ta kaw beneyyi kee ka latta kaƴi, illa ay kee ka latta maa ga Masi leelo ma naata. Gata pa ma naata ga askiko giimi ma ay Yawudigee ɗa gu jobbiyya ka Mellayi. Keeke pa deero ma beneyyiŋgeetaw o ma lubbitu, 19o ga deero ma gaaro tee ta garaawi ku ajjibiti ma garaaca gudiranti Mellayi o ma kakaa kaya o ma gudirane tee ta Ruuhanti Mellayi. Ay goŋŋakite pe na tattipicca taasití kabarre ta daana ma beneyya ma gaartee Masi, min geegar ka Zerizalem namma ya kiɗa tee ta Iliri. 20Innasoopa na nawwiye taasití kabarre ta daana wereeriyee maa gu giimi alɗikiko geewa ɗa missa gaartee Iisa Masi. Naata pa aŋka ɗa na taasicca kabarre ta daana were maa ga gimu kaƴi omoɗɗe paaɗe, aleŋ gimu ma geewe ger kayaati balti ger maa ga gimu kaƴi gekee. 21Ma goŋŋakite pa, na jobbiya ka kitipiyenta aattí Kitamniti Mellayi maa gee: «Giimi maa gu tasawwiyooga ɗa missa akkiya ella o giimi ma geewiy ɗa gaartee akkiy ibina balco#15.21 Elloŋ Esaya 52.15..»

22Keeke pa, ay gata diiman ma toɗokkiyaw kaato na deeɗitoŋ ella. 23A haŋka soopa na gaamiyya lubbitu kee ka kiɗaayee kooko. Lekka ƴilaakee maani maa na aŋaɗɗe ta tirta teete kaato wikirtoŋ na deeɗitoŋ ella. 24Kaatitu taata pa deewa wikinne maa naa kataa kiɗa ta Espan̰. Kaaka pa, na aŋka na paalittoŋ na deeɗitoŋ ella o na gemekke oko gaayitoŋ maa ku leewanaw, naa sartoŋ. Ma kunta pa na deeɗo nunta wikinne. Gii galbantu ooliyaw pa asan na ellitoŋ paaɗe, naa ƴiiliɗo ka pe. 25Haŋka soopa na kataa Zerizalem na deeɗiy gaaya ma itiro tee ta maatiki gimtee Mellayi ku gonek, 26asan gu gimtee Mellayi ku kiɗa ta Maseduwan o ma ta Akaay gi deyyo daanayo gu timmiɗe maatiki ka gaayico gimtee Mellayi ma lekka ɗa maatiki koo ku Zerizalem. 27Haa, deyyo daanayo. A innasoopa, ga keeke ay tirta gu leeɗiya, asan ga ay aleŋ ɗaane ma aaye kayyeeco. A guta pa gimtee Mellayi ma ay Yawudigee eddiy barkaŋgeeco maa gu gasakke min oko Ruuhanti Mellayi ma giimi ma ay Yawudigee ɗa. Haŋka pa kulla, ga ay tirta paaɗe gu giimi ma ay Yawudigee ɗa timmiɗo maatiki oko gimtee Mellayi ma lekka ɗa maatiki koo ku Zerizalem. 28Wikinne maa naa gaamiya latta keeke, naa biriyyooga latta paratti maa gu temekkiyoo, ay kaaka pe naa paalittoŋ, naa ƴiiliɗo Espan̰. 29Naata pa lekka kabarre kadar ga wikinne maa naa sare wikirtoŋ, ay ma barkanti Masi parattí.

30Innasoopa seneeta na enewwitoŋ, ma semeetee Miltine kee Iisa Masi o ma ƴekko tee ta Ruuhanti Mellayi, ku bookiɗo oko gaartaw, aleŋ tanni ma inaawi oko Mellayi, 31maa na paawiɗo min picco giimi koo ku kiɗa ta Yudee ma pooce amanniti oko Masi o maa ga maatiki maa na eterra oko gimtee Mellayi koo ku Zerizalem deeɗo oyyenta ma parhane. 32Ma goŋŋakite pa, ga naata kulla sarakka wikirtoŋ ma parhane, na deeɗo namba paalta ma kuŋ gaa Mella oyye. 33Haŋka pa ga Mella, gata ma ay Miltí aapiyati, dee ma kuŋ parattoŋ. Amin.

Currently Selected:

Rooma 15: mmy

Highlight

Copy