Rooma 14

Maa gi amanniti talta o maa gi amanniti talta ɗa

1Oyyoŋga ma kunta gimu maa gi amanniti talta ɗa o ku aɗoŋ ecekka ɗa meela oko mooyiti maa ga lekka. 2Daare gi amannico oyowwiyo gu tewɗiy lawwi paracco. Daare pa mileŋ gi amannico paalta ka, gu teewa ɗa suuɗu. 3Ga ma teeway lawwi paracco aɗiki lee ɗa liyaw gonek ka giiti ma teewa ɗa suuɗu, o ga ma teewa ɗa suuɗu kulla, aɗiya luumiya ɗa keeke ma teewa latta paratti, asan ga Mella oyowwiya paaɗe. 4Ki ay we maa ki loomoyɗo lubaaka ma ay kancum ɗa? Baŋ ga baame talta oko lubbiti e, e baŋ ga galaa e, ga kaaka tapakke milti, o ga gata pa bakamma samaane asan ga Miltine gederra ga gaayiyya ga baamiɗo talta.

5Oko giimi daare pa gu meeni paracco sawa ɗa. Meene kaƴi ƴiilaca gattí. Oko daare pa ga paracco gu sawa ka. Ga kulla kaƴi aɗe leeti kabarre oko mooyiti kadar gi samaane. 6Gimu maa gi meene kaƴi ƴiileeca gattí, ga leewica ku maa ga cipilɗiy semeetee Miltine, o gimu pa kulla ma teewaca tiyaw parattí, teewaca ku maa ga cipilɗiy semeetee Miltine, o ga leewee barkinti oko Mellayi, o gimu ma teewa ɗa suuɗu, gi tiyawti ɗa taata ay maa ga cipilɗiy semeetee Miltine, o ga leewee kulla barkinti oko Mellayi. 7A gata pa, min aattine lekka ɗa ma nowotte oko gata ka, o ga lekka ɗa ma mataa oko gata ka. 8Kee nowotta, ke nowotta oko Miltine, o kee matakka, ke matakka oko Miltine. Caŋ ke nowotta, caŋ ke matakka, ke ay kuntee Miltine. 9A gata pa, Masi maateero gaa yookiɗe hayaatanti ku maa ga deeɗo Milco oko giimi ku mattenta o ma geewa. 10A kiita pa ma teewa ɗa suuɗu, ayme ki loomoyɗiya sincum? A kiita ma teewaca tiyaw parattí, ayme ki lewɗiya liyaw gonek ka sincum? Parattine, ke akkine warra unti Mellayi o ga gata ma akkine caaɗa parlane. 11A gita pa, Kitamniti Mellayi beneyye gee:

«Naata Miltoŋ ma aaye diiman,

ay naata saa ma beneyyatoŋ naa:

Giimi paracco akkaw darsa untu oko naata,

o ga kulla kaƴi aɗe akka beneyya kadar na ay Mella#14.11 Elloŋ Esaya 45.23..»

12Ay goŋŋakite pe, ga kulla kaƴi aɗe min aattine, ga Mella asiyya inna oko gaartee maa ga leewe.

13Kaaka pa, ke warrine maaƴi min luumiyo ta zeneetine. Iccoŋ soo niyyane maa ku alɗo dee ɗa ya maatiki kaƴi ma baɗakka e baŋ ga ma esekka liyaawi zunubgeyyo sincum. 14Naata pa lekka kabarre o na damanne ma kappitu ma Miltine kee Iisa kadar gi lekka ɗa tiyaw ma negekkam unti Mellayi. A innasoo, gaa gimu moyaa gaa gi tiyaw taata negekkaa unti Mellayi, ga latta kaaka deewee miɗɗa oko gata ma moyaa kaaka. 15Gaa latta maa ki teewa esekkee zorontiyo oko sincum, ga kaaka pa ki jobokkiya ɗa payya botol ka ƴekkiti. Ma saanane ka tiyaawi ka, ki ayya issa ɗa masilti, gimu maa ga Masi maateero oko gata. 16Ga latta ma samaanatoŋ oko kunta, aɗaayo dee ɗa oko gittoŋ botol maa gu beneyyikkiki miɗɗa. 17A gata pa latta ka samaane ƴiila mulunniti Mellayi, ay tiyaw ɗa o gi aar̰o ɗa, innasoo ga ay latta kee ka ɗayaŋ, o aapiya, o parhane. Gaari kooko pa, gi Ruuhanti Mellayi beray. 18Gimu ma lobokka oko Masi ma jobbico gaari kooko daanee oko Mellayi, o giimi kulla beneyya samaane ma gaartee.

19Kaaka pa, ke diyyine soo ma esekka aapiya o ma gederra ga gaayinne parattine ke maaɗiɗo sawa amanniti. 20Ayya niŋga ɗa lubbiti Mellayi ma gaari koo ku tiyaawi. Ay tirta appe gu lawwi paracco samaane tiyaawi unti Mellayi, innasoopa gi tiyaw tee ta maatiki ma esekkaa giicum zunubgeyyo samaane ɗa. 21Daana ki poociɗo tiyaw tee ta suuɗi o aar̰o tee ta mirmo. Poociy lawwi paracco ma esekkaa sincum zunubgeyyo. Keeke pa, ay gata ma ay latta kee ka samaane ƴiila liyaawi. 22Amannicum maa ki lekka oko lawwi kooko o ki leeti kabarre kadar gi samaane, ki duwca oko kii o ma Mella. Baarikenta, ay gimu ma damanne kadar ga latta maa ga leewa ay kee ka samaane, o ga bagaa ɗa pe ziiti ma mooyiti taata maa ga lewɗe gaa e ga lattaati kaaka maa ga leelo miɗɗa. 23A gata pa, gimu, gaa teewa gaa bamaɗɗica galbanti seera seera, gi parlanti Mellayi baagiya asan ga jobokkica ɗa amanniti. Latta paratti maa ke leewa kee amanɗe kadar ga ay kee ka liyaawi ɗa, ke leewa zunubgee.

Currently Selected:

Rooma 14: mmy

Highlight

Copy