Rooma 16

Salammiti Pol

1Naa n̰akammatoŋca suttine tee Poobe#16.1 Poobe pa, ay gatti Pol maa ga kappitiica maktupti teete gi kaatikiti geegar ka Rooma. ma ay gayaawaco gimtee Mellayi ma temekka saananti Iisa Masi koo ku geegar ka Saŋkerees, 2maa ku joobicca ma semeetee Miltine, ma joobo ma wagawwiyoo oko gimtee Mellayi. Gaayoŋca maa gi gassiyya latta paratti maa gi aŋka min oko kuŋ, asan gi gita saa kulla gaayeero giimi maani o naata saa kulla gi gaayinoo.

3Salammoŋgu ini Pirisil ma mittí kee Akilas, gittaw maa ni lubbiɗe sawa oko Iisa Masi. 4Guta kotti oyye guu deeway kulla ku maa gu najjiyinno min muuti. Gata pa ay na kaytu ɗa ka ma laayo barkinco, ay giimi paracco saa kulla ma temekka saananti Iisa Masi ma ay Yawudigee ɗa, guta kulla laayo barkinco. 5Salammoŋgu kulla giimi ma temekka saananti Iisa Masi girco.

Salammoŋga Epayneet, lanjintu ka ƴekkenta, gata ma ay ka omma min kiɗa ta Aazi ma dowwica galbanti oko Iisa Masi. 6Salammoŋca Mariyam, gita ma tinnitoŋ ta tirta teete. 7Salammoŋgu ini Andironikus ma gatti Yuniya maa gi baltini alɗo kaƴi o gu gittaw maa gu bamminii sawa daŋayi. Guta pa ibinenta o gu karmiyenta aacco n̰amaakeetee Iisa Masi, guu dowɗiy galbigeeco oko gata omma min oko naata. 8Salammoŋga Ampiliyatuus gata maa na ƴekka ta kaw asan ni kappenta ma Miltine. 9Salammoŋga Urbeen giitine ka lubbi oko Masi, o Sitakiis lanjintu maa na ƴekka. 10Salammoŋga Apelees gata ma gaarica amanniti oko Iisa Masi aacco cokooko, o ku salammoŋgu kulla giimi ku girti Aristobuul. 11Salammoŋga Erodiyoon maa gi baltini alɗo kaƴi, o ku salammoŋgu kulla giimi ma nowotte girti Narsiis, guta ma ay koo ku Miltine. 12Salammoŋgu ini Tiripeen ma gattí Tiripoos, guta ma lobokke ta tirta oko Miltine, o suttine ta ƴekkenta tee Persid ma lobokka kulla ta tirta oko gata. 13Salammoŋga Rupuus, gata maa ga Miltine apire o yaati kulla ku salammoŋca, gita ma ay iya kulla oko naata. 14Salammoŋgu ini Asinkirit o Pilegon o Ermees o Patirobas o Ermas o seneeta ma aaye ma guta. 15Salammoŋgu ini Pilolok ma gatti Yuliya o Neree ma sutti. Salammoŋgu kulla ini Olimpaas o gimtee Mellayi paracco ma aaye ma guta. 16Salammoŋ beenannitoŋ ma googo ma wagee oko gimtee Mellayi. Gimtee Masi paracco ma temekka saananti salammitoŋ.

17Seneeta, haŋka pa na enewwitoŋ ku warriɗo maaƴi min oko giimi ma paale min oko giraane maa ku gasse. Giimi kotti pa edekkay giimi o gu esekka beneyyiŋgee gu meselɗiy giimi ma dowwiy galbigeeco oko Iisa Masi. Nuntoŋ arro min oko giimi kotti, 18asan gu guta lobokka ɗa oko Miltine kee Masi, lobokka soo oko aɗicco ka. Ma beneyyiŋgeeco ku daana daana o ma nabbisico gu daɓallay giimi maa gi ibinco paalta ka. 19A guta pa giimi paracco ibinca jobbitoŋ maa ku joboɗɗiya Miltine, ay oko keeke na alɗo parhinenta ma gaartoŋ. Innasoopa na aŋka ku deeɗo giimi ma ibina gaari maa ku lewɗo samaane bala amso paalta ka kulla ta gaari ku miɗɗa. 20Mella, gata ma ay Miltí aapiyati akkiya aya katta Seetanne, gaa gagiyya kiɗaati min asintoŋ. Ga gidaanuwti Miltine kee Iisa dee ma kuŋ.

21Timote, giitu ka lubbi salammitoŋ. Lisiyuus o Jaason o Sosipateer, guta maa gi baltini kaƴi salammitoŋ kulla. 22Haŋka pa ay naata Tertiyuus pe pa ma ketepeyyica maktupti Pol teete, ma salammitoŋ ma semeetee Miltine. 23-24Gayuus maa na ay turuuti o maa gu giimi temekka saananti Iisa Masi girti gata kulla salammitoŋ. Eraste ma dommoyya gurus ka geegarri salammitoŋ o sintine kee Kartoos kulla salammitoŋ.

Ay Mella kayti ka ma ay kee ka logaawi

25Logokkineega Mella, gata ma gederra ga birittoŋ gudirane amannitoŋ ma kabarre ta daana maa na itirtoŋ, gita ma tasay gaartee Iisa Masi. Ma gita pa, ga Mella gaarica seene ta kiilenta min tippa ta kaw. 26Haŋka pa gi deero gaarenta, o gi deero ibinenta ma kutubgeeco nabiinigeyyo oko giimi kulla ma ay Yawudigee ɗa. Keeke pa, ay aleŋ maa ga Mella, gata ma aaye diiman saa beneyye, ku maa gu giimi paracco duwɗiy galbigeeco oko Iisa Masi o gu jobbiyya. 27Ay oko Mella kayti ka ma lekka ibino ta gaaro gi darjane. Gita pa, ay ma Iisa Masi, diiman diiman. Amin.

Currently Selected:

Rooma 16: mmy

Highlight

Copy