Rooma 13

Wasaane ma kee ka jobbití hakuumati

1Ga kulla gimu aɗe jobokkiya kee ka hakuumati, asan gi lekka ɗa hakuuma bala oyyiti Mellayi, o giimi pa kulla ma aaye aattí hakuumati, ga ay Mella ma esekkiy. 2Ay oko keeke pe, ga kulla gimu aɗe ma pooceero jobbiti oko kee ka hakuumati, pooceero jobbiti oko maa ga Mella aŋka. Guta ma pooceero kotti pa, gasakka caaɗo ta parlanti. 3A gata pa, kii leewa samaane, ki lekkiyo ɗa ɓayaw oko taattuweeti hakuumati ma caɗaa parlane. A innasoo, kii leewa miɗɗa pa, ki ɓayakkayo. Kii aŋka pa ki alɗiyo ɓaya ɗa, ki lee kee ka samaane o ki gasakkaca logawco. 4Taattuwee pa, guta ay lubaakeetee Mellayi ku maa gu leeɗam ka samaane. A innasoopa, kii leewa ka miɗɗa, ga ay tirta ki ɓayiyyo asan gu guta lekkiya botol maa gu diigiyɗum. Oko gimu ma leewa kee ka miɗɗa pa, gu gareega bogorti Mellayi asan gu lobokkee oko Mellayi. 5Ay ɗakko appe, gi alɗo samaane ta kaw gi oyyo tee ta jobbico gaarti hakuumati. Gata pa ay ɓayaw ɗa ka, tee ta bogorti Mellayi, innasoo ku jobboŋgu kulla asan ga ma mooyitoŋ ma passalla ka samaane o ka miɗɗa ku lekka kabarre kadar ga ay botol ka samaane. 6Ay oko keeke appe kulla ku kappayɗo miiri, asan gu ma gasakkaa ay lubaakee maa ga Mella gagakkiy gu leeɗiya lubbi kaaka. 7Birneega oko kulla kaƴi aɗe maatiki maa ku bereega: miiri ku birneega oko maa ku bereega, o gurus daare maa gi hakuuma caɗaayo oko giimo ku birneega oko maa ku bereega, o ɓayaw ku ɓaynee oko gata ma ay ka ɓayaawi, o karmiyo ku karmiyoŋga gata ma ay ka karmiyti.

Ƴekko ta gittoŋ

8Aɗoŋ sokokka ɗa ɗannanni min oko giimo, ku dowɗiyo kayyeetoŋ, illa ay ɗaane tee ta ƴekkiti beenannitoŋ, asan ga gimu ma ƴekkiya giiti tattipiy hukumnigeetee Mellayi paracco. 9Ku ibiniy hukumnigee maa goo: «Ga miiɗi addo un̰n̰a ɗa oko daatti giiti o daate pa kulla gi addo issa ɗa mittí gattí, o ki addo dee ɗa gimu ma aaniyo, o ki addo maasa ɗa, o ki addo aŋakka ɗa lawtee giicum#13.9 Elloŋ Oomiti min Masir 20.13-15,17 o Ɗillico Hukumnigeyyo 5.17-19,21..» Hukumnigee kooko aɗe o koo ku daare, paracco timmenta aatti beneyyi keeke ka maa goo: «Ƴekkiya giicum aleŋ maa ki ƴekkiyya ziicum#13.9 Elloŋ Oomiti min Masir 20.13-17 o Ɗillico Hukumnigeyyo 5.17-21 o Soƴoowee ku Saɗikaŋgeyyo 19.18..» 10Gimu ma ƴekka giiti pa, leewee ɗa ta kaw miɗɗa. Ma ƴekko pa, ke tattappaa ka hukumnigeyyo paracco.

Meene ta najjiyti katta

11A kunta pa dekerroŋ ku lewɗiya keeke ta ƴiila asan ku ibinya appe wikinne keeke maa ke aaye. Ay haŋka appe ay wikinne maa ku waciɗo min ooƴiti waano. Meene ta najjiyti aayine pe katta ka haŋka, aaye ɗa payya arro aleŋ tee ta wikinne maa ke duwɗiy galbigeetine oko Iisa Masi. 12Keeke pa ay aleŋ kuu ga aandoŋ gakamma katta, gii paato pa delewɗo paaɗe icco. Meelineegu maaƴi liyaawiŋgee ku namtuwwi, kee sokkinne lawwi ku bookati maa ke bookiɗo ma iiɗo. 13Gu gaartine paracco dee samaane aleŋ tee ta giimi ma tan̰aa deyyanti. Anne un̰n̰a ɗa liyawco gaari ku miɗɗa maa gu leewa ma mowwo o aar̰o ta kaawenta o diyyo ta alala tee ta zeneyyo bala paate, o ke anne un̰n̰a ɗa kulla diyyo ta kalaatanti o gi lekkico gittine aɗine raɗakka ɗa galbigeetine. 14Innasoo ku issoŋga Miltine kee Iisa Masi aleŋ kaɗiyyu, aɗoŋ moyaa ɗa ku joboɗɗiya kantoŋ ka maa ku lewɗiya maa ku aŋka.

Currently Selected:

Rooma 13: mmy

Highlight

Copy