Rooma 10

1Seneeta, maa na aŋka ma galbantu paratti ay gu Yawudigee gassicca najjiyo. Ay oko keeke appe na lollokɗiya Mella. 2Naata pa elliy kadar gu bakammica ta tirta teete aabido oko Mellayi, innasoo gi aabidico taata gu ibinca ɗa daggantí. 3Guta pa ibina ɗa baŋ ga Mella garay gaa me giimi ɗayaŋ unti guu deyeɗɗo gu deeɗo ɗayaŋ unti Mellayi ma lubbi kanco ka. Butulti Mellayi maa ga eyewwiyo oko giimo maa ga garawɗiy ɗayaŋ unti pa gu oyaa ɗa jobbiti. 4A gata pa, Masi ay gata ma asiya tattipa kanco hukumnigeetee Muusa o ga ma gata gu hukumnigee gederriyoo ɗa payya oko giimo. Ma goŋŋa pa, gu giimi paracco ma dowwiy galbigeeco oko gata deewa ɗayaŋ unti Mellayi.

Najjiyo ta giimi paracco ay ma amanno oko Iisa Masi

5A gata pa Muusa saa kulla kitipiyeero ma gaartee gimu ma deyekka ga deeɗo ɗayaŋ unti Mellayi ma jobbico hukumnigeyyo gaa: «Gimu ma jobokkay hukumnigee gasakkaca hayaatane ma guta#10.5 Elloŋ Soƴoowee ku Saɗikaŋgeyyo 18.5..» 6A innasoopa, ma gaartee gimu ma deyekka ga deeɗo ɗayaŋ unti Mellayi ma amanno, gi Kitamniti Mellayi beneyye gee: «Addo mooya ɗa galbancum kii: Ay we ma akka kalpa samaani?» Gata pa ay aleŋ kuu ga aŋka ga deeɗiya beera Masi kiɗaati. 7Gita pa beneyye payya gee: «Addo lee ɗa ta kaw kii: Ay we ma beraa oolati?» Gata pa ay aleŋ kuu ga aŋka ga deeɗiya cipila Masi min aacco giimi ku mattenta. 8Gita beneyye payya kulla gee: «Beneyyi aaye katta ma kiita. Gata pa aaye biicum o ga aaye galbancum#10.6-8 Elloŋ Ɗillico Hukumnigeyyo 30.12-14..» Beneyyi keeke pa, ay kabarre tee ta amanniti maa ni tasaa. 9Gaa ma biicum ki beneyyeero unco giimo kii ga Iisa ay Miltine, o kii amanneero ma galbancum paratti kadar ga Mella naɗiya min aacco giimi ku mattenta, ki gasakkaca najjiyo. 10A gata pa ay ma galbanti ga gimu amanɗo, gaa Mella gaariya ɗayaŋ unti, o ga ay ma biiti ga garawɗica amanniti, gaa Mella najjiyiyya. 11Kitamniti Mellayi beneyye gee: «Kulla gimu aɗe ma dowwica galbanti oko gata on̰aa ɗa ta kaw jaaliti#10.11 Elloŋ Esaya 28.16..» 12Ay ɗakko appe gi apiro alɗo lekka ɗa aacco giimi ma ay Yawudigee o ma ay Yawudigee ɗa. Paracco ga Milco kaƴi ka, gata ma beraa ka samaane maa ga lekka oko giimi paracco ma lollokkaa. 13A guta pa «giimi paracco ma lollokkaa ma semeetee Miltine akka gassa najjiyo#10.13 Elloŋ Zowel 3.5..»

14A guta soo lollokkaa goo me, guu duwiy ɗa galbigeeco oko gata, o gu dowway goo me oko gata, guu giyye ɗa kabarre ma gaartee? Guta pa geewaca pe goo me kabarre ta gaartee gaa lekka ɗa gimu ma taasica, 15o gi kabarre deewa gee me taasenta, guu lekka ɗa giimi maa gu n̰akammiy taasiti? Keeke pa ay aleŋ maa gi Kitamniti Mellayi beneyye gee: «Samaane ta kaw ki elelɗiy gu asaa gu giimi ma taasa kabaayargee ku daana#10.15 Elloŋ Esaya 52.7..» 16A innasoo gu giimi paracco ɗa ma oyyica kabarre ta daana. Oko keeke pa ga nabiinice Esaya beneyye gaa: «Mella Miltini, ay we ma amanneero oko kabarre maa ni tasaa#10.16 Elloŋ Esaya 53.1.?» 17Ma kaaka pa, gu giimi amanna ma giyyo, o maa gu geewa pa ay kabarre ma beneyya ma gaartee Masi.

18Goŋŋakite pa na enaatoŋ ƴa: Ay ma tirta aɗɗe gu Yawudigee geewica ɗa missa kabarre ta gaartee Masi teete? Ay tirta ɗa, guta geewica aɗe. Kitamniti Mellayi beneyye gee: «Or̰icco deero giyyenta kiɗa parattí o beneyco sareero ya dessití dunuuniti#10.18 Elloŋ Soom 19.5..» 19Na enaatoŋ ƴa: Giimi ku Isirayel soo ibinya ɗa beneyyi ka aattí kabarre ta Masi teete e? Min omma ma bitti Muusa ga Mella beneyye gaa: «Na leewatoŋgu galbigeetoŋ gu raɗɗitoŋ oko maa gu gasse gu giimi ma ay kunni ɗa. Na boŋossatoŋ ma balle kaƴi maa gu gímtí gu kayyeeco ecekka ɗa#10.19 Elloŋ Ɗillico Hukumnigeyyo 32.21..» 20Mella isseeca oko nabiinice Esaya namma ga beneyyiɗe gaa: «Na deero gassenta ma giimi ma deyekkano ɗa o na deero ibinenta ma giimi ma enaano ɗa ya maatiki#10.20 Elloŋ Esaya 65.1..» 21Innasoopa ma gaarco giimi ku Isirayel ga beneyye gaa: «Kulla meene na tarawwiyoogu pittaw oko gimtaw, ku maa gu asiɗo oko naata, guta soopa pooce jobbo o gu ribiliyaw kupo#10.21 Elloŋ Esaya 65.2..»

Currently Selected:

Rooma 10: mmy

Highlight

Copy