Rooma 11
11
Mella poociy ɗa giimi ku Isirayel
1Naata pa lekka ƴa inno: Mella soo poociy gimtee koo ku Isirayel e? Ay seene ɗa. Gata pocowwiy ɗa, asan ga naata saa ay ka Isirayel min balti Biraayim, burgutti Benjamin. 2Mella pa gata poociy ɗa gimtee koo ku Isirayel, guta maa ga ebenniy min omma. Mooyoŋga ƴa beneyyi ma kitipiyenta Kitamniti Mellayi ma gaartee nabiinice Eliyas. Gata pa erciyee oko Mellayi ma gaarco giimi ku Isirayel 3gaa: «Miltu, guta deyyiy nabiinigeecam o gu ɗimmiy wereeriyiŋgeecam maa ni soƴoɗɗam saɗikaŋgee. Kaytu ka pe na marakke, guu deyeɗɗe kulla diyawtu#11.3 Elloŋ 1 Salaataŋgee 19.10..» 4A Mella pa tiiliyee gaa me? Gata tiiliyee gaa: «Alpaŋgee paysara kee ka giimo min aacco giimi ku Isirayel maa na gagakke oko naa, guta kotti darseero ɗa kaytiŋ unti zooru kee Baal maa gu aabidiyya#11.4 Elloŋ 1 Salaataŋgee 19.18..» 5Oko wikinne kee ka haŋka pa kulla, gu lekka paalta ma marakke maa ga Mella ma gidaanuwti aparriy. 6Gata pa apiriy ay ma gidaanuwti, ay ma gaarco ɗa maa gu leewa. Gaa ay goŋŋakite ɗa ga gidaanuwti Mellayi lekekka ɗa gidaanuwe.
7Ma keeke pa, ga ma deero ay ini me? Latta maa gu giimi ku Isirayel deyekka gu gassiyya ɗa, innasoo gu giimi maa ga Mella aparre, ay guta ka ma gassiya. Ku daare ku Isirayel pa, gu kayyeeco deero talta oko kolliti Mellayi. 8Keeke pa ay aleŋ maa gi Kitamniti Mellayi beneyye gee: «Mella leyyoogu kayyeeco gu alɗo ibina ɗa maatiki o iɗiico ga toɗɗiyoo ello o oko deyco giyyo ta gaaro, o ga goŋŋakite appe ya meente#11.8 Elloŋ Ɗillico Hukumnigeyyo 29.4..» 9Sultan Dawud pa kulla beneyye gaa: «Gu wereeriyiŋgeeco ku tiyaawo ku laalaŋgeeco deyyo ɗebbo o sippa, maa gu solliɗo guu gassicca diigane ma wagawwiyoo. 10Gu iɗiico raamayo maa gu alɗo ella ɗa payya ta kaw o gu diigiyu diiman maa gu gudulɗo#11.10 Elloŋ Soom 69.23-24..»
11Kaaka pa, na enaa pe naa: Baɗɗico giimi ku Isirayel soo ay maa gu solliɗo ta kaw gu alɗo waca ɗa payya e? Kaw, ay seene ɗa. Innasoo gi ay ma niŋgico maa gu poocicca kabarre ta daana, gu giimi ku maani ma ay Yawudigee ɗa gassicca najjiyo. Gasso ta najjiyti taata pa issiyoo raɗɗo ta galbanti oko Yawudigeyyo. 12A gita pa niŋgico taata itireero barkane yaata ta kaw oko giimi ku dunuuniti, o oomico min butulti Mellayi deero barkane yaata ta kaw oko giimi ma ay Yawudigee ɗa. Mileŋ ga ay goŋŋakite pa, ga ay tirta saa pe ga wikinne maa guu Yawudigee aseero yooka ta kaw, gu oyyicca kabarre ta daana, gu barkaŋgee deewa ɗa pe maani ƴiila e?
Najjiyco oko giimi ma ay Yawudigee ɗa
13Haŋka pa ga beneytu ay oko kuŋ, giimi ma ay Yawudigee ɗa. Naata ay n̰amaakati Iisa Masi oko giimi ma ay Yawudigee ɗa, o na garaaca darjanti lubbi keeke maa ga Mella damakkiyaw. 14Ma goŋŋakite pa, walaŋ pe na leeway galbigeeco seneetaw Yawudigee gu raɗɗiyo ku maa ga ma lubbitu keeke na najjiyɗiy daare min aacco. 15A gata pa, wikinne maa ga Mella otoɗɗiyoo oko Yawudigeyyo kayco ka, gu giimi ku dunuuniti gassica taaco ma gata. Mileŋ ga ay goŋŋa pa, ga wikinne maa ga asiɗiy oyya payya, ga ay ini me ma akka dee? Ma akka dee ay aleŋ naɗaw min aacco giimi ma matakke.
16Gaa mappa ka cimmenta omma birenta oko Mellayi, ga mappa paratti ay ka Mellayi. A guu caartee itti ay ku Mellayi, gu linƴaƴƴitee pa kulla ay kuntee. 17Giimi ku Isirayel pa kulla ay aleŋ ettu ka giiri maa gu kolaa goo olibiye#11.17 Olibiye pa ay semeetee ettu kaƴi aɗe maa gu tomokka ta tirta teete kiɗa ta Isirayel. Rontee pa gu ayammay o gu temekkay guu meƴeɗɗiy sewen. maa ga wikirti panenta samaane, guu linƴaƴƴitee daare ga Mella reppiɗiy. Kiita pa ma ay ka Isirayel ɗa ay aleŋ linƴiti ettu ka kayni maa gu kolaa goo olibiye gaa Mella asiɗum kappa ma linƴaƴƴitee ettu ka giiri. Gaa haŋka pa ki gederɗo paaɗe ma linƴaƴƴitee ettu kaaka ki jotoɗɗo ammi min oko caartee. 18Ma goŋŋakite pa, ki addo lee ɗa pe kii ki ƴiilay linƴaƴƴi maa gu reppe. Ki lekka ɗa botol maa ki koolipiɗo, ay kii ɗa ma jotokkayo ammi oko caartee itti, ay caartee itti ma jotokkam ammi.
19Ki beneyya pe kii: Linƴaƴitee ettu ka giiri gu reppiy maa ga naata deeɗo kappenta wikirco kaaka maa gu repeɗɗiy. 20Ay seene appe. Guta deero reppenta asan gu dowwiy ɗa galbigeeco oko Iisa Masi. Kiita pa ay amannicum ma askum ki asiɗe dee kappenta iŋaakite. Addo koolipa ɗa, innasoo ki ɓayu. 21A gaa Mella reppiy saa kulla linƴaƴƴitee ettu ma wacakke ma gata, ga kiita kulla ga dowwam ɗa. 22Kiita mooyu: Mella gata gidaani o ga gazanta. Gazanta oko ma oomeero min butuuli, oko kiita pa, ga gidaani kii nunteero aatti gidaanuwti keeke, goneka kee ga ki kulla akka dee reepenta aleŋ linƴe. 23A innasoo, gaa ya meene gu Yawudigee yookeero amanniti, gu guta kulla akka dee kappenta wikirco ka tippa maa gu deeɗe reppenta, asan ga Mella lekkica gudirane maa ga kappiɗiy payya. 24A gata pa, kiita ay aleŋ linƴiti ettu ka kayni maa gaa Mella reepica ga deeɗica kappa oko ettu maa ga wikirti panenta samaane kee maa gu alɗe maɗa ɗa sawa. Kappo taata pa, raɗɗa pe. Yawudigee pa, guta ay aleŋ linƴaƴƴitee oko ettu kaaka maa ga wikirti panenta samaane. Mileŋ gu guta pa ay linƴaƴƴitee aɗe oko ettu kaaka, ga Mella pa yokay daana ka weerereeyiŋgeeco ku omma maa gu repeɗɗiy.
Kawiyti Mellayi ay oko giimi paracco
25Seneeta, na aŋka ku ibinicca seene maa ga Mella gaare. Kuu ibinca seene taata pa, ku leewa ɗa ku ga ay kunta ma lekkica ibino ta gaaro. Giimi ku Isirayel daare pa, gu kayyeeco deero talta, gu poociɗe amanno oko Iisa Masi. Guta kotti pa nowotta pe goŋŋakite aɗe namma ya wikinne maa gu giimi paracco ma ay Yawudigee ɗa ma akkiy duwa galbigeeco oko Iisa Masi, asiɗiy duwa galbigeeco. 26Ay goŋŋakite pe kulla gu giimi ku Isirayel paracco asiɗo dee najjiyenta. Keeke pa ay maa gi Kitamniti Mellayi beneyye gee:
«Ay min Siyon ga Najjaaya akka asa,
gaa asiyyooga cimma maaƴi latta paratti
maa gu alɗikinoo bakamma ɗa,
guta ma ay koo ku balti Yakub.
27Teete pa ay liŋgane maa na akka onna ma guta
wikinne maa naa asiyoogu cimma zunubgeeco.»
28A gata pa, ke ellaa kee ka Yawudigeyyo ma gaarti kabarre ta daana, gu guta pocowwica gu deeɗe kasiimigeetee Mellayi. Ma keeke pa, ga kuŋ ma ay Yawudigee ɗa gederra ku gassicca najjiyo. A innasoo ma kee ka apirti giimo ma Mella pa, gu guta ƴekkenta ma Mella asan ga onne liŋgaŋgee ma kookuweeco. 29Mella pa gata ecekkay ɗa barkaŋgee maa ga bire o ga magakkaa ɗa maa ga aŋka liyawti oko maa ga kolle. 30Tippa ga kuŋ ma ay Yawudigee ɗa jobokkiya ɗa ka Mellayi, gaa haŋka pa ku gassicca kawiyti mileŋ gu Yawudigee poociya jobbiti. 31Haŋka pa, ga oko guta kulla ga ay latta sawa ka. Guta poociya haŋka ku maa ga kuŋ gassicca kawiyti o guta pa kulla haŋka gederra gu gassicca kawiyti Mellayi. 32A gata pa, ma pooco ta jobbiti Mellayi ga leyyiy giimi paracco aleŋ kuu gu baamenta daŋayi. Keeke pa, ga leyya ku maa ga gaaricca kawiyti oko giimi paracco.
33Elloŋ ƴa! Ayaawuwti Mellayi oyaa ɗa gemmo.
Ibinti ta gaaro o ibino maa ga lekka oyaa ɗa desso.
Mooyiti maa ga ecekka ta liyaawi gaaro,
lekka ɗa ma gederra ga ibinicca baltí,
o lekka ɗa ma gederra ga ibiniyya
baŋ ga leewa gaa me maa ga leewaa.
34Kitamniti Mellayi beneyye gee:
«Lekka ɗa gimu ma ibinca mooyiti Mellayi,
o ga lekka ɗa gimu ma garee beneyyiŋgee#11.34 Elloŋ Esaya 40.13..»
35«Lekka ɗa gimu ma beree ɗaane oko Mellayi
gaa gata pa asiyyeeca yooka suulayi#11.35 Elloŋ Ayuub 41.3..»
36A gata pa, gu lawwi paracco ku kilgiyenta
asaa min oko gata
o gu aaye pittee
o gu aaye oko gata.
Ay oko gata gi darjane diiman diiman! Amin.
Currently Selected:
Rooma 11: mmy
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
