Yaakobho 4
4
Mwighwere Waryobha
1Momanyirë ubhutindi na riihë bheno bhërëngë mö-bhëënyu muyö hano bhikurwera? Nkurwera bhërë ko-ronamba urwa mo-nkoro iya ömöntö, rono rukwitana na amaitegherro agha ömöntö uyö. 2Hano mwabha na oronamba urwa ëkëntö nyabhorebhe, moratora ukwita hano kyabhabhora. Morabha na orongʼeera kö-bhëntö ibhya abhandë, na hano mwabhorwa enshera iya ukubhinyoora, nkobheehana mörë, mwitana. Ëbhëntö bheno mukutuna timukubhinyoora hë, ko bhoora igha, temokobhesabha ku-Waryobha hë! 3Kora hano mwasabha, timukubhinyoora hë, ko bhoora no-ronamba urwënyu ndwo rokoghera morabhesabha.
4Bhëënyu tëmörëngë abhantö abha heene ku-Waryobha hë, n-kya abhakari abhasooraare mörë. Kasi temomanyirë igha hano ömöntö yaghootana obhosaani na ekebhara, nkobha arë umubhisa uwa Waryobha? Ömöntö wowonswe ono araatune okoghootana obhosaani na ekebhara, uyö nkobha arë umubhisa uwa Waryobha. 5Kasi nkokanya mörë igha, Amaandeko Amahörëëru m-bosa ghakoghamba igha, Umwika ono Waryobha yaatohaana araighwa öbhörrö bhököngʼu?#4:5 Umwika ono Waryobha yaatohaana araighwa öbhörrö bhököngʼu. Ensonga iyaamo iyëndë ni-igha, Waryobha araighomba bhököngʼu Umwika ono yaatoha. 6Hamwë na ghayö ghonswe igho, kasi nkutwëngërya arë örööbhö, nkyo kekoghera Amaandeko Amahörëëru gharaghamba igha,
“Waryobha nkwanga arë abhantö bhano bhakwiheema,
kasi örööbhö urwaye na-bhahaabhu akohaana.”#4:6 Maaha mo-ketabho ikya Sengero 3:34.
7Ku bhuyö, mwighwerenga Waryobha. Kasi mwangenga Oghosambwa#4:7 Oghosambwa. Maaha mo-faharaasa. na amangʼana aghaako, ho ghoraabhangʼosenga. 8Musuntarrenga Waryobha, ho wonswe araabhasuntarre. Bhëënyu abha ëbhëbhë, mutighe ëbhëbhë ibhyënyu, mokore amangʼana amaiya, bhëënyu bhano motashirë eno na eno, momosoorane ko senkoro isyënyu syonswe igho. 9Mwighwe öbhörrö, mukuure, mosenkemerre. Okoseka ukwënyu, kusyöribhwi kobhe ikikuuro, na ukushomerwa ukwënyu, kobhe okobhaabhayera ukwënyu. 10Ömöntö ono akwisuuhya ko-monene Waryobha, nkömönënëhya arë.
Motakaaghambananga bhoghogho
11Abhakumya bharikyane, motakaashërëngyanga amangʼana agha bharikyënyu. Ko bhoora ömöntö wowonswe ono akushërëngya amangʼana agha murikyaye, handë okomobhotorra ikiina, uyö nkunyoora arë asërrë amaraghërryö agha Waryobha. Hano oraasere amaraghërryö, uwe tokoghasooka hë, kasi nkunyoora örë wikörrë umwahokania uwa amaraghërryö. 12Waryobha umwene, we akotoora-ho amaraghërryö, na we umwahokania uwaaho. We akotora ökötöörya ömöntö na ukumusikya. Kasi uwe nu-uwe wë ono okobhotorra ikiina murikyaho?
Motakaihashanga
13Bhoono bhëënyu bhano mokoghamba igha, “Reero handë isho, nturighya mu-mughi nyabhorebhe, twikare iyö omooka umughima torakora ibhyashara, tunyoore ehoorohooro.” 14Amakëëyë teghamanyëëywë hë! Kasi nkokanya mörë igha öbhöhöru ubhwënyu n-këntö? Sinsikö isya ömöntö sengʼana ekesaanyi ikya ensaaghi! 15Mutighenga okoghamba igho, kasi moghambenga igha, “Hano Omonene Waryobha araahanshe igha tobhe abhahöru, ntoraakore ëkëntö nyabhorebhe.” 16Kasi bhoono bhëënyu, moraighegha igha moonabhyo kora moraiheema. Ukwiheema kuyö n-koghogho. 17Ku bhuyö ni-igha, ömöntö ono amanyirë okokora amangʼana amaiya kasi takoghakora hë, hayö në-këbhë akokora.
© 2021, Wycliffe Bible Translators, Inc. All rights reserved.