Yaakobho 3
3
Okonaghya örörëmë
1Bhëënyu abhakumya bharikyane, abhëëghya abha engʼana iya Waryobha bhatakaaruha mö-bhëënyu. Ko bhoora momanyirë igha, bhëëtö abhëëghya abha engʼana iya Waryobha nturiitaahwa bhököngʼu na Waryobha okokera abhandë bhonswe igho. 2Obhoheene ni-igha, bhëëtö bhonswe igho, hare kaaru ukunyoora toraituuratuura ko bhoghambi ubhwëtö. Hano oraanyoore aaho ömöntö wowonswe ono atakwituuratuura ko bhoghambi ubhwaye, uyö m-möntö uwa heene, aratora okorebherra ömöbhërë ughwaye ghwonswe igho.
3 Momaahe mbe igha, nkotoora törë ikyoma ekeke keno kikumbirwë mu-minywa ighya sefaraasi, okore sitwighwere. Ku bhuyö, nkusyörya törë ëmëbhërë ighyasyo, situhira ahasë honswe igho hano tukutuna. 4M-maheene, tigha mbarëngëri engʼana iyëndë. Iryato ryonswe, nokaanyoora igha ni-nene bhököngʼu, na nköghëndibhwa rërë na rikama rirörö, kasi nkusyöribhwa rërë na insika enke igho, ukughya ahasë hohonswe igho hano ömöghöbhya akutuna abhate. 5Mbe, örörëmë urwa ömöntö rwonswe ni-igho rörë, n-këntö ekeke kö-möbhërë ughwa ömöntö, kasi nkoghera rörë ömöntö aihasha bhököngʼu. Maaha kya bhono omorro omoke ghokokora öbhöhë ghusikya risisi rinene! 6Na örörëmë urwa ömöntö rwonswe n-kya omorro, ni-igho rwishööyë obhoghogho bhonswe igho, na nkö-möbhërë rörë. Roratora koromaania obhoghogho kö-möntö, nkusikya rörë öbhöhöru ubhwëtö kya mo-morro ghotakurima.
7Abhantö bharatora ukutugha sityënyi syonswe igho, ibhinyönyi, sinshoka, sinswë, na bhyonswe igho bheno bhërëngë mo-manshë. 8Kasi taaho ömöntö ono akotora ukutugha örörëmë hë, ndo-ghogho, terokotongwa hë, ndoona öbhösöngö ubhwa ukwita.
9Mbe, örörëmë nkoghera rörë tukumya Taata Waryobha Omonene uwëëtö. Örörëmë ruyöruyö, ndwo rokoghera toraihiima abhantö bhano bhaabhombwa na Waryobha ku ituubho iyaaye. 10Mu-munywa ghuyöghuyö, mo ghakurwa amangʼana agha ökötöönia, na agha ukwihiima abhantö. Abhakumya bharikyane, ghayö teghaingʼarëëyi ghabhe igho hë. 11Terooho orobheere urwa ekeseekaani rono rukurwa amanshë amaiya na agha ömöönyö hë! 12Abhakumya bharikyane, ömötë ghono ghokobherekerwa igha umutiini, ghoratora ukwama sehagho isya ëmëzëituuni? Handë omozabhibhu, ngotora ukwama sehagho isya umutiini? Orobheere urwa ekeseekaani ikya amanshë agha ömöönyö, terokotora ukurwa amanshë amaiya hë.
Obhongʼaini ubhwa mu-ryobha
13Mbe, nyoore aaho ömöntö mö-bhëënyu ono aana obhongʼaini, ono amanyirë amangʼana, ömöntö uyö ööröki abhantö okomanya ukwaye na obhongʼaini ubhwaye ko okokora amangʼana amaiya. Aihoote ubhwihöötu bhono bhukwörökya abhantö obhongʼaini bhono aanabho.
14Kasi hano oraanyoore igha moona orongʼeera, öbhörrö na ekeroterro mo-senkoro isyënyu, na eno moraikumya igha m-bangʼaini mörë, bhuyö m-borongo. 15Obhongʼaini ubhwa eteemo iyö, m-boghogho, tibhukurwa ku-Waryobha hë, kasi nu-bhwa kinyabhantö, ubhwa ko-kebhara kono, bhono bhukurwera ko-Ghosambwa. 16Ahasë honswe igho hano orongʼeera rörë bheena ekeroterro, hayö ho ribheeha na amangʼana amaghogho aghandë ghonswe igho gharëngë.
17Kasi, obhongʼaini bhono bhukurwa ku-Waryobha, m-buuya, mboona omorembe, na obhohaabhu, nkwitegherra bhörë bhuuya amangʼana agha abhantö. Obhongʼaini bhuyö, nkokora bhörë amangʼana amaiya, kora mboona ikyabhera, tebhoona ekeroterro, handë ubhwahöri ubhwa abhantö, handë ubhwihunaania. 18Hano abhantö abha omorembe bhaabhusura imbusiro iya omorembe, omanye igha nö-bhöntö ubhwa heene bhareghesa.
Currently Selected:
Yaakobho 3: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.