Sir 50
50
1Simooni omuhongyerezi omukuru mwene Oniya
akaba ai omwebembezi wa beene ishe,
kandi naasiimwa munonga ab'eihanga rye.
Manya obu yaabaire akihuriire,
akahunduuza Nyaruju,
yaayombeka n'ebigo by'okurinda Omwanya Ogurikwera.
2Niwe yaayombekyeise emisingi y'ebisiika biraingwa by'enyabubiri,
eby'okuhigika ekikaari kya Nyaruju.
3Omu biro bye nibwo baatimba ekiziba
omu rukiri eky'okurindiramu amaizi,
ekyemi nk'enyanja omu kukyehinguririza.
4Akateekateeka munonga oku araajune abantu be okuhwerekyerera,
yaayombeka ebigo aha rurembo kugungira ab'okurugota.
5Ebishi akagira ekitiinwa obu abantu baamwehinguririza,
naaruga enyima y'omukingo gw'Aharikwerera kimwe,
6naashusha nk'enyonyoozi y'omu busheehe
erikureeberwa omu bicu,
nari nk'okwezi kw'ekizooro;
7nk'eizooba ririkwakira ahari Nyaruju ya Rukiraboona,
kandi nk'omuhanganzima gurikwengyengyetera
omu bicu birungi munonga;
8nk'ebirabyo bya rooza omu biro by'eitogyera ry'ebijuma;
nk'emyangangye emezire aha rubaju rw'akagyera;
nk'akataagi k'erangi ya kibabi
akatookire ahari Lebanooni omu kyanda;
9nk'omuriro n'obubaani aha kyotereraho,
nari nk'orwabya rw'ezaabu eshekwire,
oruhunzirwe amabaare g'obuguzi ag'emiringo mingi;
10nk'omuti omuoliva ogurikukondakonda ebijuma,
kandi nka kaarwenda eraihire ekakora omu bicu.
11Manya ku yaajwaire bushuuti ye ey'ekitiinwa,
yaaba murungi munonga,
yaizihirwa, yainamuka aha itambiro,
yaijuza ekikaari ky'Aharikwera ekitiinwa kingi.
12Kandi ku yaatungire emigabo y'ebitambo,
naagiheebwa abahongyerezi,
obwo ayemereire aha rubaju rw'amahega g'eitambiro,
na beene ishe bamushagatiire nk'ekishaba ky'ebirabyo,
yaashusha nk'omuvure muto ogw'ahari Lebanooni,
nabo baamwehinguririza bari nk'emiti y'emikindo.
13Beene Arooni boona baijwire ekitiinwa,
bakeemerera bakwaitse omu ngaro
eby'okutoijera Mukama,
bari omu maisho g'oruteerane rw'Abaisiraeli.
14Ku yaabaire naaheza kukora omugyenzo gw'aha matambiro,
kandi naatebeekanisa eby'okutoijera Rukiraboona
ow'obushoboorozi bwona,
15yaakununkirira ekikopo,
yaakishukamu viino y'okuhaisa Ruhanga ekitiinwa,
yaagishuka ahansi y'eitambiro
kuba omugaju gurikugwisa gye Rukiraboona
Omugabe w'abantu boona.
16Bwanyima beene Arooni baateera akaari
n'enzamba ziheesirwe omu feeza,
baayamuza munonga, baahurirwa;
kyaba ekiijutsyo omu maisho ga Rukiraboona.
17Reero abantu boona hamwe tibaasiibyayo,
baagwa ahansi bajuumaire,
kuramya Mukama waabo omushoboorozi wa byona,
Ruhanga Rukiraboona.
18N'abeeshongozi baamuhimbisa n'amaraka gaabo,
nibeeshongorera kimwe n'amaraka marungi g'akanihiiro.
19Kandi abo bantu baayeshengyereza
Mukama Rukiraboona,
nibashabira omu maisho g'ogwo Munyambabazi,
okuhitsya obu omugyenzo gw'okuramya Mukama gwaremwire,
20bakahereza aho ogwo mukoro.
Bwanyima Simooni yaashuuma,
yaimukiza emikono oruteerane tw'Abaisiraeli
kushabira abantu omugisha gwa Ruhanga,
kandi yaayesiima ahabw'okwikirizibwa kugamba eizina rye.
21Batyo nabo bainama baaramya obwa kabiri,
kutunga omugisha ogurikuruga ahari Rukiraboona.
Eby'okwendeza emigisha
22Mbwenu hati ka tusiime Ruhanga w'eiguru n'ensi,
okora ebikuru hoonahoona,
okutuura naatutunguura okwiha twaba kuzaarwa,
akatutwaza nk'embabazi ze oku ziri.
23Naakatuhe emitima eijwire okushemererwa,
akaikiriza obusingye kuba omuri Isiraeli omu biro byaitu,
nk'oku bwabaire bugirimu omu biro bya ira.
24Naakatugumyeho embabazi ze
kandi naakatujune ahu araayendere hoona!
Enfumu y'orurenzyo
25Hariho amahanga abiri agatamire;
erya kashatu ryo ti ihanga kantu;
26nigo g'abantu aba: abatwire aha Rushozi Seyiri kandi n'Abafilisitiya,
taho ebitomomo ebitwire omuri Sheekemu.
Okuhendera
27Nyowe Yesu mwene Siraki, mwene Eleyazaari owa Yerusalemu,
ou omutima gwe gwahimintikiremu obu bwengye,
niinye mpandiikire ebiri omuri eki kitabo,
ebirikuhabura abantu okumanya n'okwetegyereza.
28Omuntu orikweta ahari ebi bintu, aine omugisha;
kandi orikubitaho omutima aryaba omunyabwengye.
29Manya ku arikubikora aryabaasana n'ebintu byona,
ahabw'okuba Mukama niwe amumurikira omuhanda.
Ekyeshongoro ky'okusiima Ruhanga
Currently Selected:
Sir 50: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.