Aza 1
1
Okushaba kwa Azariya ari omu kikoomi
(Dan. 3:1-68)
1Abo batsigazi bakagyendagyendera ahagati y'endimi z'omuriro nibeeshongorera Ruhanga, nibahimbisa Mukama. 2Bwanyima Azariya yaasingiza Ruhanga ari ahagati y'omuriro, yaayashamya akanwa yaagira ati: 3Ai Mukama, Ruhanga wa baatateekuriitwe, ohaisibwe kandi ohimbisibwe, n'eiziina ryawe riheebwe ekitiinwa ebiro byona! 4Ahabw'okuba ori omwinganisa omuri byona ebi otukoreire. Byona ebi okora biba eby'amazima, emitwarize yaawe ehikire n'emicwere yaawe y'emanja eba ey'oburyo. 5Ebihikiirizi ebi oikiriize kutugwera nootufubira hamwe na Yerusalemu, orurembo rwa baatatenkuriitwe orurikwera n'eby'amazima, ahabw'okuba omu mazima n'omu bwinganisa ebyo byona obiikiriize kutugwera nootutura ebibi byaitu. 6Ahabw'okuba tukwimwire, twakora ebibi, tutarikukuratira by'omu iteeka; twacumura omu bintu byona, titwayorobera biragiro byawe; 7kandi titwabitaho mutima, nobu kwakuba okubikuratira, nk'oku waaturagiire, ngu tubone kuba gye. 8N'ahabw'ekyo byona ebi otureetsireho n'ebi otukozire, obikozire nootucwera emanja z'oburyo. 9Otunagire omu mikono y'abazigu abatakuratira Iteeka, abazigu abangani; waaturekurira omugabe otahikiriire, orikukirira kimwe obubi omu nsi yoona. 10Reeba, mbwenu titwine gaashamya akanwa; enshoni n'obuhemu bitwitsire, itwe abaheereza baawe abakuramya. 11Ahabw'eiziina ryawe otaturekyera kimwe, kandi otahenda endagaano yaawe. 12Otanga kutugirira embabazi, ahabw'omukundwa waawe Aburahamu n'ahabw'omuheereza waawe Isaaka n'ahabw'orikwera waawe Isiraeli, 13ou waaraganiise kugira abaijukuru, bakaba baingi nk'enyonyoozi z'omu iguru, bakaingana n'omusheenyi gw'aha rubaju rw'enyanja. 14Manya, ai Mukama, itwe tutuubire okukira agandi mahanga, kandi ahabw'ebibi byaitu, eri izooba twaba abarikugaywa omu nsi yoona. 15N'obwa hati titwine mugabe nari omurangi nainga omwebembezi.Titwine bitambo by'okwotsya nari ebindi bitambo nainga emitoijo nari obubaani, nobu haakuba ah'okukutoijera emitoijo, ngu obone kutugirira embabazi. 16Kwonka nitukushaba n'omutima gweteisize kandi omucureezi, ku otwikiriza nk'abakutoijeire ebitambo byokize eby'empaya z'entaama n'enimi n'enkumi z'entaama ez'ebishaju. 17Eki kitambo kyaitu ka kibe kityo omu maisho gaawe eri izooba, haza tukukuratirire kimwe; ahabw'okuba abakwesiga tibarihemuka. 18Mbwenu hati n'omutima gwaitu gwona nitukukuratira, nitukutiina, kandi nitwenda kukureeba ahamaisho. 19Otatureka tukahemuka, kureka otutwaze gye nootugumisiririza, kandi nootugirira embabazi nyingi. 20Ai Mukama, nk'eby'okutangaaza byawe ebi okora oku biri, otujune, haza eiziina ryawe ribone kuhimbisibwa. K'abarikukora kubi abaheereza baawe bahemurwe; 21baitwe enshoni, baakwe obushoboorozi bwona n'obutegyeki, babone kucweka eishaija! 22Ka bamanye ku niiwe Mukama Ruhanga wenka ow'ekitiinwa omu nsi yoona!
23Obwo abaheereza b'omugabe, abaanagiremu abo batsigazi, bakagumizamu nibeenegyeza omuriro gw'eiziiko n'amajuta g'okugubugumya na koroto n'omurunga gw'ekyoma gw'okubitambikayo n'eshando y'okugwataata. 24Ogwo muriro gwanaga enkobe ahaiguru y'ekikoomi erikuhitsya mikono makumi ana na mwenda. 25Gwayogamu gwayotsya Abakaludaaya abu gwabakire beehinguririize ekikoomi. 26Kwonka maraika wa Mukama yaija omuri ekyo kikoomi, yaaguma hamwe na Azariya na bataahi be, yaiha endimi z'omuriro omu kikoomi; 27ahagati yaakyo yaahahindura nk'aharimu omwinuro gurikubobeeza. N'ahabw'ekyo omuriro tigwabahikaho n'akakye, nari kubakora kubi, nobu kwakuba okubabuza obusingye.
Ekyeshongoro ky'abatsigazi bashatu
28Bwanyima abo batsigazi bashatu baahimbisa Ruhanga n'eiraka rimwe nibamuha ekitiinwa, kandi nibamusingiriza omuri ekyo kikoomi, bati: 29Ai Mukama Ruhanga wa baatataitwe, ohimbisibwe! Osingizibwe kandi ohaisibwe ebiro byona! 30N'eiziina ryawe eririkwera ery'ekitiinwa rihimbisibwe! Risingizibwe kandi rihaisibwe ebiro byona! 31Ohimbisibwe omuri Nyaruju yaawe y'ekitiinwa kandi erikwera! Osingizibwe kandi oheebwe ekitiinwa ebiro byona! 32Ohimbisibwe Iwe osingami ahari baakerubi, okareeba eby'okuzimu! Osingizibwe kandi oheebwe ekitiinwa ebiro byona! 33Ohimbisizibwe aha kitebe kyawe ky'obugabe! Osingizibwe kandi oheebwe ekitiinwa ebiro byona! 34Ohimbisizibwe omu kaabunga k'eiguru! Oyeshongorwe kandi oheebwe ekitiinwa ebiro byona! 35Imwe mwena ebi Mukama yaakozire, muhimbise Mukama! Mumweshongorere eby'okumusingiza nimumuhaisa ebiro byona! 36Imwe eby'omu iguru, muhimbise Mukama, mumweshongorere eby'okumusingiza nimumuhaisa ebiro byona! 37Imwe baamaraika ba Mukama, mumuhimbise kandi mumweshongorere eby'okumusingiza nimumuhaisa ebiro byona! 38Imwe mwena amaizi g'ahaiguru y'eiguru, muhimbise Mukama, mumweshongorere eby'okumusingiza nimumuhaisa ebiro byona! 39Imwe mwena ebiine obushoboorozi, muhimbise Mukama, mumweshongorere eby'okumusingiza nimumuhaisa ebiro byona! 40Eizooba n'okwezi, muhimbise Mukama, mumweshogorere eby'okumusingiza nimumuhaisa ebiro byona! 41Imwe enyonyoozi z'omu iguru, muhimbise Mukama, mumweshongorere eby'okumusingiza nimumuhaisa ebiro byona! 42Imwe mwena enjura n'orume, muhimbise Mukama, mumweshongorere eby'okumusingiza nimumuhaisa ebiro byona! 43Imwe mwena emiyaga, muhimbise Mukama, mumweshongorere eby'okumusingiza nimumuhaisa ebiro byona! 44Imwe omuriro n'ekibiga, muhimbise Mukama, mumweshongorere eby'okumusingiza nimumuhaisa ebiro byona! 45Imwe embeho ya katumba n'ekibiga ky'ekyanda, muhimbise Mukama, mumweshogorere eby'okumusingiza nimumuhaisa ebiro byona! 46Orume n'ebirika, muhimbise Mukama, mumweshongorere eby'okumusingiza nimumuhaisa ebiro byona! 47Imwe nyekiro na nyomushana, muhimbise Mukama, mumweshongorere eby'okumusingiza nimumuhaisa ebiro byona! 48Imwe omushana n'omwirima, muhimbise Mukama, mumweshongorere eby'okumusingiza nimumuhaisa ebiro byona! 49Imwe orubaare n'obutiti, muhimbise Mukama, mumweshongorere eby'okumusingiza nimumuhaisa ebiro byona! 50Imwe emirombe n'ebirika, muhimbise Mukama, mumweshongorere eby'okumusingiza nimumuhaisa ebiro byona! 51Imwe emirabyo n'ebicu, muhimbise Mukama, mumweshongorere eby'okumusingiza nimumuhaisa ebiro byona! 52Ensi k'ehimbise Mukama, emweshongorere eby'okumusingiza neemuhaisa ebiro byona! 53Ime enshozi n'ebibungo, muhimbise Mukama, mumweshongorere eby'okumusingiza nimumuhaisa ebiro byona. 54Imwe mwena ebimera ahansi, muhimbise Mukama, mumweshongorere eby'okumusingiza nimumuhaisa ebiro byona! 55Imwe nshuro z'amaizi, muhimbise Mukama, mumweshongorere eby'okumusingiza nimumuhaisa ebiro byona! 56Imwe amayanja n'emigyera, muhimbise Mukama, mumweshongorere eby'okumusingiza nimumuhaisa ebiro byona! 57Imwe emigoye na byona ebihangwa ebigyendera omu maizi, muhimbise Mukama, mumweshongorere eby'okumusingiza nimumuhaisa ebiro byona! 58Imwe enyonyi zoona ez'omu kaabunga, muhimbise Mukama, mumweshongorere eby'okumusingiza nimumuhaisa ebiro byona! 59Imwe enyamaishwa z'omu ishwa n'ez'omu maka, muhimbise Mukama, mumweshongorere eby'okumusingiza nimumuhaisa ebiro byona! 60Imwe mwena abaana b'abantu, muhimbise Mukama, mumweshongorere eby'okumusingiza nimumuhaisa ebiro byona! 61Iwe Isiraeli, himbisa Mukama, omweshongorere eby'okumusingiza noomuhaisa ebiro byona! 62Imwe abahongyerezi ba Mukama, muhimbise Mukama, mumweshongorere eby'okumusingiza nimumuhaisa ebiro byona! 63Imwe abaheereza ba Mukama, muhimbise Mukama, mumweshongorere eby'okumusingiza nimumuhaisa ebiro byona! 64Imwe emitima n'amagara eby'abahikiriire, muhimbise Mukama, mumweshongorere ebiro byona! 65Imwe abarikwera kandi abacureezi omu mutima, muhimbise Mukama, mumweshongorere eby'okumusingiza nimumuhaisa ebiro byona! 66Imwe Hananiya, Azariya na Mishaeli, muhimbise Mukama, mumweshongorere eby'okumusingiza, nimumhaisa ebiro byona ahabw'okuba yaatwiha okuzimu owa Nyamuteza, yaatujuna amaino ga rufu, yaaturokora, naatwiha ahagati y'emengye y'omuriro gurikubuguma, yaatukiza, yaatwiha ahagati yaagwo, 67Muhimbise Mukama ahabw'okuba ni murungi, kandi embabazi ze n'ez'ebiro byona! 68Imwe mwena mumweshongorere eby'okumusingiza nimumuhaisa ebiro byona!
Currently Selected:
Aza 1: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.