Bar 6
6
1Eki n'ekihanduukururo ky'ebaruha ei Yeremiya yaatwekyeire abaabaire nibaza kutwarwa Babulooni omugabe waayo, bari enkwatwa, kubahitsyaho obutumwa obu Ruhanga yaamuragiire, ati: 2Ahabw'ebibi ebi mwacumwire ahari Ruhanga, nimwija kutwarwa Babulooni Nebukadenezaari omugabe wa Babulooni muri enkwatwa. 3N'ahabw'ekyo ku muriheza kuhika Babulooni, muryamarayo omwanya muraingwa okuhitsya obu murihikizayo enzaaro mushanju; bwanyima ndyabaihayo n'obusingye. 4Mbwenu omuri Babulooni muryashangayo baaruhanga abakozirwe omu feeza omu zaabu n'omu biti, abu abantu baheeka aha mabega, bakatiinisa abakaafiiri. 5N'ahabw'ekyo mwerinde, mutaritooreza abanyamahanga nari kutiinisibwa baaruhanga abo, mwareeba ebimbuuro by'abantu bibari omu maisho n'enyima nibibaramya. 6Kwonka imwe omu mitima yaanyu mugire muti: Ai Mukama, niiwe wenka ou turikuragiirwa kuramya. 7Manya maraika wangye aryaba ari hamwe naimwe naabarinda.
8Endimi za baaruhanga abo zikasoomorwa abanyamyoga, kandi bahunzirwe ezaabu n'efeeza, kwonka ti b'amazima, tibarikubaasa na kugamba. 9abantu bakwata ezaabu, bagikoramu ebirunga by'okujweka emitwe ya baaruhanga baabo, nk'oku baakugiriire omwishiki orikukunda amahunde. 10Obundi abahongyerezi omu bwesherekye baiha ezo zaabu n'efeeza ahari baaruhanga, bazeekoresezamu ebyabo ahabwabo. 11Nangwa ezimwe baziha baamaraaya b'omu maju g'omu maramizo. Bajweka baaruhanga baabo nk'abantu baaruhanga b'efeeza n'ebiti, 12abatarikubaasa kwejuna mukyereenyo n'oruhumbo. Nobu babajweka bushuuti za bujwa, 13hoona baba bari ab'okushushurwa aha maisho omucuucu gw'omu iramizo ogubahumbikire. 14Ruhanga bamukwatsa enkoni y'obugabe nk'omutegyeki mukuru w'ekyanga, nobu aba atarikubaasa kugiitsa owaamugwisa kubi. 15Omu mukono gwe gwa buryo akwaitse rurara n'empango, kwonka tarikubaasa kwekiza orugamba n'abambuzi. 16Aho niho kirikweyorekyera butunu ku batari baaruhanga; n'ahabw'ekyo mutabatiina.
17Nk'oku orwabya rw'omuntu rutagira mugasho rwatikire, na baaruhanga b'abakaafiiri nikwo baba baaheza kuteebwa omu maramizo. Amaisho gaabo gaijwire omucuucu gurikutuntumurwa ebigyere by'abarikutaahamu. 18Nk'oku emiryango yoona ekingwa bakingiraine omuntu ogwisize kubi omugabe, ari nk'ocwereirwe orubanja rw'okufa, n'abahongyerezi nikwo barinda amaramizo gaabo, nibagakingisa enyigi n'ekufuru n'emiteehimbwa, ngu abasikuzi batakaagira ebi baaganyagamu. 19Babahembera amatabaaza maingi agarikukira agu bo beehembera, haza baaruhanga baabo abo batarikubaasa kureeba itabaaza na rimwe. 20Bari nk'omuraba gw'eiramizo. Reero obukooko ku buruga omu itaka, bwabarya hamwe n'ebijwaro byabo, abantu bagira ngu emitima yaabo yaayaga. 21amaisho gaabo ku gairaguzibwa omwika gw'omu iramizo, tibakimanya. 22Obuhundu, entaratambi n'ezindi nyonyi zibateekama aha mibiri n'aha mitwe; n'enjangu zibashooberaho. 23Aho niho muraamanyire ku batari baaruhanga; n'ahabw'ekyo mutabatiina.
24Ezaabu ei babahunda ngu bareebekye gye tibamwamwatikana haaba hatabaireho owaagiihaho omukyereenyo. Nangwa nobu baabaire nibaheeshwa, tibarakihuriire. 25Nobu bagurwa ebirikwingana ki, kwonka shi tibagira mwitsyo. 26Ahabw'okutagira bigyere, baheekwa abantu aha mabega; haza ekyo kyoreka omuntu weena ku bataine mugasho. 27ababaheereza baitwa enshoni, ahabw'okuba nibo beemereza baaruhanga abo ngu batakumbagara. Ku habaho owaayemereza omwe aharibo, tayeiha hi baamuta. Ku bamuhugika, tayeyemereza burunga, kwonka babatoijera emitoijo nk'abarikutoijera abafiire. 28Abahongyerezi, ebitambo ebihongyeirwe baaruhanga abo babitunda, empiiha ezaabirugamu bazeekyenuuza, ebimwe abakazi baabo babisiiga omwonyo kubirinda, kwonka tibagira ki baaha abooro n'abataine kihwera. 29Ebitambo ebi babatambira bihikwaho abakazi abari omu kwezi nari abakiri aha kiriri. Nk'oku mwamanya ku batari baaruhanga, mutabatiina.
30Mbwenu shi baaruhanga abo, abakozire omu feeza n'omu zaabu n'omu biti, bakaabeeteire ki baaruhanga, abakazi ku baraabe nibabaihurira ebyokurya? 31Omu maramizo gaabo, abahongyerezi bashutamamu bajwaire ebitaagukire, emitwe yaabo n'ebireju bimweire, n'emitwe yaabo eteetwekyereire. 32Bacura kandi baborooga omu maisho ga baaruhanga baabo nk'oku abantu omu rufu bacurira ofiire. 33Abahongyerezi batwara ebijwaro bimwe ebya baaruhanga baabo kubijweka abakazi baabo n'abaana baabo. 34Ku habaho owaabakora gye nari kubi, tibabaasa kumuzimuurira. 35Kandi nikwo batabaasa kugaba bintu nari empiiha. Tibabaasa kwemeka mugabe nari okumwiha aha ngoma. Ku habaho owaabaragaanisa naahiga, haza ataakikora, tibakimwenza. 36Tibazibira muntu kufa, nari abataine maani kubajuna ab'amaani. 37Tibabaasa kuhumuura mpumi nari okujuna ori omu kabi. 38Tibagirira saasi mufaakazi, n'efuuzi tibagikorera by'embabazi. 39Ebyo bintu bikozirwe omu biti, bikahundwa ezaabu n'efeeza, biri nk'amabaare garugire omu rushozi, kandi abarikubiramya baryahemurwa. 40Mbwenu shi obwo, omuntu naiha hi kuteekateeka ngu ni baaruhanga, nari kubeeta baaruhanga?
Nangwa n'Abakaludaaya babagaya; 41ahabw'okuba ku bareeba omuntu ekiteta otarikubaasa kugamba, bamureeta, bashaba Beli ngu ogwo muntu agambe, oshusha oti Beli naayetegyereza. 42Haza ekyo bo baremwa kukyetegyereza, bakatsigaho baaruhanga abo, ahabw'okuba tibaine bwengye. 43Kandi abakazi beezirikire orugoobe, bashutama omu mihanda rugyendwa nibahemberera omweziga nk'obubaani. Omwe aharibo, omuhinguzi ku amutwara yaabyama nawe, ogwo mukazi ayeraatira mugyenzi we omuherereire, ngu ahabw'okuba tiyaarigirwa nkawe bakamucwa orugoobe. 44Kyona eki babakorera kiba eky'ebishuba. Mbwenu shi obwo omuntu naiha hi kuteekateeka ngu ni baaruhanga, nari kubeeta baaruhanga?
45Bakorwa ababaizi n'abaheesi, kandi tibagira kundi oku bashusha, kureka oku abanyamyoga barikwenda ngu babe. 46Buzimazima tibariramaara abantu ababikora. Mbwenu shi ebi bakozire nibibaasa bita kuba baaruhanga? 47Tibaine ki batsigira abaana baabo, kureka ebishuba n'ebijumo. 48Manya ku bahikwaho orugamba nari baagwerwa akagwe, abahongyerezi babuuzana obwengye ahi baraayesherekye na baaruhanga baabo. 49Mbwenu aho omuntu naabaasa ata kutareeba ku batari baaruhanga, haza batarikubaasa kwejuna rugamba nari ekihikiirizi? 50Nk'oku bakorwa omu biti bakahundwa ezaabu n'efeeza, nikimanywa ku batari b'amazima. 51Amahanga goona n'abagabe nibaija kukireeba butunu ku batari baaruhanga, kureka ku bari ekyakozirwe engaro z'abantu, kandi omuribo ku hatarimu eki Ruhanga yaakozire. 52Mbwenu shi obwo, omuntu naabaasa ata kutamanya ku batari baaruhanga?
53Manya tibarikubaasa kuha eihanga omugabe, nari okugwisiza abantu enjura. 54Tibarikubaasa kweshoboororera ebyabo, nari okujuna oshaagiziibwe, ahabw'okuba tibaine bushoboorozi; bari nk'ebikoona biri omu kaabunga. 55Omuriro ku gukwata eiramizo eririmu baaruhanga abakozirwe omu biti, bahunzirwe ezaabu nari efeeza, abahongyerezi baabo bahunga kwekiza, haza baaruhanga abo bahiiramu nk'ebiti. 56Kandi tibabaasa kwemerana n'omugabe nari abazigu. Mbwenu aho omuntu naiha hi kwikiriza nari kuteekateeka ngu ni baaruhanga?
57Baaruhanga abakozirwe omu biti, bakahundwa efeeza n'ezaabu, tibarikubaasa kwejuna abashuma n'abasikuzi. 58Abantu b'amaani ku babacwijura ezaabu n'efeeza zaabo na zaabushuuti ezi bajwaire, tibeehwera. 59N'ahabw'ekyo haakiri omuntu okuba omugabe, akooreka obumanzi bwe, nari okuba ekintu ekirikukoresibwa omu nju kikamarira mukama waakyo omukyeno, okukira okuba baaruhanga abo abatari b'amazima. Nangwa haakiri okuba orwigi orurinda ebiri omu nju, okukira okuba baaruhanga abo abatari b'amazima; kandi haakiri okuba enyomyo y'omuti omu kikaari ky'omugabe, okukira okuba baaruhanga abo ab'ebishuba.
60Manya eizooba n'okwezi n'enyonyoozi ku byaka, biba nibikora omurimo ogu byahangiirwe, kandi biba nibihurira owaabiragiire. 61Nikyo kimwe n'omurabyo ku gurabya, gureebwa oku n'oku, n'omuyaga nagwo nikwo guhuuha omu buri nsi. 62Ruhanga ku aragiira ebicu kubuga ensi yoona, bihitsya eki yaabiragiira. 63N'omuriro ogwohereziibwe niguruga omu iguru kucwekyereza enshozi n'ebibira, guhitsya eki guragiirwe. Kwonka ebyo bishushani tibirikugyeragyeranisibwa n'ebyo bihangwa gashani omu kureebwa n'omu maani. 64N'ahabw'ekyo omuntu tashemereire kubiteekateeka ngu ni baaruhanga, nari kubyeta baaruhanga, ahabw'okuba tibigira ki bishoboorora, nobu kwakuba okukorera abantu ebirungi. 65N'ahabw'ekyo nk'oku mwamanya ku bitari baaruhanga, mutabitiina.
66Manya tibibaasa kwinaza bagabe nari kubaha omugisha. 67Tibibaasa kworeka bumanyiso mu iguru nari omu mahanga, nari okwaka nk'eizooba, nainga okureeta ekyererezi nk'okwezi. 68Enyamaishwa nizibihita, ahabw'okuba zo nizibaasa kuhunga zikeeshereka, zikeejuna. 69N'ahabw'ekyo, titwine kirikutworeka ku biri baaruhanga, nikyo mutashemerereire kubitiina.
70Nk'ekikoona waringa ekiri omu musiri gw'ebihaaza, ekitaine ki kirikurinda, nikwo baaruhanga baabo abakozirwe omu biti, bahunzirwe ezaabu n'efeeza bari. 71Kandi hoona baaruhanga baabo, abakozirwe omu biti, bahunzirwe ezaabu n'efeeza, bari nk'ekishaka ky'amahwa ekiri omu musiri, ekiteekamwaho ibara nyonyi, nari biri nk'omutumbi gunagirwe ahatarikuhweza. 72Emyenda yaabo ya bujwa na kitaani ebataanyagurikiireho, niyo muraamanyireho ku batari baaruhanga. Haza aha muheru baryahwaho, babe ekihemu omu nsi. 73N'ahabw'ekyo omuntu ohikiriire, otaine bishushani birikuramibwa naabahita, ahabw'okuba we tarigira bu abaire ekihemu.
Currently Selected:
Bar 6: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.