Kur 5
5
1Bwanyima Musa na Arooni bakaza omu maisho ga Faraaho, baamugira bati: Mukama Ruhanga wa Isiraeli naakugira ati: Reka abantu bangye bagyende, bankorere obugyenyi omu ihamba. 2Na Faraaho abagira ati: Mukama ogwo n'oha, ou nyowe nshemereire kuhurira ebye, nkarekura Abaisiraeli kugyenda? Nyowe Mukama ogwo tindikumumanya, kandi tindikwija kurekura Baisiraeli kugyenda. 3Nabo bamugarukamu bati: Manya Ruhanga w'Abaheburaayo atubonekyeire. Twakweshengyereza, turekye tugyende orugyendo rw'ebiro bishatu, tuze omu ihamba tutambirireyo Mukama Ruhanga waitu ebitambo, atakaatwitsa orufu nari rurara. 4Kwonka ogwo mugabe wa Misiri abagira ati: Iwe Musa na Arooni, nimwendera ki kwiha abantu aha mirimo yaabo? Nimugarukye aha mirimo yaanyu! 5Agaruka abagira ati: Reeba abantu b'omuri egi nsi ni baingi; mbwenu imwe nimwenda kubahuumuza ngu barekye kukora emirimo egumire.
Faraaho okuragiira kwongyera kwitsa Abaisiraeli emirimo
6Eryo izooba Faraaho akaragiira baanyampara b'abantu n'abeemererezi baabo, ati: 7Mutagaruka kuha abo bantu obunyaatsi bw'okubumbisa amatafaari, nk'oku mubaire nimutwaza. Mubarekye bagyende babwesherurire. 8Kandi omubaro gw'amatafaari gu babaire nibabumba mugubagumyeho, mutagutuubya na kakye; ahabw'okuba tibaine ki barikukora. Nikyo barikuhoogyera bati: Ka tuze kutambira Ruhanga waitu ekitambo. 9Abo bantu mubahe emirimo erikukiraho kuguma, bagikore, barekye kuta omutima aha bigambo by'ebishuba.
10Batyo baanyampara b'abo bantu n'abeemererezi baabo bashohora, babagira bati: Faraaho yaagira ngu tarikwija kubaha bunyaatsi. 11Ngu mube niimwe mwabwesherurira ahi muraabushangye hoona, kandi ngu n'omurimo gwanyu tigurikwija kutuubibwaho na kakye. 12Mpaho abo bantu baataataana omu nsi ya Misiri yoona kwesherurira ebitsintsi by'embuba omu mwanya gw'obunyaatsi. 13Haza obwo baanyampara baabo nibabarigitirira, bagumize bati: Mukore omurimo gwanyu ogwa buri izooba, muguhitsye nk'oku mubaire nimugukora mwine embuba. 14Reero abeemererezi b'Abaisiraeli abu baanyampara ba Faraaho baabataireho, baateerwa kandi baabuuzibwa bati: Ahabw'enki omurimo gwanyu gwa nyomwabazyo n'ogw'eri izooba ogw'okubumba amatafaari mutaguhikize nk'oku mubaire nimukora?
15Bwanyima abeemererezi b'Abaisiraeli baayetuurira Faraaho, baayetonganira bati: Ahabw'enki nootutwaza otyo, itwe abaheereza baawe? 16Itwe abairu baawe tibarikutuha mbuba kandi batugira bati: Mubumbe amatafaari. Bataho n'okututeera, itwe abaheereza baawe, haza orubanja ruri orw'abantu baawe. 17Kwonka we abagarukamu ati: Timwine ki murikukora, timwine ki murikukora! Nikyo murikugirira muti: Oturekye tugyende tuze kutambira Mukama ekitambo. 18Nimwirooko muze kukora; kandi tihariho orikwija kubaha embuba, haza nimwija kuguma nimuhitsya omubaro gw'amatafaari gu mwacwereirwe.
19Abeemererezi b'Abaisiraeli ku baabagambiire bati: Timurikwija kucwerwaho na kakye aha mubaro gw'amatafaari gaanyu aga buri izooba, baamanya ku bari omu kabi. 20Ku baahikire Musa na Arooni abaabaire babategyereize nibaruga kureebana na Faraaho, 21baabagira bati: Nyakubaho naakabareebe, akabacwera orubanja, ahabw'okuba niimwe mureeteire Faraaho n'abashaija be kutugwerwa kubi, bakakwata rurara kwenda kutwita. 22Musa nikwo kugaruka ahari Nyakubaho akamweshengyereza ati: Ai Nyakubaho, aba bantu baawe obatuzire ki? Mbwenu okaba wantumira ki? 23Manya naaba kwija ahari Faraaho kumugambira omu iziina ryawe, abakozire kubi, kandi naiwe tiwaagira bu obajunire n'akakye.
Ruhanga okuhamiza Musa ku ariiha Abaisiraeli omu buhuuku
Currently Selected:
Kur 5: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
