Kur 37
37
1Bezaleeli akakora eshanduukye y'endagaano omu mbaaho z'omusisa, oburaingwa bwayo mikono ebiri n'ekicweka, obukiizi bwayo mukono gumwe n'ekicweka, n'obwemi bwayo mukono gumwe n'ekicweka. 2Kandi yaagihumbika ezaabu empuuhe omunda n'enyima; yaagitaho omugoma gw'ezaabu kugyehinguririza. 3Yaagiheeshera ebifunga bina by'ezaabu by'okuta aha nshonda zaayo ina; bibiri aha rubaju orumwe n'ebindi aha rundi. 4Yaakora n'emigamba omu rubaaho rw'omusisa, yaagihumbika ezaabu. 5Emigamba yaagishoka omu bifunga by'omu mbaju z'eshanduukye, kuguma nibagigiheekyesa. 6Reero yaakora ekitebe ky'okusaasira ky'ezaabu empuuhe, ky'oburaingwa bwa mikono ebiri n'ekicweka n'obukiika bwa mukono gumwe n'ekicweka. 7Kandi yaakora ebishushani bya baakerubi bibiri, biheesirwe omu zaabu; yaabita aha miheru yombi ey'ekitebe ky'okusaasira: 8kerubi omwe aha muheru gumwe, na kerubi ondi aha gundi. Haza baakerubi abo yaabaheesherana n'ekitebe ky'okusaasira aha miheru yaakyo. 9Baakerubi abo bakaba bashashanwire amapapa gaabo ahaiguru, bagasangiize ekitebe ky'okusaasira nibareebana boorekyeire ekitebe ky'okusaasira.
Okukora emeeza
10Bezaleeli akakora emeeza omu mbaaho z'omusisa y'oburaingwa bwa mikono ebiri, obukiika bwa mukono gumwe, n'obwemi bwa mukono gumwe n' ekicweka. 11Yaagihumbika ezaabu empuuhe, yaagitaho omugoma gw'ezaabu kugyehinguririza. 12Reero yaagikorera orubazi rw'obukiika bw'ekita kimwe rwagyehinguririza; kandi orwo rubazi yaarukoreraho omugoma gw'ezaabu gwarwehinguririza. 13Egyo meeza yaagiheeshera ebifunga bina by'ezaabu, yaabita aha nshonda ina ez'aha maguru gaayo ana. 14Ebifunga bikaba bihikaine n'orubazi, biri eby'okushokwamu emigamba y'okuheekyesa emeeza. 15Emigamba akagikora omu mbaaho z'omusisa, yaagihumbika ezaabu. 16Reero yaakora ebintu omu zaabu empuuhe eby'okuta aha meeza, eshuhaani zaayo n'eby'okwotereraho obubaani, n'ebakuri n'engyemeko z'okushukisa ebyokunywa ebihongirwe.
Okukora ekikondo ky'etabaaza
17Kandi akakora ekikondo ky'etabaaza omu zaabu empuuhe. Ekibunu n'omukono gwakyo bikaba biheesirwe, ebikopo byakyo n'entwe zaakyo n'ebirabyo byakyo biheesherainwe nakyo. 18Kiine amataagi mukaaga agataagwize aha mbaju zaakyo: ashatu aha rubaju rumwe, n'agandi ashatu aha rundi. 19Ebikopo byakyo ebyemi nk'amatunguru, buri kimwe kiriho entwe n'ekirabyo aha itaagi rimwe; n'ebindi bikopo bishatu nabyo ebyemi nk'amatunguru, buri kimwe kiine entwe n'ekirabyo aha rindi itaagi. Goona amataagi mukaaga, agataagwize ahari ekyo kikondo, gaaba nikwo gaaba. 20Kandi ahari ekyo kikondo hakaba hariho ebikopo bina ebikozirwe nk'amatunguru, biriho entwe n'ebirabyo; 21haza entwe eheesheraniirwe ahansi ya buri mataagi abiri ag'ago omukaaga agarikukitaaguzaho. 22Entwe zaabyo n'amataagi gaabyo bikaba biheesherainwe nakyo; kyona kiheesheirwe kimwe omu zaabu empuuhe. 23Reero yaakiheeshera amatabaaza mushanju n'empana n'obubangari, biri eby'ezaabu empuuhe. 24Ekyo kikondo n'ebirikukikoresibwaho akabikoresa ezaabu empuuhe y'oburemeezi bwa kiloguraamu makumi abiri na ishatu.
Eitambiro ry'okwotereraho obubaani
25Akakora eitambiro ry'okwotereraho obubaani omu mbaaho z'omusisa ry'oburaingwa bwa mukono gumwe n'obukiika bwa mukono gumwe, niringana embaju zoona ina, n'obwemi bwaryo buri mikono ebiri; kandi amahembe gaaryo gabaijerainwe naryo. 26Yaarihumbika ezaabu empuuhe aha mutwe gwaryo n'omu mbaju zaaryo kuryehinguririza, n'aha mahembe gaaryo; kandi yaarikorera omugoma gw'ezaabu guryehinguririize. 27Reero yaariheeshera ebifunga bibiri by'ezaabu, ahansi y'omugoma gwaryo aha mbaju zaaryo zombi ezirikureebana, kuba eby'okurabyamu emigamba y'okuriheekyesa. 28Egyo migamba yaagibaija omu mbaaho z'omusisa, haza yaagihumbika ezaabu.
29Kandi yaakora amajuta g'okusiiga eby'okweza, n'obubaani burikutaamirana omugaju nk'oku bujwangibwa omunyamyoga w'emigaju.
Eitambiro ry'ebitambo by'okucwetsya
Currently Selected:
Kur 37: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
