Kur 36
36
1Mbwenu Bezaleeli na Oholiyaabu na buri munyamyoga ou Nyakubaho yaahaire obwengye n'okwetegyereza, kumanya oku baraakore ibara murimo gw'okwombeka Obutaaho burikwera, bakore nibakuratira byona ebi Nyakubaho aragiire.
Musa okuzibira abantu kureeta emitoijo
2Musa akeeta Bezaleeli na Oholiyaabu n'abantu boona abu Nyakubaho yaahaire ebiteekateeko by'obwengye, weena owaagizire omuhimbo, kwija kukora ogwo murimo. 3Mpaho Musa yaabaha ebihongwa byona ebi Abaisiraeli baabaire bareetsire beekundiire, kukoresa omurimo gw'okwombeka Obutaaho oburikwera. Kandi buri kasheeshe baaguma nibamureetera ebihongwa ebi beekundiire. 4Reero ekyo kyareetera abantu boona abanyabwengye, abaabaire nibakora buri murimo gw'okwombeka Obutaaho, kwija buri omwe kuruga aha murimo gu yaabaire naakora, 5bakagambira Musa bati: Abantu nibareeta ebintu bingi ebirikukira ebirikwetengwa kukoresa omurimo gu Mukama yaaturagiire kukora. 6Musa atyo aragiira, ekigambo kirangirirwa omu rusiisira rwona, kiti: Hatagira omushaija nari omukazi owaayongyera kugira eki yaatoija ahabw'okwombeka obutaaho oburikwera. Batyo abantu bazibirwa kwongyera kureeta ekintu kyona; 7ahabw'okuba ebi baabaire baine bikaba nibimara kukora ogwo murimo gwona n'okushaaga.
Okwombeka Obutaaho oburikwera
8Mpaho abanyamyoga boona ab'omuri abo bakozi baakoresa Obutaaho emikingo ikumi, eyaakozirwe omuri kitaani enungi erukirwe enyabubiri, n'omu myenda ya bururu n'eya bujwa n'eya karari, bagicwererainemu ebishushani bya baakerubi ababaiziirwe omu buringaringo. 9Oburaingwa bwa buri mukingo bukaba buri mikono ikumi; obukiizi bwayo buri mikono ena buri gumwe, kandi emikingo yoona neingana.
10Reero emikingo etaano yaagiteerana okwayo, n'endiijo etaano okwayo. 11Haza aha mukugiro gw'omukingo ogurikuhereerukayo, ogw'emikingo y'okubanza eteerainwe, yaagutaho empuruuturizo za bururu; yaaba nikwo yaazita n'aha mukugiro gw'omukingo ogurikuhereerukayo ogw'emikingo ya kabiri eteerainwe.
12Aha mukingo gumwe yaataho empuruuturizo makumi ataano, n'ezindi makumi ataano aha mukugiro gw'omukingo oguri aha mikingo ya kabiri eteerainwe; ezo mpuruuturizo nizireebana. 13Haza yaakora ebikwatsi by'ezaabu makumi ataano, yaabikwatanisisa emikingo; obutaaho bwona bwaba bumwe.
14Reero kandi yaakora omu bwoshe bw'embuzi emikingo y'eihema ry'okusangira Obutaaho. Yaakora emikingo ikumi na gumwe. 15Oburaingwa bwa buri mukingo bukaba buri mikono makumi ashatu, obukiizi bwa buri gumwe mikono ena, kandi egyo mikingo ikumi na gumwe neingana. 16Emikingo etaano yaagiteerana okwayo, n'omukaaga okwayo. 17Reero yaakora empuruuturizo makumi ataano aha mukugiro gw'omukingo ogurikuhereerukayo, ogw'emikingo emwe eteeraine; n'ezindi makumi ataano aha mukugiro gw'ogundi mukingo, ahi yombi erikukwatanira. 18Kandi yaakora ebikwatsi makumi ataano by'emiringa kukwatanisa Eihema, ryona ribone kuba rimwe. 19Yaakorera eryo ihema empu z'engondoore z'entaama n'ez'embuzi kurisangira.
20Bwanyima omu mbaaho z'emisisa yaakoramu emyango y'okwemereza Obutaaho. 21Buri mwango gwine oburaingwa bwa mikono ikumi, n'obukiizi bwa buri mwango buri mukono gumwe n'ekicweka. 22Buri mwango gukaba guriho endimi ibiri z'okugushoka omu gundi, haza emyango y'Obutaaho yoona nikwo yaagikozire. 23Egyo myango y'obutaaho akagikora ati: Emyango makumi abiri yaaba ey'aha rubaju rw'obukiizi-bwa-buryo, 24kandi yaakora ebiina makumi ana by'efeeza ahansi y'egyo myango makumi abiri: ebiina bibiri ahansi y'omwango gumwe, ahabw'endimi zaagwo ibiri n'ebindi biina bibiri ahansi y'ogundi mwango, ahabw'endimi zaagwo zombi. 25Aha rundi rubaju rw'Obutaaho orw'aha bukiizi-bwa-bumosho, yaakoraho emyango makumi abiri, 26n'ebiina byayo makumi ana by'efeeza, ebiina bibiri ahansi y'omwango gumwe, n'ebindi bibiri ahansi y'ogundi. 27Reero aha rubaju rw'enyima orw'Obutaaho, embari ya burengyerwa-izooba, yaakorayo emyango mukaaga. 28Kandi oburugu bw'Obutaaho obw'omu rubaju rw'enyima yaabukorera emyango ebiri. 29Egyo myango ahansi etaine, kwonka aha mutwe ekwataniire aha mpeta y'okubanza; haza yombi nikwo yaagikozire ahabw'oburugu bwombi. 30Ekaba eri emyango munaana, erimu ebiina byayo by'efeeza; ebiina ikumi na mukaaga, buri mwango ahansi yaagwo gwine ebiina bibiri.
31Yaakora embazi z'omusisa itaano z'aha mbaaho z'orubaju rumwe rw'Obutaaho; 32n'ezindi itaano z'orundi rubaju rwabwo; kandi ezindi itaano ez'aha mbaaho z'orubaju rw'enyima orurikureeba burengyerwa-izooba. 33Bwanyima yaakora orubaju rw'ahagati y'ezindi, rwayogamu okwiha aha muheru ogumwe okuta aha gundi, obwemi bwarwo bwahika rwagati y'embaaho. 34Reero ezo mbaaho yaazihumbika ezaabu, kandi yaazikorera empeta z'ezaabu z'okukwata embazi; haza ezo mbazi yaazihumbika ezaabu.
Omukingo
35Akakora omukingo gw'emyenda ya bururu n'eya bujwa n'eya karari n'eya kitaani enungi erukirwe enyabubiri; yaagitamu ebishushani by'Abakerubi ebitariizwemu abanyamyoga. 36Kandi yaagukorera enyomyo ina z'omusisa z'okuguhanikaho; yaazihumbika ezaabu; ebikwatsi byazo nabyo biri eby'ezaabu. Atyo enyomyo yaazibyara omu biina biheesirwe omu zaabu. 37Yaakora omukingo gw'okuta aha muryango gw'Eihema gw'emyenda ya bururu n'eya bujwa n'eya karari n'eya kitaani enungi erukirwe enyabubiri kandi etariizwemu ebicwererane; 38gwine enyomyo itaano eziriho ebikwatsi byazo. Yaahumbika emitwe yaazo ezaabu n'ebifunga byazo byaba eby'ezaabu; kwonka ebiina byazo bitaano byaba eby'omuringa.
Bezaleeli okukora eshanduukye y'endagaano
Currently Selected:
Kur 36: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
