Kur 32
32
1Abantu ku baareebire Musa yaatuuraho kushuuma kuruga aha rushozi, baayeteeranira ahari Arooni, baamugira bati: Imuka, otukorere ruhanga oraatwebembere; ahabw'okuba Musa owaatwihire omu nsi ya Misiri titurikumanya oku abaire. 2Arooni nawe abagira ati: Nimujuure empeta z'ezaabu eziri aha matu g'abakazi baanyu na batabani baanyu na bahara baanyu, muzindeetere. 3Mpaho abantu boona bajuura empeta ezaabaire ziri aha matu gaabo, bazireetera Arooni. 4Atyo azibaiha omu ngaro, azishemeza n'ekyoma kirikusharura, aziheeshamu ekimasha. Haza bagira bati: Iwe Isiraeli, ogu niwe ruhanga waawe owaakwihire omu nsi ya Misiri. 5Arooni ku yaakireebire, yaayombeka eitambiro omu maisho gaakyo, yaaranga naagira ati: Nyencakare nikiba ekiro ky'obugyenyi bwa Nyakubaho. 6Ku bwaseesire baimuka kare, baatamba ebitambo by'okucwetsya, baahonga empongano z'okusiima ahabw'obusingye, bwanyima abantu baashutama, baarya baanywa, reero baimuka kuzaana.
Ruhanga okugwerwa kubi Abaisiraeli
7Nyakubaho akagambira Musa ati: Irooko oshuume; ahabw'okuba abantu abu waihire Misiri beesiisire. 8Barahukire kutaishuka omuhanda gu naabaragiire kutoora, baayeheeshera omu zaabu ekishushani ky'ekimasha, baakiramya kandi baakitambira ebitambo, haza baagira bati: Iwe Isiraeli 'we, ogu niwe ruhanga waawe owaakwihire omu nsi ya Misiri! 9Reero Nyakubaho agira Musa ati: Nyetegyereize aba bantu, naamanya ku bari entahurira. 10Mbwenu reka ekiniga kyangye kibabugumeho; mbamareho. Haza mbe niiwe naihamu eihanga rihango.
11Kwonka Musa yaayeshengyereza Mukama Ruhanga we, naagira ati: Ai Nyakubaho, mbwenu ekiniga kyawe kikaabugumira ki ahari aba bantu baawe, abu waihiise Misiri obushoboorozi bwawe, n'omukono gwawe gw'amaani? 12Ekyo shi, tikikaareetera Abanyamisiri kugira bati: Biri kwo akakikora nkana kubaihayo, ngu abaitire omu nshozi, abamare omu nsi? Mbwenu reka kugira ekiniga kingi, oikaikane, orekye kucwekyereza aba bantu baawe. 13Ijuka Aburahamu, Isaaka na Yakobo abaheereza baawe abu waayerahiriire wenka, okabagira oti: Ndyakanyisa baijukuru baanyu babe baingi nk'enyonyoozi z'omu iguru, kandi egi nsi yoona ei naaraganiise ndyagiha baijukuru baanyu, ebe eyaabo y'obuhunguzi ebiro byona. 14Nyakubaho atyo aikaikana, areka akabi aku yaabaire ateekateekire kukora aha bantu be.
Musa okwata ebishate by'amabaare g'eiteeka
15Mpaho Musa ahinduka, ashuuma naaruga aha rushozi aine omu ngaro ze ebishate bibiri by'amabaare g'eby'obuhamya ebyabaire bihandiikirwe embaju zombi aha rubaju rumwe n'aha rundi. 16Ebyo bishate bikaba bikozirwe Ruhanga kandi abyehandiikiireho n'omukono gwe; obuhandiikye busharwirwe ahari ebyo bishate. 17Yoshwa ku yaahuriire orwari rw'abo bantu nibayogoorikana, yaagambira Musa ati: Omu rusiisira hariyo orwari rw'ab'omu rugamba. 18Musa amugira ati: Ago ti maraka g'okuyogoorikana kw'abasingwire nari ag'okuborooga kw'abasingwirwe, kureka agu ndikuhurira n'ag'abarikweshongora. 19Mbwenu Musa ku yairiire ati haihi n'orusiisira, yaareeba ekyo kimasha n'abarikutaagurira, ekiniga kyamucwa amaraka; yaatambika ebishate bi yaabaire aine omu ngaro, yaabyatira omu mizi y'orwo rushozi. 20Yaihaho ekyo kimasha ki baabaire bakozire, yaakyotsya, yaakicwa obusasingo, yaabumemeerera aha maizi, yaaganywaisa Abaisiraeli.
21Reero Musa yaagira Arooni ati: Aba bantu bakugizire bata, waaza kubareetera kukora ekibi kihango kityo? 22Arooni amugarukamu ati: Mukama wangye otangirira ekiniga, noomanya aba bantu ku bari endahukirwa y'okukora ekibi. 23Manya bangizire bati: Tukorere ruhanga oraatwebembere; ahabw'okuba Musa owaatwihire omu nsi ya Misiri titurikumanya oku abaire. 24Naanye naabagira nti: Weena ojwaire eky'ezaabu akijuure. Batyo nabo baabimpa, naanye naabinaga omu iziiko, byarugwamu eki kimasha.
Abaleevi okugira omuhimbo
25Musa ku yaareebire abo bantu bagomire (ahabw'Arooni kubareka bakahemukira omu bazigu baabo); 26Musa ogwo nikwo kwemerera aha irembo ry'Orusiisira, akagira ati: Weena ori aha rubaju rwa Nyakubaho, aije ahi ndi! Mpaho Abaleevi boona baayeteeranira ahu ari. 27Nawe yaabagira ati: Mukama Ruhanga wa Isiraeli naagira ati: Buri muntu ahagatire rurara ye, akore oku n'oku naaruga aha irembo naaza aha rindi omu rusiisira rwona; haza buri muntu aite mwene ishe, buri muntu aite mugyenzi we, na buri muntu aite mutaahi we, 28Abaleevi nabo baatwaza nk'oku Musa yaabagambiire. Eryo izooba baita omuri abo bantu abashaija enkumi ishatu. 29Bwanyima Musa yaagira ati: Eri izooba mwayehayo kukorera Nyakubaho omurimo gw'obuhongyerezi: omwe kwita omutabani, ondi akaita mwene ishe, ngu Nyakubaho abone kubaha omugisha eri izooba.
Musa okugaruka kushabira Abaisiraeli
30Omu kasheeshe kaakuratsireho Musa yaagambira abo bantu ati: Mukozire ekibi kihango. Mbwenu hati naaza kwinamuka owa Nyakubaho, obundi nkaabaasa kukarabira ekyo kibi kyanyu. 31Mpaho Musa agarukayo ahari Nyakubaho, agira ati: Ai bambe; aba bantu ka bakozire ekibi kihango kwekorera ruhanga w'ezaabu. 32Mbwenu naakweshengyereza obasaasire ekibi kyabo. Reero ku oraabe otakibasaasire, onyihe omu kitabo kyawe eki waahandiikire. 33Haza Nyakubaho agira ati: Weena oncumwireho, niwe ndaihe omu kitabo kyangye. 34Mbwenu irooko oyebembere abo bantu, obahitsye omu mwanya gu naakugambiire. Reero maraika wangye naija ahonaaho kukwebembera. Kwonka aha izooba ri ndaizireho, niinyija kubafubira nimbatura ekibi kyabo. 35Mpaho Nyakubaho aitsa abo bantu orufu, naabatura ekimasha eki Arooni yaabaheesheire.
Abaisiraeli okuragiirwa kwimutsya orugyendo
Currently Selected:
Kur 32: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
