Kur 30
30
1Okore eitambiro ry'okwotereraho obubaani, haza orikore omu muti gw'omusisa. 2Oburaingwa ribe mukono gumwe, n'obukiika mukono gumwe, kandi ringane embaju zaaryo ina; reero obwemi bwaryo bube mikono ebiri. Amahembe gaaryo gabaijeranwe naryo. 3Orihumbikye ezaabu empuuhe aha mutwe gwaryo n'omu mbaju zaaryo okuryehinguririza, n'aha mahembe gaaryo; kandi oriteho omugoma gw'ezaabu guryehinguririze. 4Orikorere ebifunga bibiri by'ezaabu, obite ahansi y'omugoma gwaryo aha mbaju zaaryo zombi ezishungaine, zibe ez'okutamu emigamba y'okuriheekyesa. 5Egyo migamba ogibaije omu muti omusisa, kandi ogihumbikye ezaabu. 6Reero eitambiro orite omu maisho g'omukingo ogukingiire eshanduukye y'eby'obuhamya, erikureebana n'ekitebe ky'okusaasira ekishwekire eby'obuhamya, ahi ndaabugabuganire naiwe. 7Ahari eryo itambiro niho Arooni ariguma naayoterera obubaani burikutaamirana omugaju. Buri kasheeshe, ku ariba naashemeza amatabaaza, abwotere. 8Kandi Arooni ku ariba naahemba amatabaaza omu mwabazyo, nabwo abwotere. Bube obubaani oburiguma nibwotererwa omu maisho ga Nyakubaho omu busingye bwanyu bwona. 9Mutariryotereraho obubaani burikuzira, nari okuryokyezaho ekitambo ky'okucwetsya, nobu kyakuba eky'esaano nainga okurishukaho ekitambo ky'ebyokunywa. 10Arooni aryaguma akarabire aha mahembe gaaryo, omurundi gumwe omu mwaka. Aryaguma arikarabirire n'eshagama y'ekitambo ky'okuhongyerera ebibi omurundi gumwe omu mwaka omu busingye bwanyu bwona. Eitambiro eryo n'eririkwera munonga, erishororeirwe Nyakubaho.
Omushoro gw'orubaro
11Nyakubaho akagambira Musa ati: 12Ku muriba nimubara Abaisiraeli, buri omwe aryaguma ahe Nyakubaho eky'okwecunguza mwaba nimubabara, ngu batakaaguubwamu orufu nimubabara. 13Weena oribarwa omuri orwo rubaro, ahe kimwe kya kabiri ky'eshilingi, nka shilingi ey'Omwanya Ogurikwera oku erikwingana omu buguzi (egyo shilingi erimu ebisente makumi abiri), ahe kimwe kya kabiri kyayo, kibe omutoijo gwa Nyakubaho. 14Weena oribarwa omuri orwo rubaro, oine emyaka makumi abiri y'obukuru nari okukiraho, ahe ogwo mutoijo gwa Mukama. 15Ekyo kimwe kya kabiri ky'eshilingi ku muriba nimukitoijera Nyakubaho kwekarabira, abatungi batarikirenzya n'abooro batarikituubya. 16Ezo mpiiha z'okwekarabira oryaguma oziihe aha Baisiraeli, kandi ozigire ez'okukoresa emirimo y'omu ihema ry'okubugabuganiramu zibone kwijutsya Nyakubaho Abaisiraeli, kandi zibe ekarabo y'amagara gaanyu.
Eby'ekinaabiro
17Nyakubaho akagambira Musa ati: 18Kandi okore ekinaabiro ky'omuringa, ekibunu kyakyo nakyo kiri eky'omuringa, kibe eky'okunaabiramu. Haza okite ahagati y'eihema ry'okubugabuganiramu n'eitambiro, okitemu amaizi 19agu Arooni n'abatabani baraagume nibanaabisisa engaro zaabo n'ebigyere byabo. 20Ku bariba nibaataaha omu ihema ry'okubugabuganiramu, nari nibaza kuhika eitambiro kuheereza, kwokyeza Nyakubaho ekitambo, banaabe ago maizi batakaafa. 21Baryaguma banaabe engaro zaabo n'ebigyere byabo batakaafa. Ekyo kibe ekiragiro eki bateereirweho ebiro byona, nangwa na Arooni n'abaijukuru, omu busingye bwabo bwona.
Eby'amajuta g'okusiiga
22Nyakubaho kandi akagambira Musa ati: 23Gira eby'emigaju ebirikuhita ebindi byona: Entsinda y'amaizi eya guraamu magana ataano, na kimwe kya kabiri ky'ezo guraamu ky'omugyeegye gw'omugaju gurikutaamirana: nizo guraamu magana abiri na makumi ataano; 24n'omurama gwa guraamu magana ataano, nk'oku guraamu y'Omwanya Ogurikwera eri; kandi n'ecupa y'amajuta g'emioliva, 25ebyo byona obikoremu amajuta agarikwera ag'okusiiga agatobagiirwe, nk'oku omunyamyoga w'eby'emigaju agira, gabe amajuta garikwera ag'okusiiga. 26Reero ogasiigye eihema ry'okubugabuganiramu, eshanduukye y'eby'obuhamya, 27n'emeeza, na byona ebyayo ebirikukoresibwa, n'ekikondo ky'etabaaza n'ebyakyo ebirikukoresibwa, otaireho n'eitambiro ry'okwotereraho obubaani, 28n'eitambiro ry'ebitambiro by'okucwetsya, na byona ebirikurikoresibwaho; n'ekinaabiro hamwe n'ekibunu kyakyo. 29Obyeze, bibeere kimwe ebirikwera, na kyona ekiraabikoreho kibe ekirikwera.
30Mpaho osiigye Arooni n'abatabani, obeeze, babone kumpeereza bari abahongyerezi. 31Kandi ogambire Abaisiraeli oti: Ago nigo majuta gangye agarikwera, agariguma nigasiigwa omu busingye bwanyu bwona; 32gatarishukwa aha mibiri y'abantu ab'obutoosha, kandi otarikora agandi agajwangiibwe nkago; n'agarikwera, kandi naimwe garyababeera agarikwera. 33Weena orijwanzya agarikushushana nago, nari origeesiiga ataine kakwate nago, acuubwe omu ihanga rye.
Eby'okujwanzya omu bubaani
34Kandi Mukama akagambira Musa ati: Gira eby'omugaju murungi: obunyaanunga, butabuta, n'enkuzi eby'emigaju mirungi, hamwe n'obubaani empuuhe, byona ebirikwingana, 35haza obikoremu obubaani bujwangiibwe omunyamyoga w'emigaju, burungirwemu omwonyo, oburi empuuhe kandi oburikwera. 36Reero obumwe aharibwo obuhonde obunozye, ekicweka kyabwo okite omu maisho g'eby'Okuhamya omu ihema ry'okubugabuganiramu, ahi ndaabugabuganire naimwe, haza naimwe buryababeera oburikwerera kimwe. 37Kandi obwo bubaani bu oraakore nookuratira eby'okubujwanzya, mutaribukora ngu bube obwanyu bw'okukoresa; kureka bubabeere oburikwera, obwereziibwe Nyakubaho. 38Weena orikora oburikushushana nabwo kubukoresa nk'omugaju, acuubwe omu ihanga rye.
Okutoorana ab'okukora Omwanya Ogurikwera
Currently Selected:
Kur 30: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
