Kur 25
25
1Nyakubaho akagambira Musa ati: 2Gambira Abaisiraeli bantoijere emitoijo; kandi naimwe mwakiire omutoijo ogu omuntu weena arantoijere ayekundiire. 3Mbwenu egi niyo mitoijo ei baraabareetere mukaakiira: ezaabu, efeeza n'emiringa; 4emyenda ya bururu n'eya bujwa n'eya karari n'eya bafuta enungi erukirwe enyabubiri, obwoshe bw'embuzi; 5empu z'embuzi, embaaho z'emisisa, 6amajuta g'etabaaza, eby'emigaju eby'okuta omu majuta g'okusiiga, n'obubaani burikutaamirana omugaju; 7amabaare agarimu erangi zitarikushushana, n'agandi mabaare g'okuhundisa ekitaahiro ekirikwetwa Efodi n'eky'aha kifuba. 8Kandi bankorere Omwanya Ogurikwera, mbone kubatuuramu. 9Haza ogwo mwanya gurikwera n'ebi muraaguhundise, mugukore nk'oku ndaakworekyerere.
Eshanduukye y'endagaano
10Baije bankorere eshanduukye ebaizirwe omu mbaaho z'omusisa. Ebe ey'oburaingwa bwa mikono ebiri n'ekicweka, obukiika bwayo mukono gumwe n'ekicweka kandi obwemi bwayo mukono gumwe n'ekicweka. 11Haza mugihumbikye omunda n'aheeru ezaabu empuuhe, kandi yoona okugyehinguririza mugihundise omugoma gw'ezaabu. 12Oije ogiyagize ebifunga bina by'ezaabu, obite aha maguru gaayo ana: bibiri aha rubaju rwayo orumwe, n'ebindi bibiri aha rundi. 13Oije okore emigamba omu muti gw'omusisa, nayo ogihumbikye ezaabu. 14Reero egyo migamba ogishensheze omu bifunga by'omu mbaju z'egyo shanduukye, kuguma nibagigiheekyesa. 15Emigamba egume omu bifunga by'eshanduukye; bataribigiihamu. 16Kandi egyo shanduukye otemu Obuhamya bu ndaakuhe. 17Bwanyima ogikoreho ekitebe ky'okusaasira ky'ezaabu empuuhe, ky'oburaingwa bwa mikono ebiri n'ekicweka, n'obukiika bwa mukono gumwe n'ekicweka. 18Reero okore baakerubi abaheesirwe omu zaabu, haza obate aha mutwe n'aha bigyere by'ekyo kitebe ky'okusaasira. 19Kora kerubi omwe aha muheru ogumwe, na kerubi ondi aha gundi. Baakerubi abo, mubaheesherane n'ekyo kitebe ky'okusaasira aha miheru yaakyo yombi. 20Baakerubi abo babe bashashanwire amapapa eruguru, bagashangiize ekitebe ky'okusaasira, boorekyeraine nibareeba ekyo kitebe. 21Mpaho ekitebe ky'okusaasira okitungikye aha shanduukye, kandi omu shanduukye otemu eby'obuhamya ebi ndaakuhe. 22Naanye aho niho ndiguma nimbugaabuganira naiwe, niinyema ahaiguru y'ekitebe ky'okusaasira, ahagati ya baakerubi bombi abari aha shanduukye y'eby'obuhamya, nkagamba naiwe byona ebi ndiguma ninkuragiira kugambira Abaisiraeli.
Eby'emeeza y'emigaati y'okumurikwa
23Kandi oryakora emeeza omu muti gw'omusisa, ebe eya mikono ebiri omu buraingwa, mukono gumwe obukiika, na mukono gumwe n'ekicweka obwemi. 24Ogihumbikye ezaabu empuuhe, kandi ogiteho omugoma gw'ezaabu okugyehinguririza. 25Haza oryakora orukomantiriro rw'ekita kimwe omu bukiizi rugyehinguririze, n'omugoma gw'ezaabu gwehinguririze orwo rukomantiriro. 26Reero oryagitaho ebifunga bina by'ezaabu, haza obikore bihamiire aha nkokora ina ez'aha maguru gaayo ana. 27Ebifunga ebyo bihikaane n'orukomantiriro, bibe eby'okushokamu emigamba y'okuheeka emeeza. 28Oryakora emigamba omu muti gw'omusisa, ogihumbikye ezaabu, ebe niyo baaguma nibaheekyesa emeeza. 29Kandi okore eshuhaani zaayo; n'eby'okwotereraho obubaani, n'engyemeko n'ebakuri eby'okushukisa empongano z'okunywa. Haza ebyo obikore omu zaabu empuuhe. 30Mpaho ogume ote ahari egyo meeza emigaati y'okumurikwa, egume eri omu maisho gangye obutoosha.
Eby'ekikondo ky'etabaaza
31Oryakora ekikondo ky'etabaaza omu zaabu empuuhe. Ekibunu na rwagati y'ekyo kikondo ky'etabaaza bibe ebiheesirwe; kandi ebikopo byayo n'amatangi gaayo n'ebirabyo byayo bibe biheesherainwe nakyo. 32Mpaho kigire amataagi mukaaga gataagwize oku n'oku; amataagi ashatu aha rubaju rumwe, n'agandi ashatu aha rundi. 33Ahari ekyo kikondo ky'etabaaza habeho ebikopo bishatu ebyemi nk'amatunguru, buri kimwe kiine omugina n'ekirabyo aha itaagi rimwe, kandi n'ebindi bikopo bishatu ebikozirwe nk'emigina y'amatunguru biine omugina n'ekirabyo aha rindi itaagi. Haza amataagi goona omukaaga agarikutaaguza aha kikondo ky'etabaaza gabe nikwo gaaba. 34Kandi ahari ekyo kikondo ky'etabaaza habeho ebikopo bina ebikozirwe nk'emigina y'amatunguru, biriho emigina yaabyo n'ebirabyo. 35Reero habeho omugina oguheesheraniirwe ahaifo ya buri mataagi abiri ag'ago omukaaga agataagwize ahari ekyo kikondo ky'etabaaza. 36Emigina yaabyo n'amataagi gaabyo biheesheranwe nakyo. Mpaho ekyo kikondo kyona kibe ekiheesirwe omu zaabu empuuhe. 37Kandi okikorere amatabaaza mushanju. Haza ago matabaaza gateebweho kumurikira omwanya oguri omu maisho gaakyo. 38Empana zaago n'obushohaani bwazo bibe eby'ezaabu empuuhe. 39Ekyo kikondo n'ebyo byona ebirikukoresibwa biheeshwe omu zaabu empuuhe ey'oburemeezi bwa kiloguramu 23. 40Haza oreebe ngu waabikora nookuratira eky'okureeberaho kyabyo eki oyorekyeirwe aha rushozi.
Okukora obutaaho
Currently Selected:
Kur 25: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
