Kur 24
24
1Nyakubaho akagira Musa ati: Inamuka ahi ndi, oine Arooni na Nadabu na Abiihu hamwe n'abakuru ba Isiraeli makumi mushanju; haza mundamize hangahari. 2Iwe Musa wenka obe niiwe waanyirira haihi, kwonka abandi batahika haihi, n'abantu batainamukayo.
3Musa atyo aija, agambira abo bantu ebi Nyakubaho yaagamba n'ebi yaaragiira. Abantu boona bagarukamu n'eiraka rimwe nibagira bati: Byona ebi Nyakubaho yaagamba nitwija kubikora. 4Musa nawe ahandiika ebi Nyakubaho yaagamba. Reero aimuka kare omu kasheeshe, ayombeka eitambiro omu mizi y'orushozi, n'enyomyo ikumu na ibiri, nk'enganda ikumu na ibiri za Isiraeli oku ziri. 5Mpaho atuma abatsigazi b'Abaisiraeli bahongyera Nyakubaho ebitambo by'okucwetsya, kandi bamutambira ebitambo by'ente ebyokurya kumwe. 6Musa atyo acwa kabiri eshagama, agishuka omu nyabya; ekicweka kyayo akimiisiira eitambiro. 7Bwanyima aihayo ekitabo ky'Endagaano akishoma abantu boona bategire amatu. Haza bagira bati: Byona ebi Nyakubaho yaagamba nitwija kubikora, kandi nitwija kuba abantu abarikuhurira. 8Musa atyo aihayo eshagama, agimiisiira abo bantu, naagira ati: Egi niyo shagama y'endagaano ei Nyakubaho yaaragaana naimwe nk'ebyagambwa ebyo byona oku biri.
9Bwanyima Musa na Arooni na Nadabu na Abiihu n'abakuru b'omu Baisiraeli makumi mushanju bainamuka, 10bareeba Ruhanga wa Isiraeli, ahansi y'ebigyere bye hariho nk'omwariro gw'amabaare ga bururu, garikumurinkana nk'eiguru. 11Haza abo bakuru b'omu Baisiraeli Ruhanga tagira oku yaabagira, kureka bamuhanga amaisho. Bwanyima barya kandi banywa.
Ebya Musa aha Rushozi Sinaayi
12Nyakubaho akagambira Musa ati: Inamuka onshangye aha rushozi, haza otegyererezeyo; niinyija kukuha ebishate by'amabaare, ebiriho amateeka n'ebiragiro ebi mpandiikire ngu mubibeegyese. 13Musa atyo aimuka n'omugaragwa we Yoshwa. Haza Musa ogwo ainamuka aza aha rushozi rwa Ruhanga. 14Reero agambira abo bakuru ati: Mututegyerereze aha okuhitsya obu turaagarukye tukabashangaho. Mbwenu reeba Arooni na Huuri babaine; oraabe aine ekimusaasize abeetuurire.
15Musa atyo atemba Orushozi, haza ekicu kirushweka. 16Reero ekitiinisa kya Nyakubaho kiza ahari orwo Rushozi Sinaayi, n'ekicu kirushweka okumara ebiro mukaaga. Aha kiro kya mushanju, Nyakubaho ayeta Musa naayema omuri ekyo kicu. 17Mbwenu obwo ekitiinisa kya Nyakubaho aha mutwe gw'orushozi Abaisiraeli bakakireeba nikishusha omuriro gurikurya busha. 18Mpaho Musa aburira omuri ekyo kicu, ainamuka omu kibungo. Haza Musa ogwo amara ahari orwo rushozi ebiro makumi ana nyomushana na nyekiro.
Eby'okuhunda Omwanya Ogurikwera
Currently Selected:
Kur 24: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
