Kur 22
22
1-4Omuntu ku ariiba ente nari entaama, yaagiita nari yaagitunda, arihe ente itaano ahabw'ente emwe, kandi entaama ina ahabw'entaama emwe. Arihe! Ku araabe ataine ki aine, atundwe ahabw'okwo kwiba kwe. Enyamaishwa eibirwe ku baraashangye ehuriire, kigiiba akigiine, yaaba nte nari endogoya nainga entaama, agirihe ibiri.
Omushuma ku barimushanga naafumura enju nyekiro, baamuteera yaafa, tihaine origiibwaho orubanja rw'okumwita. Kwonka ku arifumura enju bwaseesire, obwo orimwita aryagiibwaho orubanja rw'okwita.
5Omuntu ku aryonesa ekyeetwa omusiri nari ogw'emizaabibu, nainga yaatsibura amatungo ge gaayona omusiri gw'ondi, aryaguriha ebi ayerize omu musiri gwe ebirungi munonga, nari eby'omu musiri gwe gw'emizaabibu. 6Ku harigira omuriro gwashugyeera ekishugi, gwayotsya ebishaarwirwe aha mbuga, nari ebikiri omu musiri nainga ebigubyairwemu, kitweka ogwo muriro aryariha byona ebyasya.
7Omuntu ku aribiitsya mutaahi we empiiha nari ebintu kubimurindira, haza byaibirwa omu nju y'ogwo muntu, kibiiba ku arikwatwa arihe ebirikwingana nabyo emirundi ebiri. 8Kwonka kibiiba ku yaakuba atakwatsirwe, mukama w'egyo nju atwarwe omu maisho ga Ruhanga, arahire ku ebyo bintu bya mutaahi we atabikozireho na rukumu rwe.
9Manya okuryangatanisa kwona, yaaba kwa nte, kwa ndogoya, kwa ntaama, kwa kijwaro nari kwa ibara kintu ekibuzire, eki omuntu yaagira ati: Nikyo eki; orubanja rw'abo bantu bombi rureetwe omu maisho ga Ruhanga. Haza Ruhanga ou arisingisa orubanja, arihe mutaahi we emirundi ebiri.
10Omuntu ku arihereka mutaahi we endogoya nari ente nari entaama nainga enyamaishwa yoona kugimurindira, kwonka ekyo kitungirwe kyafa nari kyagira oku kyaba nainga kyatwarwa bwibwa hataine okireebire, 11bombi baryarahizibwa omu maisho ga Nyakubaho, kureeba yaaba onu ekyo kitungirwe kya mutaahi we atakikoreiseho rukumu. Reero mukama waakyo aikirize okurahira kwa kiherekwa, kandi obwo ori taririha. 12Kwonka ku bariba bagimwibireho, agirihe mukama waayo. 13Ku eririibwa enyamaishwa, areete ekiriira kyayo kumujurira, nabwo obwo taririha ekiriirwe.
14Omuntu ku aritiiza ekintu kya mutaahi we, kyagira oku kyaba, nari kyafa mukama waakyo atariho, kikitiizibwa aryakirihira kimwe. 15Mukama waakyo ku ariba ariho, obwo tarikiriha. Kandi ku kiriba kiguririirwe kiryagwana n'obuguzi bw'ebi baakiguririire.
Ebiragiro by'okutiina Ruhanga
16Omushaija ku aribeihabeiha omwishiki oshugaine otakagambirwe bugyenyi, yaabyama nawe, amujugye kandi amushwere. 17Ishe ku araayangire kimwe kumumuhingira, onu arihe empiiha nk'ezi bajuga abaishiki.
18Otariikiriza omurogikazi kugumaho.
19Weena oribyamisa enyamaishwa, aitwe.
20Weena oritambira ruhanga ondi ekitambo, atakitambiire Nyowe nyenka Nyakubaho, acwekyererezibwe kimwe.
21Otarikora kubi omunyamahanga, nobu kwakuba okumuhata. Manya naimwe mukaba muri abanyamahanga omu nsi ya Misiri. 22Otaribonabonesa omufaakazi nari efuuzi. 23Ku oribabonabonesa bantakira, buzimazima ndyahurira okutaka kwabo, 24kashanga encwe amaraka, mbaitse rurara, abakazi baanyu babe abafaakazi, n'abaana baanyu babe efuuzi.
25Ku origuza empiiha weena ow'omu bantu bangye, ori hamwe naiwe kandi ari omworo, otarimubeera nk'omugurize, kandi otarimwihaho ekiteebwamu. 26Mutaahi waawe ku arikukwatiriza omwenda gwe, ogumugarurire eizooba ritakarengire, 27ahabw'okuba nigwo ayeshweka kandi nigwo ayefubika. Mbwenu shi aryayeshweka ki? Haza ku arintakira, ndyamuhurira; ahabw'okuba Nyowe mba Omunyasaasi.
28Otarijuma Ruhanga, nobu kwakuba okukyeena omutegyeki w'eihanga ryawe. 29Otaryeganda kutoija emiganuro y'ebi oshaarwire, n'aha birugire omu manyuukiro gaawe. Oryaguma ompongyere batabani baawe b'emijigaijo. 30Kandi nikwo oritwaza ente zaawe n'entaama zaawe. Omujigaijo gwayo guryamara na nyinagwo ebiro mushanju; aha kiro kya munaana ogumpongyere.
31Naimwe muryaguma muri abantu bangye abaanyereziibwe. N'ahabw'ekyo mutarirya ebitaafura ebi enyamaishwa zitaanyaguriize omu ishwa. Muryaguma mubitambikire embwa.
Ebiragiro by'obwinganisa
Currently Selected:
Kur 22: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
