Kur 21
21
1Mbwenu ebi nibyo biragiro bi oraahe Abaisiraeli. 2Ku origura Omuheburaayo kuba omuhuuku waawe, akuheerereze emyaka mukaaga, omu gwa mushanju agyende n'obusingye, ataine ki ayecungwize. 3Ku ariba aizire ari wenka, agyende wenka. Ku ariija yaashweire, omukazi we aryagyenda nawe. 4Mukama we ku arimushwererera omukazi, onu yaamuzaarira abaana aboojo nari abaishiki, omukazi n'abaana be babe aba mukama w'ogwo mukazi, reero omuhuuku agyende wenka. 5Kwonka omuhuuku ku aryegambira butunu ati: Ninkunda mukama wangye n'omukazi wangye n'abaana bangye, tindikwenda kuruga mu buhuuku; 6obwo mukama we aryamumurikira Ruhanga, amuhitsye aha rwigi nari aha nti z'omuryango; amufumure okutu n'empindu, ogwo muhuuku agume naamukorera ebiro byona.
7Omushaija ku aritunda muhara we kuba omuzaana, atariruga omu buzaana nk'oku abahuuku abashaija batwaza. 8Ogwo muzaana ku ariba atagwisize gye mukama we owaamwetooraniire, obwo mukama we amurekye acungurwe. Kwonka tariikirizibwa kumuguza abanyamahanga, ahabw'okuba obwo naaba amukoreire ekitahikire. 9Reero ku araabe naamwendeza omutabani, atwaze ogwo muzaana nka muhara we. 10Ku arishwera ondiijo mukazi, atarituubya egabo y'ogwo muzaana n'ebijwaro bye, nobu kwakuba okumwitira embu z'okumuraarira. 11Mbwenu ku ariba atamukoreire ebyo byonshatu, ogwo muzaana agyende ataine ki ayecungwize n'eki azimwire.
Eby'okwita n'okuhutaaza omuntu
12Weena oriteera omuntu akamwita, nawe aitwe. 13Kwonka omuntu ku ariita ondi atamugwereire, beitu kyaruga ahari Ruhanga kumugwa omu mikono, ndyakuteeraho omwanya, ogu ashemereire kuhungiramu. 14Kwonka omuntu ku arigira enaama, yaita mugyenzi we nkana amureebize, omwihe nangwa n'aha itambiro ryangye, aitwe.
15Weena oriteera ishe nari nyina, aitwe.
16Weena oriiba omuntu akamutunda, nari bakashanga akimwine, aitwe.
17Weena orikyeena ishe nari nyina, aitwe.
18Abantu ku baritongana, omwe yaateera ondi eibaare nari entomi, kwonka ogwo muntu ataafa, kureka yaaguma aha kishego arwaire, 19kiteerwa ku ariimuka yaashotookyera aha kibango, kimuteera aihweho orubanja. Kureka arihe kiteerwa ebiro bi amwitiire, kandi amuragurize okuhitsya obu araakirire kimwe.
20Omuntu ku ariteera omuhuuku we nari omuzaana we, yaamuteeza enkoni, ogwo muhuuku yaamugwaho, onu afubirwe. 21Kwonka omuhuuku ku arimara ekiro kimwe nari bibiri atafiire, onu atafubirwa, ahabw'okuba ogwo muhuuku n'ekintu kye eki ayetungiire.
22Abantu ku baakurwana, baasaasa omukazi oine enda, enda yaarugamu, kwonka hataabaho kandi kabi, owamusaasa ahongyesibwe nk'oku iba w'ogwo mukazi araamurihise, kandi arihe nk'oku abaramuzi baraamucwere. 23Kwonka ku haakugira akabi kaarugamu, obwo amagara gazire agandi. 24Eriisho ririhwe eriisho, eriino ririhwe eriino, omukono gugwane n'omukono, ekigyere n'ekigyere; 25okwotsya kuhoorerwe okwotsya, obuhuta buhoorerwe obundi.
26Omuntu ku ariteera eriisho ry'omuhuuku we nari ery'omuzaana we yaariihamu, aryarekura ogwo muhuuku; okumurekura kube endihano y'eriisho rye. 27Ku aricwa eriino ry'omuhuuku we, omushaija nari omukazi, aryarekura ogwo muhuuku agyende ataine ki ayecungwize ahabw'eryo riino.
Ebiragiro ebikwatiraine n'enyamaishwa
28Ente ku ericumita omushaija nari omukazi yaamwita, egyo eteerwe amabaare, n'enyama y'egyo nte etaririibwa; kandi mukama waayo aryaba ataine rubanja. 29Kwonka egyo nte ku eraabe yaabaire neecumita, kandi mukama waayo baramweziniize haza ataagirinda, reero yaita omushaija nari omukazi, egyo nte eteerwe amabaare, na mukama waayo aitwe. 30Ku barimucwa eky'okwecungura, ahe kyona eki barimucwa kucungura amagara ge. 31Ente ku ericumita mutabani w'omuntu nari muhara we, mukama waayo nabwo atwazibwe nk'ekyo kiragiro oku kiri. 32Ente ku ericumita omuhuuku nari omuzaana, mukama waayo arihe mukama waabo ebicweka makumi ashatu by'efeeza, n'egyo nte eteerwe amabaare.
33Omuntu ku aritsiga ekiina kyashami, nari yaatimba ekiina ataakiigaza, reero ente nari endogoya yaakigwamu, 34mukama w'ekyo kiina aryagiriha; ahe mukama waayo empiiha, kandi omutumbi gw'egyo nyamaishwa gube ogwe.
35Ente y'omuntu ku ericumita ey'ondiijo yaagiita, baryatunda egyo ehuriire, babagane empiiha zaayo, kandi bagarukye babagane n'eyaitwa. 36Nainga shi egyo nte ku eraabe ebaire neemanywa ngu ecumita, kandi mukama waayo abaire atarikugirinda, obwo arihe ente omu mwanya gw'eyaitwa, reero eyaitwa ebe eye.
Ebiragiro by'okuriha
Currently Selected:
Kur 21: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
