Kur 16
16
1Eihanga ry'Abaisiraeli ryona rikaimutsya orugyendo niriruga Elimu, ryahika omu ihamba rya Siini, eriri ahagati ya Elimu na Sinaayi, aha kiro kya ikumi na bitaano eky'okwezi kwa kabiri barugire omu nsi ya Misiri. 2Omutwe gwona ogw'Abaisiraeli gwayetomboitera Musa na Arooni omu ihamba. 3Baabagira bati: Nangwa Nyakubaho kuri yaatwitsize omukono gwe tukiri omu nsi ya Misiri, obu twabaire tushutama aha rubaju rw'enyungu z'enyama, tukarya emigaati tukahaaga! Mbwenu reeba imwe mutwihireyo mwatureeta omuri eri ihamba kwitsizamu eihanga ryona enjara.
4Nyakubaho nikwo kugambira Musa ati: Reeba niinyija kubagwisiza ebyokurya nk'enjura, birugye omu iguru. Buri izooba abantu bashohore batorotoore egabo yaabo eya buri izooba, mbone kuhamya yaaba nibaija kworobera eiteeka ryangye, nari batarikuryorobera. 5Ahari buri kiro kya mukaaga, ku baraatebeekanise eby'okutwara omuka, bingane kabiri n'ebi batorotoora buri izooba. 6Musa na Arooni nabo baagambira Abaisiraeli boona bati: Omu mwabazyo nibwo muraamanye ku Nyakubaho niwe yaabaihire omu nsi ya Misiri. 7Kandi omu kasheeshe nimwija kureeba ekitiinwa kye, ahabw'okuba ahuriire oku murikumwetomboitera. Mbwenu shi, niitwe baahi abu murikwetomboitera? 8Musa ayongyera abagira ati: Omu mwabazyo Nyakubaho ku araabahe enyama y'okurya n'omu kasheeshe yaabaha emigaati mwahaaga, biri ahuriire oku murikumwetomboitera. Mbwenu shi itwe niitwe baahi? Tiitwe murikwetomboitera, kureka nimwetomboitera Nyakubaho.
9Mpaho Musa agambira Arooni ati: Gambira omutwe gw'Abaisiraeli gwona oti: Mwirire haihi omu maisho ga Nyakubaho, ahabw'okuba ahuriire ebi murikwetomboita. 10Reero Arooni ku yaabaire naakigambira omutwe gw'Abaisiraeli gwona, baanaga amaisho omu ihamba, baareeba ekitiinwa kya Nyakubaho nikireebekyera omu kicu. 11Nyakubaho agambira Musa ati: 12Mpuriire ebi Abaisiraeli barikwetomboita. Mbwenu obagambire oti: Omu mwabazyo nimwija kurya enyama, kandi omu kasheeshe mutungye emigaati erikubahaazya; haza mumanye ku ndi Nyakubaho Ruhanga waanyu.
Ruhanga okuha Abaisiraeli emaanu n'entiitiri
13Omwabazyo ku gwakiikire, haija entiitiri, zaashweka orusiisira. Kandi omu kasheeshe orume rukwaitse rwashandaara aha nsi, rwehinguririize orusiisira. 14Orume ku rwakyeire omuri eryo ihamba, haareebekamu otuntu turungi twekuringiriire, twemi nk'amatondo g'omurombe agaragaire aha itaka. 15Abaisiraeli ku baarureebire baabuuzana bati: Beitu ekyo ni ki?#16:15 Beitu ekyo ni ki: Emaanu nikimanyisa ngu, “Eki n'enki?” Omu Ruheburaayo “Man hu”. Ahabw'okuba bakaba batarikukimanya. Musa abagira ati: N'ebyokurya bi Nyakubaho yaabaha kurya. 16Mbwenu eki nikyo Nyakubaho yaaragiira: Mubitorotoore nk'oku buri omwe omuriimwe arikubaasa kurya akaiguta. Buri muntu atware encuro nk'oku abantu b'omu ihema rya buri omwe omuriimwe barikwingana. 17Abaisiraeli baakora batyo; abamwe baatorotoora bingi, abandi baatorotoora bikye. 18Kwonka ku baabirengire omu ncuro, owaashanguriize bingi taine ki yaashaagizeho, n'owaashanguriize bikye taine ki yaakyenire; buri omwe akashanguriza nk'oku arikubaasa kurya. 19Reero Musa abagira ati: Hatagira omuntu owaagira ebi yaaraaza obuhoro, okuhitsya omu kasheeshe. 20Kwonka bo tibaahurira ebi Musa yaabaragiire. Abamwe baagira ebi baatsigaho, okuhitsya omu kasheeshe, haza byagiibwamu enyogori, byanuuka, na Musa nikwo kubagwerwa kubi. 21Buri kasheeshe baaguma nibabishanguriza, buri omwe nk'oku arikubaasa kurya, kwonka omushana gukyotsya, biyaga.
Eky'okutatorotoora maanu ahari Sabato
22Aha kiro kya mukaaga bakatorotoora ebyokurya birikwingana na biri kabiri, buri muntu endengo ibiri. Abakuru b'eihanga ku baateeraine, baabigambira Musa. 23Nawe yaabagira ati: Eki nikyo Mukama yaaragiira: Nyencakare n'eizooba ry'okuhuumurira kimwe; ni Sabato erikwera ahari Nyakubaho. Mukore ebi murikwenda kukora, muteekye ebi murikwenda kuteeka; ebiraatsigareho mubiiheho, mubibiikye okuhitsya omu kasheeshe. 24Nabo batyo baabibiika okuhitsya omu kasheeshe, nk'oku Musa yaabaragiira, haza tibijunda kandi tibigiibwamu nyogori. 25Musa abagira ati: Hati mubirye, ahabw'okuba eri izooba ni Sabato ya Nyakubaho. Eri izooba emaanu timurikwija kugishanga mu ishwa. 26Muryaguma mugitorotoorere omu biro mukaaga, kwonka aha kya mushanju, niyo Sabato, emaanu teribaho. 27Aha kiro kya mushanju bamwe omuri abo bantu ku baashohoire kugitorotoora tibaagibona. 28Nyakubaho nikwo kugambira Musa ati: Muryahitsya hi okwanga kworobera ebiragiro byangye n'amateeka gangye? 29Reeba mbwenu Nyakubaho abahaire Sabato. Nikyo aha kiro kya mukaaga arikubaheera ebyokurya by'okumara ebiro bibiri. N'ahabw'ekyo buri muntu omuriimwe agume omu mwanya gwe, hatagira owaashohora kugurugamu aha kiro kya mushanju. 30Abantu nabo nikwo kuhuumura aha kiro kya mushanju.
Nyakubaho okuragiira kubiika emaanu
31Mbwenu ebyo byokurya Abaisiraeli bakabyeta emaanu. Bikaba nibishusha nk'entobo, nibyera kandi nibinura nk'otugaati otuteekireinwemu obwoki. 32Musa atyo abagira ati: Eki nikyo Nyakubaho aragiire. Mwiheho encuro yaabyo emwe, mugume mugibiikire omu busingye bwanyu bwona, baijukuru baanyu babone kumanya ebyokurya bi naabariisiize omu ihamba, obu naabaiha omu nsi ya Misiri. 33Musa agira Arooni ati: Gira akanyungu, okatemu encuro y'emaanu, okate omu maisho ga Nyakubaho, kuguma kabiikiirwe baijukuru baanyu ab'obusingye oburiija. 34Arooni nawe akata omu maisho g'Eshanduukye y'Endagaano kurindirwayo, nk'oku Nyakubaho yaaragiire Musa. 35Abaisiraeli bakamara emyaka makumi ana nibarya emaanu, baarugaho baahika omu nsi etwirwemu abantu; baagumizamu nibagirya, okuhitsya obu baahikire aha mwatano gw'ensi ya Kanaani. 36Kandi encuro emwe ekaba eri ekicweka kimwe kya ikumi ky'ekitenga.
Musa okwihira Abaisiraeli amaizi omu rukiri
Currently Selected:
Kur 16: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
