Bar 4
4
1Obwo bwengye nibwo kitabo ky'ebiragiro bya Ruhanga,
eiteeka erigumaho ebiro byona.
Ababugumya baryagira amagara, ababureka baryafa.
2Iwe Yakobo, garuka, obwakiire;
otoore ei omushana gwabwo gurikujwera.
3Ekitiinwa kyawe otarikirekurira ondi,
nari okwikiriza omugisha gwawe okutwarwa eihanga erindi.
4Isiraeli, twine omugisha,
ahabw'okuba nitumanya ebigwisa gye Ruhanga.
Okutonzya kwa Yerusalemu eine amatsiko
5Imwe bantu bangye 'mwe,
mugume omutima, imwe abeetererwa Isiraeli!
6Mukatundwa omu mahanga kutari kwenda ngu mucwekyerere,
kureka mukarekurirwa abazigu baanyu, ahabw'okuba mukaitsa Ruhanga ekiniga.
7Manya mukagwisa kubi Owaabahangire,
mwatambira ebyago ebitambo, timwabitambira Ruhanga,
8Mwayebwa Ruhanga otahwaho owaabooroire,
mwagwisa kubi Yerusalemu eyaabarezire.
9Manya akareeba ekiniga eki Ruhanga yaabagiriire, yaagira ati:
Imwe bataahi ba Siyooni, nimuhurire, Ruhanga andeeteire enaku nyingi;
10ahabw'okuba ndeebire batabani bangye na bahara bangye
bari omu bukwatwa, obu Otahwaho yaabatairemu.
11Nkaboorora nshemereirwe,
naabaraga nindira nyine enaku.
12Hatagira owaanyeraataho, nyowe omufaakazi owaamazire abantu;
ntsigaire nyenka ahabw'ebibi by'abaana bangye,
ahabw'okuba bakareka Eiteeka rya Ruhanga.
13Tibareetaire ha biragiro bye ebi yaataireho,
tibaakuratira mitwarize y'ebiragiro bya Ruhanga,
nobu kwakuba okukuratira amateeka g'okuhikiirira kwe.
14Imwe bataahi ba Siyooni, nimwije,
mbaijutsye okukwatwa ka batabani bangye na bahara bangye,
oku Otahwaho yaabafubiize.
15Manya akabashunikira eihanga eririkuruga hare,
eihanga ritaine nshoni, ery'orurimi ru batarikumanya,
ery'abatarikutiina bakuru, kandi eritarikugirira baana saasi.
16Baatwara batabani b'omufaakazi abakundwa,
ogwo mukazi baamwaka bahara be, yaatsigara wenka.
17Mbwenu nyowe nimbaasa nta kubahwera?
18Manya owaabareeteire kugwerwa ako kagwe
niwe araabaihe omu mikono y'abazigu baanyu.
19Baana bangye, nimugyende, nimugyende,
nyowe ntsigaire nyenka.
20Njwire ebijwaro by'obusingye,
naajwara ekiguniya ky'okweshengyererezamu.
Ndyahoogyera Otahwaho ebiro byona eby'amagara gangye.
21Baana bangye, nimugume omutima, mutakire Ruhanga,
nawe aryabaiha omu kubonabonesibwa
n'okutegyekyesibwa eikama abazigu baanyu.
22Nyowe amatsiko ngataire ahari
Ogwo Otahwaho kubajuna,
kandi Nyakwera ampaire okushemererwa,
ahabw'okuba Omujuni waanyu Otahwaho
naija kubagirira embabazi juba.
23Nkabaraga nyine enaku, nindira,
kwonka Ruhanga aryabangarurira,
nshemererwe, nnanukye ebiro byona.
24Nk'oku bataahi ba Siyooni baabareeba hati nimukwatwa,
nikwo baraabareebe juba Ruhanga naabajuna;
haza okwo kujuna kubahikyeho n'ekitiinwa kingi,
kandi n'ekitiinisa ky'Ogwo Otahwaho.
25Baana bangye, mugumisiririze ekiniga ki Ruhanga abagiriire!
Abazigu baanyu babahambize,
kwonka nimwija kureeba juba nibacwekyerera,
naimwe mubaribate aha bitsya.
26Abaana bangye abakundwa bakaraba omu mihanda mibi;
baatwarwa nk'obusyo burikunyagwa abazigu.
27Baana bangye, mugume kandi muhoogyere Ruhanga,
ahabw'okuba owaabareeteire ekyo naija kubaijuka.
28Nk'oku mwakiihire aha mutima kutaishuka Ruhanga,
mbwenu nu nimugarukye mumusherure n'omuhimbo mwingi.
29Manya owaabareeteire ako kagwe aryabarokora,
abareetere okushemererwa okutahwabo, kandi abajune.
30Iwe Yerusalemu, guma!
31Owaakwetsire eryo iziina aryakuhuumuriza.
32Abakubonaboneise bakeeraatira okugwa kwawe, baryagwa omu kabi.
Endembo ezi abaana baawe baaheerereizemu bari abahuuku,
ziryacwekyerera, n'orurembo rwataahize abaana baawe rucwekyerere.
33Mbwenu nk'oku rwayeraatsire obu waagwa,
rukashemererererwa okuhwerekyerera kwawe,
nikwo rurigira obujune rwatsigara amatongo.
34Kandi ndyarucwa amaryo g'okwesiimirana abantu baarwo baingi,
ekyesooro kyarwo kihindurwe enaku.
35Manya Otahwaho aryarwoherereza omuriro gumare ebiro bingi,
rumare omwanya muhango rutwirwemu ebyago.
36Iwe Yerusalemu, naga amaisho oburugwa-izooba,
oranzye okushemererwa okurikukwizira nikuruga ahari Ruhanga!
37Reeba, batabani baawe abu waaragire nibaija.
Nibaija beeteeraine nibaruga oburugwa-izooba n'oburengyerwa-izooba ahabw'okuragiirwa Nyakwera,
nibeesiima ahabw'ekitiinwa kya Ruhanga.
Currently Selected:
Bar 4: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.