Bar 3
3
1Ai Mukama ow'obushoboorozi bwona, Ruhanga wa Isiraeli, itwe ab'omutima gwine obujune kandi oguruhire, nitukuhoogyera. 2Ai Mukama, hurira kandi ogire esaasi, ahabw'okuba tukakucumuraho. 3Obutoosha iwe osingama aha kitebe ky'obugabe, kwonka itwe tuguma nituhwerekyerera. 4Ai Mukama ow'obushoboorozi bwona, Ruhanga wa Isiraeli, hurira okushaba kw'Abaisiraeli abaafiire n'okw'abaana b'abaakucumwireho, abatareetaire ha bi Mukama Ruhanga waabo yaabagambiire, akagwe kakabagwera. 5Otaijuka ebicumuro bya baatatenkuriitwe, kureka omuri aka kabi oijukye obushoboorozi bwawe n'eiziina ryawe. 6Manya niiwe Mukama Ruhanga waitu, kandi, ai Mukama, niiwe turaahimbise. 7Niiwe otaire okukutiina omu mitima yaitu, ngu tubone kuhoogyera eiziina ryawe. Hati nitwija kukuhimbisiza omu kuzaaha kwaitu, ahabw'okuba tweihireho ebibi ebi baatatenkuriitwe baakucumwireho. 8Mbwenu reeba, tuzaahiire ei waatutaataanisiize kujumwa n'okukyeenwa n'okufubirwa, nituturwa ebibi bya baatatenkuriitwe abaakwimwire, iwe Mukama Ruhanga waitu.
Obwengye bu Ruhanga yaacumiire Isiraeli
9Iwe Isiraeli, hurira ebiragiro ebireeta amagara;
tega okutu, oyegye obwengye!
10Iwe Isiraeli, ahabw'enki, ahabw'enki ori omu nsi y'abazigu baawe,
nookurira omu nsi y'abanyamahanga,
noohindurwa ekihagaro hamwe n'abaafiire,
11noobarirwa omu bari okuzimu owa Nyamuteza?
12Manya okatsigaho enshuro y'obwengye.
13Kuri waakuratiire ebi Ruhanga ayenda,
okaagumire n'obusingye ebiro byona.
14Yega okumanya ah'obwengye buri,
ah'amaani gari, n'ah'okwetegyereza kuri,
obone kukyenga ah'okuramaara n'amagara biri,
ah'okuhweza kw'amaisho n'obusingye biri.
15N'oha orazoire ah'obwengye butuura?
N'oha orataahire ahi bubiikwa?
16Mbwenu bakuru b'amahanga
n'abategyeka enyamaishwa omu nsi barahi?
17Abarahiigire enyamaishwa n'enyonyi nk'abarikuzaana,
abeetindikira efeeza n'ezaabu ezi abantu beesiga,
kandi ezi batunga batagire bugarukiro, barahi?
18Abacwa amengye g'okutunga efeeza beemereize omutima,
abakora bakarengyesereza, barahi?
19Abo bakahwerekyerera, baaza okuzimu owa Nyamuteza,
abandi baaza omu bigyere byabo.
20Eminyeeto y'eri igyenda neemanya ebiriho kandi etwire omu nsi.
Kwonka omuhanda gw'obwengye tibakagumanyire,
nobu kwakuba okumanya ekirari kyabwo nari okubutunga.
21Abaana baabo bahabire munonga,
baateishuka omuhanda gwabwo.
22Ab'omuri Kanaani tibakabuhurirahoga,
n'ab'omuri Temani tibakabureebaga!
23Beene Hagari abasherura okwetegyereza omu nsi,
abatembeya ba Merani na Temani, abatebya n'abasherura okwetegyereza,
boona tibakamanyire muhanda gw'obwengye, nobu kwakuba okuteekateeka aha tuhanda twabwo.
24Iwe Isireali, enju ya Ruhanga ka ni mpango!
Obutegyeki bwe ka bubambire hoona!
25Ni buhonga kandi tibwine bugarukiro;
butumbeire, tiburikubaasa na kugyerwa.
26Okwo ebikaaka ebyarangainwe omu biro bya ira,
ebihango omu kyemerero, ebinyabwengye omu ngamba, niyo byazariirwe.
27Kwonka Ruhanga tarabatooraine
nobu kwakuba okubahabura omuhanda gw'obwengye.
28Batyo baahwerekyerera ahabw'okutagira bwengye
baacwekyerera ahabw'obushema bwabo.
29N'oha oragiire omu iguru akabwihayo,
akabuhanura naabwiha omu bicu?
30N'oha orambukire enyanja akabuzoora,
haza akabuhinga ezaabu empuuhe?
31Tihariho omanya omuhanda gubuhikaho,
nari oyeta aha kahanda kaahwo.
32Kwonka omanya byona niwe abumanya,
akabuzoora ahabw'okwetegyereza kwe.
Niwe yaahamize ensi, akagumaho ebiro byona,
akagiijuza enyamaishwa z'amaguru ana,
33Niwe ayohereza omushana, gukagyenda,
akagweta, gukamworobera gutiinire;
34enyonyoozi zikaakira omu bunaku bwazo, zaashemererwa.
Ku yaazeetsire, zaayetaba ziti: Turi aha!
Haza zaayakira owaazihangire zishemereirwe.
35Ogwo niwe Ruhanga waitu;
tihariho ondi obaasa kugyeranisibwa nawe.
36Akazoora omuhanda gw'okumanya,
yaagukwatsa omuheereza we Yakobo, Isiraeli enkundwa ye.
37Okwiha obwo obwengye bwaboneka omu nsi,
bwaguma omu bantu.
Currently Selected:
Bar 3: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.