Ŋúnuyɔ 91
91
Yewe nɛ mi ciʔige nɛ wéli
1Siɛn ŋáà wī tɛ́niwɛ Kulocɛliɛ láara wè,
wire ŋáà wī Duniya wi Mìɛni Nyùgo nɛ̄ gè,
wi béri kòri Ŋɔri Ti Mìɛni Kulocɛliɛ nyúmɔ nī bè.
2Mi 'ki juu Yewe mɛ́ nɛ́ jo: «Muɔ yē mi làridiʔɛ,
muɔ yē mi làridiʔɛ lìrige gáà gī naamɛ gè, nɛ́ mi Kulocɛliɛ;
mi nyɛ́nì mi sɔ̀ngirɔ taʔa dè muɔ nɛ̄.»
3Kányiʔɛ nɛ̄, wire wi mi suu dèzuuwo wi jùɔ mɛ́ wè#91.3 Wéli baa 124.7; 141.9; Kàs 6.5.,
nɛ́ káfaligɛ yaama ní bè, bàa piī nɛ siɛn kpúu wè.
4Wire wi béri muɔ tɔ́ngi
majo bɛ̀ gòli cî wi pìile tɔ́n bèle wi fíkɛnyɛ láara yè,
wi nyúmɔ nī bè, muɔ bé suɔdiʔɛ taa#91.4 Wéli baa 17.8; 57.2..
Wi kányiʔɛ kaala ni nɛ̂ muɔ màʔa nɛ̀ suʔu
bɛ̀ timɔzigege#91.4 Wéli baa 35.2. nɛ́ nɛ̀gɛburugo tíɛlɛ.
5Muɔ sǐ ní de fìʔɛ́ pìlige fíɛgbuɔrɔ nɛ̄ dèʔ,
nɛ́ ŋaaya ní yè nyàa yi fini cɛnvugo nɛ̄ gèʔ,
6nɛ́ káfaligɛ yaama ní bè bàa pi báan wuɔmɔ nī bèʔ,
nɛ́ míɛni yaaguumɔ ní bè
bàa pi fuu nɛ tungu siɛnnɛ nɛ̄ bèle cɛnvugo nɛ̄ gèʔ.
7A ki cɛ́nì nyaa wuʔɔgboliyo nyáà
yi 'siɛnnɛ sirakogunɔ (1 000) kpúu nɛ̀ cáan muɔ táanni wè,
nɛ́ siɛnnɛ siramuʔɔyɔ siin nɛ́ sirakiɛ (10 000) kpúu muɔ kàliige mɛ́ gè,
yafiɛn sǐ ga tíi nɔ̀ muɔ nɛ̄ʔ !
8‑Muɔ nyapigele múgu gèle yákuɔ,
bà muɔ bé ki nyaa
kɛnmɛ bíì nɛ̄ siɛnpiile pe bé pe sàri taa wè.
9ʔaan, Yewe, muɔ yē mi làridiʔɛ !
A muɔ 'fɔ̀li nɛ̀ Kulocɛliɛ kpíʔile wè muɔ kòridiʔɛ gè,
wire ŋáà wī Duniya wi Mìɛni Nyùgo nɛ̄ gè,
10kapiʔi káà fáala sǐ ga tíi nɔ̀ muɔ nɛ̄ʔ,
kagbɛnnɛ láà fáala sǐ ga tíi sìʔɛrɛ bè kpɔni muɔ kpáa nɛ̄ gèʔ.
11Nɛ́ ki cɛ́n wi bé muɔ wuʔu juu gè bè gbɛ̀ngɛ
nyìʔɛnɛ tundunminɔ mɛ́ bèle
peri muɔ wéli muɔ koliyo yi mìɛni nī yè#91.11 Koliyo nyáà siinwuʔu gè 11-12, Setɛni wi 'ki siɛnrɛ juu dè Zezi mɛ́ wè, lɛ̀lɛ líì nī wi 'puu nɛ wi pun nɛ wéli. Wéli baa Mat 4.6; Luk 4.10-11..
12Pe bé muɔ tuʔɔlɔ bè cò pe kiyɛ nī yè#91.12 Bè nyíʔɛnɛ tundunminɔ baara cɛ́n dè, wéli baa Sél 24.7; Yir 23.20; Ŋún 34.8.,
kire ga buu muɔ tɔligɔ káà fǎga círi daa kàdɛnigɛ káà nɛ̄ʔ.
13Muɔ bé jàri tánʔana wè nɛ́ wɔ̀mɔri ní wè,
muɔ bé jàriyɛliwɛ tɛn wè muɔ tɔligɔ ní gè, nɛ́ wɔ̀biʔi ní gè#91.13 Wéli baa Luk 10.19..
14A Yewe jo#91.14 Weli 'Yewe míʔɛ le gè baa wī bè ti lúʔugɛnnɛ cìile lè.:
«Bɛ̀ ki 'nyaa mi woli ni 'kpúʔɔ wi mɛ́ wè, m'bé wi suɔ,
m'béri wi ciʔige de wéli, nɛ́ ki cɛ́n wi nyɛ́nì mi cɛ́n.
15A wi 'mi yeri wè, m'bé lúʔu wi mɛ́,
m'bé puu nɛ́ wi ní fùrɔgɔ lɛ̀lɛ nī lè,
m'bé wi suɔ bé kpuʔɔrɔ taʔa wi nɛ̄.
16M'bé wi tín sìi nìʔɛwɛ nɛ̄,
bé sí ki yaʔa wi‑ mi suɔlɔ nyaa lè.»
Currently Selected:
Ŋúnuyɔ 91: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
