Ŋúnuyɔ 90
90
-Weli sáʔa weli de weli sìi cɛnyɛ tɔ́ri yè
1Kulocɛliɛ siɛn Misa wè#90.1 Wéli baa Fàn 33.1., wire náarigɛ gī.
Kàfɔli, muɔ tíi nɛ̀ puu weli kòridiʔɛ#90.1 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ yɛli nɛ́ girɛki siɛnliɛrɛ ní dè nɛ́ jo: làridiʔɛ., kɛ̀ngɛlɛ ke mìɛni nī.
2Sɛ́ni muɔ 'nyaguruyo faan yè, dí muɔ sí dàala nɛ́ nyíʔɛnɛ kpíʔile lè,
nɛ̀ ki líɛ baa faʔa faʔa gè nɛ́ lɛ̀gɛlɛ ke mìɛni nī, muɔ yē Kulocɛliɛ.
3Muɔ ma ki kpínʔini siɛnnɛ pe 'koli nɛ jiin tárigɛ nī gè#90.3 Wéli baa Sél 3.19.,
muɔ nɛ̂ ki juu níɛ̀ jo: «Lewiile yo, ye- koli yeri jiin tárigɛ nī !»
4Nɛ́ ki cɛ́n yiʔɛlɛ sirakogunɔ (1 000) gèle,
kiyē muɔ yiʔɛ mɛ́ bɛ̀ mbànʔa tíɛlɛ ŋàa wi 'tóri wè#90.4 Wéli baa Piɛ2 3.8.,
níɛ̀ tóri fáari bɛ̀ nyìjaliɛlɛ lɛ̀lɛ tíɛlɛ.
5Muɔ nɛ̂ siɛnnɛ pe sìi kúɔ wè bɛ̀ ŋɔ́nimɔ cɛ̀ri tíɛlɛ,
bɛ̀ nyàpirige tíɛlɛ gàa ki 'fùn sínbinimɛ táanni bè;
6a ki cɛni líɛ nɛ̀ yuʔɔri sínbinimɛ táanni bè,
cɛnguʔɔ táanni gè, ki nɛ̂ fɛ́ni nɛ̀ waʔa#90.6 Wéli baa Ŋún 37.2; 103.15; Kùlo2 19.26; Eza 40.6-8; Piɛ1 1.24..
7Nɛ́ ki cɛ́n weli nyɛ́nì cúʔɔ muɔ funyɛrigɛ kɛnmɛ nɛ̄ bè;
fíɛrɛ 'weli cò kpuʔɔ muɔ fundanʔanigɛ kɛnmɛ nɛ̄ bè.
8Muɔ nyɛ́nì weli kolimɔ tɛ́ngɛ bè muɔ yiʔɛ mɛ́ gè,
nɛ́ weli kapiilarigɛlɛ yige gèle muɔ yiʔɛ ki kpìɛnmɛ nɛ̄ bè.
9Nɛ́ ki cɛ́n weli cɛnyɛ yi mìɛni nɛ̂ tóri fáari
muɔ funyɛrigbuʔɔ kɛnmɛ nɛ̄ bè,
weli yiʔɛlɛ kiyē nɛ kúu majo nyuɔ káfaligɛ gī.
10Weli sìi yiʔɛlɛ kiyē yiʔɛlɛ togotaanri nɛ́ kpɔrigɔ;
bìli sí bīɛlɛ gbɛ̀nminɛ nɛ̀ tóri bèle, peli nɛ̂ yiʔɛlɛ togosicɛri taa.
Kire nɛ́ ki mìɛni ke mɔgɔlɔ ni nɛ̂ puu fùrɔgɔ nɛ́ wuʔɔgɔ,
kiyē nɛ tòrí fáari, á weli nɛ fini nɛ waa.
11Ŋáa wi bé gbɛ̀ muɔ funyɛrigɛ ki ŋɔri cɛ́n dè ?
Ŋáa wi fìʔɛ́ kpuʔɔ muɔ nɛ̄ bèri tɔ́ri nɛ́ muɔ funyɛrigbuʔɔ ní gè ?
12‑Weli tɛnmɛ weli de weli sìi cɛnyɛ tɔ́ri yè,
kire ga buu weli de tári nɛ́ sícilimɛ fungo ní#90.12 Wéli baa 39.5..
13ʔé Yewe ! Fúɔ lɛ̀lɛ jori nī muɔ bé ní mɔgɔ baa ?
Koli ma pɛn weli kúrugu !
‑Nyinimɛ taa weli nɛ̄, weli bálì bīɛlɛ muɔ baakuɔlɔ bèle !
14Ma weli tín nɛ́ muɔ bànguɔ dɛ́nigɛ ní gè sínbinimɛ táanni bè,
bà weli béri fundaanra yékpuʔulo wáari weli sìi cɛnyɛ yi mìɛni nī.
15‑Fundaanra kɛn weli mɛ́ bè yɛli nɛ́ cɛnniʔɛyɛ ní yè
nyàa nī muɔ 'weli wuʔɔ yè,
nɛ́ yiɛniʔɛgɛlɛ gálì nī weli kacuʔɔrɔ nyaa dè.
16‑Ki yaʔa weli bálì bīɛlɛ muɔ baakuɔlɔ bèle
weli gbɛ̀ jáa bè muɔ kakpiʔiligele nyaa gèle,
dí weli pìile pe‑ sí muɔ kpuɔmɔ nyaa bè.
17Weli Kàfɔli Kulocɛliɛ, ‑ki yaʔa muɔ kacɛ̀ngɛ ki‑ puu weli nɛ̄ !
‑Weli kiyɛ baara yaʔa dè ti‑ nyuɔ !
ʔaan, ‑weli kiyɛ baara yaʔa dè ti‑ nyuɔ !
Currently Selected:
Ŋúnuyɔ 90: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
