Ŋúnuyɔ 89
89
Yewe yo, sɔ̀ngi nɛ̀ taa nɛ́ muɔ nyakungɛngɛ ní gè
1Etan wè, Ezirayé wuu wè,#89.1 Wéli baa Kùlo1 5.11; Kaj1 2.6,8; 6.16-29; 15.16-19. wire sícilimɛ ŋúnugo gī#89.1 Ki kɔri wiì fílige nɛ̀ cɛ́nʔ. Wéli baa 32.1 kaliwɛgɛ ki táanmɛ gè..
2Lɛ̀lɛ ó lɛ̀lɛ nī, m'béri muɔ Yewe bànguɔ dɛ́nigɛ kele ŋú gèle#89.2 Wéli baa 17.7 kaliwɛgɛ ki táanmɛ gè.;
mi nyuɔ ki béri ki nyu kɛ̀ngɛlɛ ke mìɛni mɛ́
bé muɔ kányiʔɛ wuʔu jáari gè.
3ʔaan, mi 'jo: muɔ bànguɔ dɛ́nigɛ gè, muɔ ki 'tɛ́ngɛ ki‑ puu súuri,
muɔ kányiʔɛ kaala lè, muɔ 'ni tɛ́ngɛ baa nyìʔɛnɛ nī lè.
4Muɔ 'ki juu nɛ́ jo: «Mi nyɛ́nì nyuɔ kún nɛ̀ kɛn mi siɛnnyiɛnɛgɔnwɔ mɛ́ wè,
mi nyɛ́nì nyuɔ fɛ̀ni mi baakuɔwɔ Dawuda mɛ́ wè, nɛ́ jo:
5‹M'béri muɔ siimɛ tùlugo wuulo peli tɛ́ngi kùlofɔlilɔ, lɛ̀lɛ ó lɛ̀lɛ nī;
ʔaan, kɛ̀ngɛlɛ ke mìɛni nī,
muɔ pìile pe bé tɛ́ni muɔ kùlofɔlilɔ kácunʔɔ nɛ̄ gè#89.5 Wéli baa Sam2 7.12-16; Kaj1 17.11-14; Ŋún 132.11-12..› » Ye‑ ŋɔ́ cɛ̀.
6Yewe yo, nyìʔɛnɛ niī nɛ muɔ kakpoliyo ŋú yè;
baa nyìʔɛnɛ tundunminɔ gboli#89.6 Nyìʔɛnɛ tundunminɔ gboli niī baa Kulocɛliɛ nàkpanʔa nī gè (wéli baa 89.7; Zɔbi 1.6). nī lè, piyē nɛ muɔ kányiʔɛ wuʔu nyu gè.
7Baa nyìʔɛnɛ nī lè, ŋáa wī bɛ̀ Yewe tíɛlɛ ?
Ŋáa wī baa nɛ̀ muɔ kúɔ Yewe, nyìʔɛnɛ fànʔafɔlilɔ#89.7 Wéli baa 29.1 kaliwɛgɛ ki táanmɛ gè. nī bèle ?
8Nyìʔɛnɛ fànʔafɔlilɔ gboli nī lè, piyē nɛ fìʔɛ́ Kulocɛliɛ nɛ̄ wè;
wiī fíɛrɛ wuu nɛ̀ tóri bàli nɛ̄ pe 'wi màʔa nɛ̀ suʔu wè.
9 Yewe yo, Kulocɛliɛ ŋáà wī
Nyìʔɛnɛ Kapiɛngbuɔnnɔ Kàfɔli wè,
ŋáa ŋɔri ti 'niʔɛ bɛ̀ muɔ wori tíɛlɛ dè, Yewe ?
Muɔ kányiʔɛ kaala ni 'muɔ màʔa nɛ̀ suʔu.
10Muɔ wī ma kuʔɔjii fungbuʔɔ yérigi gè;
a kuʔɔjii wi lakuruyo yi 'yɛ̀ yè, muɔ nɛ̂ yi sínge.
11Muɔ wī ma 'kuʔɔjii yacogo muʔɔrɔ gè nɛ̀ ki kpúu,
gàa gī Arakavi wè#89.11 Arakavi yacogo gè, ki 'puu fìɛ nɛ ki tìí yacogo gáà ki 'puu luɔyɔ nī yè lɛ̀lɛ líì nī dàala ni 'puu nyaʔaminɛ nìi nī wè, duniya sélimɛ nɛ̄ bè (wéli baa Sél 1.2); kire tiʔɛ tɛ́nimɛ siɛnnɛ pe 'puu nɛ ki nyu pe muʔuruyo nī yè..
A muɔ sí muɔ leguulo cɛrigɛ bèle nɛ́ muɔ ŋɔri kɔli ní gè.
12Nyìʔɛnɛ niī muɔ woli nɛ́ dàala ní lè;
muɔ ma 'duniya faan wè nɛ́ wi laamɛ yɛrɛ ti mìɛni ní dè.
13Muɔ ma 'cɛngɛnyɛnifolimɛ kàmɛgɛ kɔli mɛ́ yige bè,
nɛ́ ń'nɛ̀ kàliige kɔli mɛ́ yige wè.
Tabɔri nɛ́ Ɛrimɔ nyaguruyo#89.13 Nyaguruyo nyáà siin yi 'puu kpàʔaliyɛ nɛ́ ní Isirayɛli kùlo lìʔɛlɛ nī lè cɛngɛnyɛnifolimɛ kàmɛgɛ kɔli mɛ́. yiī nɛ muguri fundaanra nɛ̄ dè
bà yi 'muɔ míʔɛ lúʔu gè.
14Muɔ kɔli kiī nɛ́ ŋɔri ní, muɔ kadagbege kiī lìrige,
muɔ kàliige kɔli kiī yɛ̀gɛgɛ naamɛ bà muɔ 'fànʔa taa gè.
15Sínmɛ nɛ́ kàyuʔujuugɛnmɛ báà pi 'nyuɔ bè,
pire pi 'muɔ kàfɔligɔ tɛ́ngɛ gè.
Bànguɔ dɛ́nigɛ nɛ́ kányiʔɛ, kire gī muɔ kɛnmɛ bè.
16Bàli pe 'fundaanra yékpuʔulo wáari gèle muɔ Yewe mɛ́ wè,
peli wuʔu kiī tànʔa !
Piyē nɛ tári muɔ yiʔɛ kpìɛnmɛ nɛ̄ bè.
17Piyē nɛ muguri cɛnguɔmɔ muɔ míʔɛ nɛ̄ gè,
pe nɛ̂ yɛ̀ nɛ̀ yéri bɛ̀ pe 'muɔ sínmɛ nyaa bè.
18Muɔ wī pe nàjɛnrɛ dè, nɛ́ pe ŋɔri dè;
muɔ funjɛ̀ngɛ kɛnmɛ nɛ̄ bè, weli nyɛ́nì fànʔa taa.
19Weli kùlofɔli wiī Isirayɛliyé Tiɛlɛfun Kulocɛliɛ wi wuu,
ʔaan, ŋàa wī weli timɔzigege gè, wiī Yewe wuu.
20Faʔa gè, muɔ yé ki juu nɛ́ mìɛ tìɛ muɔ siɛnnɛ nɛ̄ bèle,
bàli pe 'pìye puɔ muɔ nɛ̄ wè, nɛ́ jo:
«Mi nyɛ́nì mi kɔli sáʔa gè nɛ́ ŋɔri nyɔ́gɔ
kapiɛngbuɔnnɔ sànbali wáà nī,
nɛ́ nàgapunwɔ wáà nyíɛnɛ nɛ̀ kɔ̀n mi siɛnnɛ pe sunʔɔmɔ nī bè.
21Mi 'mi baakuɔwɔ Dawuda nyaa wè#89.21 Wéli baa Sam1 13; 14; Kakpi 13.22..
Mi nyɛ́nì sùnmɔ wàlidɛngɛbɛ wo bè wi nɛ̄ wè#89.21 Wéli baa Sam1 16.12-13..
22Mi kɔli ki bé wi cò bè yérige, ki bé ŋɔri nyɔ́gɔ wi nī.
23Wi leguulo piyě ní gbɛ̀ jáa bè wi fáanniʔ#89.23 piyě ní gbɛ̀ jáa bè wi fáanni: Siɛnnɛ pálì nɛ̂ tiʔɛ gáà siɛnrɛ yiʔɛ dè tuɔbuuro nī dè nɛ̀ jo: piyě ní gbɛ̀ jáa bè wi fuuʔ. Ti kɔri wiī nuwɔ nɛ́ nyaʔafolido nī dè dàa ti 'jo fáanni wè.,
siɛnpiiwe wáà fáala sǐ gbɛ̀ jáa bè wi faʔaʔ.
24M'bé wi parifɔlilɔ muʔɔrɔ bèle wi yiʔɛ mɛ́ gè,
bé sí ní pe kpúɔn, bàli wi 'biɛn bèle.
25Mi kányiʔɛ wuʔu nɛ́ mi bànguɔ dɛ́nigɛ ki bé puu nɛ́ wi ní,
m'bé wi fànʔa kpúʔɔ gè mi míʔɛ kire kɛnmɛ nɛ̄.
26M'bé wi kɔli taʔa gè kuʔɔjii naamɛ gè,
bé wi kàliige kɔli taʔa gè lakoliyo naamɛ gè#89.26 Kire 'jo Cɛngɛnyɛnijiinmɛ kuʔɔjii, nɛ́ Efirati cáʔa ní gè, yi siin yi 'puu Isirayɛli kùlo láʔala nɛ̄ lè; kàa 'puu cɛngɛnyɛnijiingɔli mɛ́ gè, gìi ní gè cɛngɛnyɛnifoligɔli mɛ́ gè, Kùlofɔli Sulomani lɛ̀lɛ nī lè. Kire tiʔɛ gáà kire Kulocɛliɛ wi yé nyuɔ fɛ̀ni gè Ezipiti yirile lɛ̀lɛ nī lè (wéli baa Yir 23.31; Fàn 11.24). Efirati cáʔa gè, lakoliyo yáà 'puu nɛ fúu nɛ jiin ki nī..
27Wire wè, wi béri mi yeri bé jo:
‹Muɔ wī mi tuu, muɔ wī mi Kulocɛliɛ wè,
nɛ́ mi kàdɛnigbaala náà ni mi suu lè !›
28Mi wè, m'bé wi kpíʔile mi jaapeliwe
ŋáà wi 'kpúʔɔ nɛ̀ tóri kùlofɔlilɔ nɛ̄ bèle dàala nɛ̄ lè#89.28 Wéli baa Kol 1.15..
29Mi bànguɔ dɛ́nigɛ gè, ki bé puu nɛ́ wi ní lɛ̀lɛ ó lɛ̀lɛ nī;
mi nyakungɛngɛ gáà mi 'kpíʔile nɛ́ wi ní wè, kiǐ kúɔ bè nyaaʔ.
30M'bé wi siimɛ tùlugo tɛ́ngɛ gè lɛ̀lɛ ó lɛ̀lɛ nī;
bè nyìʔɛnɛ yaʔa lè bile lè, wi kùlofɔlilɔ kácunʔɔ ki bé puu baa súuri.
31A wi jaala pe sî kɛ́nì cíi mi Fànʔa Siɛnrɛ nɛ̄ dè,
a pe wè nɛ tári mi kàyuʔujuuro nɛ̄ dèʔ,
32a pe sî mi fànʔa kele faʔa gèle,
nɛ́ cíi mi kajuudiʔɛlɛ nɛ̄ gèle,
33m'bé mi kàgbiile líɛ lè bè pe wuʔɔ pe tuudiʔɛlɛ kɛnmɛ nɛ̄ bè,
m'bé kàgbiinyiʔɛnɛ kpúɔn pe nɛ̄ pe kolimɔ kɛnmɛ nɛ̄ bè.
34Kire nɛ́ ki míɛni miǐ ga tíi mi bànguɔ dɛ́nigɛ yaʔa gè wi kɔli mɛ́ gèʔ,
miǐ ga tíi mi kányiʔɛ kaala cíi lè púloʔ wi kɔli mɛ́ gèʔ.
35Miǐ je ní mi nyakungɛngɛ cúʔɔ gè nɛ́ wi níʔ,
mi míɛni sǐ ga tíi mi nyasiɛnrɛ fɛ̀ni dè wi kɔli mɛ́ gèʔ,
dàa mi 'juu mi nyuɔ nī gèʔ.
36Bɛ̀ mi yē tiɛlɛ fùn wè, mi nyɛ́nì ki kàli tɔligɔ nigbe nɛ̄,
nɛ́ jo miǐ ga tíi finɛ púloʔ Dawuda mɛ́ʔ !
37Wi siimɛ tùlugo wuu wáà wi bé kò baa lɛ̀lɛ ó lɛ̀lɛ nī;
bè cɛngɛ yaʔa gè bile gè, wi kùlofɔlilɔ kácunʔɔ ki bé puu baa súuri,
38nɛ́ míɛni bè yege yaʔa gè bile súuri gè,
yege gáà gī kinyaafɔli wè nyìʔɛnɛ nī lè
níɛ kányiʔɛ nyu gè.» Ye‑ ŋɔ́ cɛ̀.
39Nɛ̀ sí ki yaʔa, muɔ nyɛ́nì wi wáa nɛ́ cíi wi nɛ̄ !
Muɔ fungo 'ki yɛ̀ kpuʔɔ muɔ siɛnnyiɛnɛgɔnwɔ kúrugu wè !
40A muɔ 'cíi muɔ nyakungɛngɛ nɛ̄ gè, muɔ baakuɔwɔ kɔli mɛ́ gè,
a muɔ 'kùlofɔli ndɔ̀ngɔ núʔɔ gè nɛ̀ ki wáa dàala nɛ̄.
41A muɔ 'wi kàʔa ki gunzuluyo yi mìɛni fúrugi yè,
a muɔ 'ki gunliriye cáan yè nɛ̀ yi muʔɔrɔ.
42A kodorilo pe mìɛni 'wi yɛrɛ fùʔuro dè,
a wi 'kò wi tɛ́ninyɛninɛ pe wi tíʔɛ.
43Muɔ 'wi parifɔlilɔ pe kàliige kɔli yɛ̀gɛ gè naamɛ,
muɔ 'fundaanra kɛn wi leguulo pe mìɛni mɛ́ bèle.
44Muɔ wī, ma 'wi kapiɛngbuɔn ŋɔnɔ piɛn lè,
muɔ sì wi sáʔa kapiɛnnɛ nɛ̄ lèʔ.
45Muɔ 'wi nàjɛnrɛ cúʔɔ dè,
muɔ 'wi kùlofɔlilɔ kácunʔɔ cáan gè dàala nɛ̄.
46Muɔ 'wi nàgapunmɔ cɛnyɛ werige yè,
nɛ́ fìɛrɛ tɔ́n wi nɛ̄. Ye‑ ŋɔ́ cɛ̀.
47Yewe yo, fúɔ lɛ̀lɛ jori nī muɔ bé làri mmɛ gè ?
Muɔ bé muɔ fundanʔanigɛ yaʔa gè
ki de wúʔɔri lé bɛ̀ kàsun tíɛlɛ ?
48Sɔ̀ngi ma taa nɛ́ mi ní, kɛnmɛ bíì nɛ̄ mi sìi wi 'weri wè.
Muɔ nyɛ́nì lewiile faan bèle wī lé wíra ?
49Siɛn yē bile lé ŋàa wi bé kò sìi nɛ̄, wi fǎga kùu bè nyaa wèʔ,
kire ga laa bè jáa bè wi tíimɛ sìi suɔ wè kusiʔi mɛ́ gè ?
50Mi Kàfɔli, sé muɔ bànguɔ dɛ́nigɛ kele ke yē,
faʔa faʔa wuʔulo gèle#89.50 Wéli baa 17.7 kaliwɛgɛ ki táanmɛ gè.,
gàli muɔ yé kàli nɛ̀ kɛn Dawuda mɛ́ wè
muɔ kányiʔɛ wuʔulo gèle ?
51Mi Kàfɔli yo, sɔ̀ngi ma taa nɛ́ tiʔɛligɛlɛ ní gèle
gàli ke nɔ̀gí muɔ baakuɔlɔ nɛ̄ bèle, siɛnniʔɛnɛ bálì mi nɛ gbún bèle.
52Yewe yo, muɔ leguulo piyē nɛ teri,
ʔaan, piyē nɛ tári wi nɛ̄ nɛ́ wi teri, muɔ siɛnnyiɛnɛgɔnwɔ wè.
Gbùʔɔrigɔ wuʔu gáà ki 'juu gè, bè Sɛbɛ Taanriwuu kúɔ wè
53Kpuʔɔrɔ 'yɛli ti de tari Yewe nɛ̄ lɛ̀lɛ ó lɛ̀lɛ nī!
Ki- taa ki puu bɛ̀ !
SƐBƐ SICƐRIWUU
(90–106)
Currently Selected:
Ŋúnuyɔ 89: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
