Ŋúnuyɔ 80
80
Kulocɛliɛ yo, -ki yaʔa weli- koli bɛn muɔ kúrugu !
1Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Luʔɔ kácunʔɔ». Nyakungɛngɛ siɛnrɛ#80.1 Wéli baa 60.1 kaliwɛgɛ ki táanmɛ gè.. Asafi#80.1 Wéli baa 50.1 kaliwɛgɛ ki táanmɛ gè. ŋúnudanʔa gī gàa pe ŋú nɛ́ yakpuɔnrɔ ní dè.
2 Isirayɛliyé nàʔavɔli yo, ‑líiye cáan weli mɛ́,
muɔ ŋáà ma 'Yusufu#80.2 Yusufu wi yé puu Ɛfirayimi nɛ́ Manase tuu. Bɛ̀ tiʔɛ gáà kiī nɛ nyu wi wuʔu nɛ̄ gè, ki bé gbɛ̀ nyaa kiī nɛ nyu nɛ saaya tùluyo kiɛ tìí yè nyàa yi 'puu cɛngɛnyɛnifoligɔlimɛ kàmɛgɛ kɔli mɛ́ gè, kùlo nī lè. Ki bé ní gbàri nyu Isirayɛliyé pe mìɛni wuʔu nɛ̄ gè, nɛ́ ki cɛ́n Yusufu tuu Yakuba wè, wi yé pɛ́nì wi kínige nɛ̀ jo wi yē wire jaaliɛwɛ (wéli baa Sél 48.5; Kaj1 5.1). siimɛ yiʔɛ kínigi gè majo sìnbatogo gī gè.
Muɔ ŋáà wī tɛ́niwɛ seribɛnnɛ#80.2 Sɛribɛnnɛ pe yé puu kóridarigɛlɛ nyakungɛngɛ finʔɛgɛ naamɛ gè (wéli baa Yir 25.22; Kùlo1 6.23-28). nɛ̄ bèle, ‑muɔ kpìɛnmɛ cáan bè weli nɛ̄.
3‑Muɔ ŋɔri tíʔɛ dè ma weli suɔ weli tobilo siimɛ nyaamɛ nɛ̄ bè:
Ɛfirayimi wè, Bɛnzamɛ, nɛ́ Manase ní wè#80.3 Saaya tùluyo nyáà taanri yè, yire yi 'puu nɛ tári nyakungɛngɛ finʔɛgɛ kúrugu gè a pe gbɛ̀ni waa koligo nɛ̄ gè Kanaa kùlo mɛ́ lè (wéli baa Tɔ́r 10.21-24)..
4Kulocɛliɛ yo, ‑ki yaʔa weli‑ koli bɛn cígini !
‑Weli wéli nɛ́ funjɛ̀ngɛ ní, bà weli bé suɔ.
5 Yewe yo, Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli wè,
lɛ̀lɛ jori nī muɔ fungo ki bé yɛ̀ kpuʔɔ
muɔ siɛnnɛ náarigɛ kúrugu gè ?
6Muɔ 'kɔnrɔ tire kɛn pe mɛ́ majo yaliire dī,
nɛ́ sí ki yaʔa a muɔ 'pe yéturo le dè yalege nī fúɔ
a ti 'niʔɛ, a pe 'ti gbuɔ.
7Weli tɛ́ninyɛninɛ piyē nɛ túngu nɛ́ pìye ní bè weli kùlo líɛ lè,
a weli leguulo pe 'kò nɛ pìye nyíɛnɛ weli nɛ̄.
8Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli,
‑ki yaʔa weli‑ koli bɛn cígini !
‑Weli wéli nɛ́ funjɛ̀ngɛ ní, bà weli bé suɔ.
9Muɔ cé ɛrɛzɛn fétirige#80.9 Fétirige gè kiī nɛ Isirayɛliyé kɛnmɛ tìí bè (wéli baa Eza 5.1-7; 27.2-6; Zan 15.1-10). píle gè nɛ̀ kɔ́n Ezipiti kùlo nī lè,
nɛ́ kùlogolo siɛnfeliye cìra yè ki yiʔɛ mɛ́ gè, nɛ́ koli nɛ̀ ki cɔ́ri baa.
10Muɔ yé siʔi gbòbori ki mɛ́, a ki 'fìin nɛ̀ nìre wáa dàala nī lè.
A ki 'yɛ̀ nɛ̀ kùlo nyì lè.
11A ki nyúmɔ pi 'yɛ̀ nɛ̀ nyaguruyo tɔ́n yè,
ki lère ní dè nɛ tári sɛdiri tiikpaʔaliyɛ nɛ̄ yè.
12A ki lère ti 'yɛ̀ fúɔ nɛ̀ sɛ́nì nɔ̀ Cɛngɛnyɛnijiinmɛ kuʔɔjii nɛ̄ wè,
a ki lèbunro tire 'kɛ́ nɛ̀ sɛ́nì nɔ̀ Efirati cáʔa nɛ̄ gè#80.12 Kire kuʔɔjii ŋáà wè nɛ́ cáʔa ní gè, yi 'puu nɛ Isirayɛli kùlo láʔagɛlɛ tìí gèle, Dawuda lɛ̀lɛ nī lè nɛ́ Sulomani kùlofɔlimɔ lɛ̀lɛ nī lè..
13Gáa sí nɛ̄ muɔ 'kàwiiye fùru kàkɛngɛ nɛ̄ gè,
a kire ki 'yaʔa bàli pe mìɛni pe 'tóri bèle koligo nī gè,
a pe 'kò nɛ ki yasɛnrɛ cuu dè ?
14A nyàʔatiɛligɛ ki pɛ́nì siʔi cúʔɔ gè,
a nyàʔayɛrɛ ti mìɛni 'kò nɛ ki káa.
15Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli wè,
koli ma pɛn, weli nɛ muɔ fiɛn wī !
Bè muɔ yaʔa baa nyìʔɛnɛ nī lè, ma ki wéli !
Ma fétirige gáà wéli gè ma ki píle ma suɔ,
16gàa muɔ kàliige kɔli ki 'cɔ́ri gè,
fétiribungo gáà nī muɔ tíimɛ 'ŋɔri nyɔ́gɔ dè.
17Ki n'gɛ, kàsun ki 'muɔ ɛrɛzɛn fétirige sórigo gè,
a siɛnnɛ pe 'ki ceri.
Muɔ siɛnnɛ piyē nɛ córi muɔ funyɛrigɛ kɛnmɛ nɛ̄ bè.
18‑Muɔ kɔli taʔa gè siɛn nɛ̄ wè ŋáa wī muɔ kàliige mɛ́ gè,
lewiiwe ŋáà nī muɔ 'ŋɔri nyɔ́gɔ dè#80.18 Siɛnnɛ pálì nɛ ki sɔ̀ngí nɛ́ jo tiʔɛ gáà siɛnrɛ tiī nɛ nyu kùlofɔli wi wuʔu nɛ̄ gè. Pàli nɛ ki sɔ̀ngí nɛ́ jo ki nɛ nyu Isirayɛli tògo wuʔu nɛ̄ gè, majo dùʔɔ siɛn nigbe wī..
19Bà kire bé ki yaʔa weli sǐ ní líili muɔ nɛ̄ cíginiʔ.
‑Ki yaʔa weli‑ kò sìi nɛ̄, bà weli béri muɔ míʔɛ yeri gè bèri muɔ náari.
20Yewe yo, Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli wè,
‑ki yaʔa weli‑ koli bɛn muɔ mɛ́ !
Weli wéli nɛ́ funjɛ̀ngɛ ní, bà weli bé suɔ.
Currently Selected:
Ŋúnuyɔ 80: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
