Ŋúnuyɔ 79
79
Pe 'Zerizalɛmi kàʔa cúʔɔ gè
1Asafi#79.1 Wéli baa 50.1 kaliwɛgɛ ki táanmɛ gè. ŋúnudanʔa gī, gàa pe ŋú nɛ́ yakpuɔnrɔ ní dè.
Kulocɛliɛ yo, kùlogolo ke pɛ́nì tuu weli nɛ̄,
kùlo náà nī muɔ kɔrigɔ gè.
Pe nyɛ́nì muɔ Gbùʔɔrɔsaʔa wàlidɛngɛgɛ núʔɔ gè#79.1 Wéli baa Kaya 1.10.,
nɛ́ Zerizalɛmi kàʔa kpíʔile gè gunduuro#79.1 Wéli baa Kùlo2 25.8-10; Kaj2 36.17-19; Zer 52.12-14..
2Pe nyɛ́nì muɔ baakuɔlɔ kpúu bèle
nɛ́ kúbilo kɛn bèle dìbarɛ mɛ́ dè yaliire,
nɛ́ siɛnnɛ bálì pe 'pìye puɔ muɔ nɛ̄ bèle,
pe 'pe céri kɛn dè nyàʔayɛrɛ mɛ́ dè.
3A pe 'pe sìsiɛn wo gè nɛ̀ Zerizalɛmi kàʔa màʔa gè;
siɛn sì cɛ́nì taaʔ bè kúbilo tɔ́n bèleʔ#79.3 Wéli baa Zer 14.16..
4Weli nyɛ́nì kò kátaanra wuulo weli tɛ́ninyɛninɛ mɛ́ bèle,
bàli pe 'weli màʔa nɛ̀ suʔu bèle, a pe 'weli gbèli níɛ weli tíʔɛ#79.4 Wéli baa 44.13; Dan 9.16..
5 Yewe yo, fúɔ lɛ̀lɛ jori nī
muɔ bé ní muɔ funyɛrigɛ cò gè weli kúrugu súuri,
nɛ́ muɔ fundanʔanigɛ ní gè, gàa ki nyí bɛ̀ kàsun tíɛlɛ gè ?
6Ma muɔ funyɛrigbuʔɔ taʔa gè kùlogolo nɛ̄ gèle
gàli kiyè muɔ cɛ́n gèleʔ,
nɛ́ míɛni kùlofɔliyɔ nɛ̄ yè nyàa yi wè muɔ míʔɛ yeri gèʔ.
7Nɛ́ ki cɛ́n pe nyɛ́nì Yakuba siimɛ cɛnminɛ bè,
nɛ́ wi kòridiʔɛ cúʔɔ gè#79.7 Koliyo 6 nɛ́ 7 wuʔu nɛ̄ gè, ki 'juu baa Zer 10.25..
8Fǎga ní weli tobilo kolimɔ tɔ́ri bè weli kúruguʔ !
‑Ki yaʔa muɔ nyinidaaguugo ki‑ nɔ̀ weli nɛ̄ fáari !
Nɛ́ ki cɛ́n weli ŋɔri ti tɔ̀ni nɛ̀ kúɔ wī.
9Te báan, ma pa weli sáʔa, weli suɔfɔli Kulocɛliɛ,
muɔ míʔɛ ki kpuʔɔrɔ tire kɛnmɛ nɛ̄.
‑Weli cò ma suɔ, ma weli kapiʔile kàsulugo suɔ gè
muɔ míʔɛ kire kɛnmɛ nɛ̄ !
10Gáa nɛ̄ kùlogolo kálì siɛnnɛ pe bága ki juu bé jo:
«Sé pe Kulocɛliɛ wi yē ?»
Kùlogolo ke 'yɛli ke‑ ti lúʔu, weli nyaamɛ nɛ̄ bè,
kɛnmɛ bíì nɛ̄ Kulocɛliɛ nɛ̂ wi baakuɔlɔ kùu fuʔɔ tɔ́n gè.
11‑Kasuulebile pe kɔnwaara yaʔa dè ti‑ yɛ̀ bè nɔ̀ muɔ nɛ̄ !
Bàli nɛ̄ pe yé kàyuʔu juu gè nɛ̀ ceri bè pe kpúu bèle,
dí muɔ ŋɔri kɔli ki sí pe suɔ !
12‑Tiʔɛligɛlɛ fuʔɔ tɔ́n gè weli tɛ́ninyɛninɛ mɛ́ bèle tɔliyɔ kɔlisiin,
gàli ní pe 'muɔ tiʔɛlɛ wè, mi Kàfɔli.
13Weli bálì bīɛlɛ muɔ siɛnnɛ bèle, sìnbatogo gáà muɔ nɛ nári gè,
weli béri muɔ míʔɛ gbùʔɔrɔ́ gè lɛ̀lɛ ó lɛ̀lɛ nī,
weli béri ki nyu kɛ̀ngɛlɛ ke mìɛni mɛ́
gàa ki 'ki yaʔa weli nɛ muɔ gbùʔɔrɔ́ wè.
Currently Selected:
Ŋúnuyɔ 79: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
