Ŋúnuyɔ 81
81
A mi siɛnnɛ pe yé fɔ̀li nɛ lúru m'mɛ́ wè o !
1Ŋúnuŋuminɔ yiɛginiwɛ wuʔu gī, gàa pe 'ŋú nɛ́ Gatiyé gɔri ní wè#81.1 Wéli baa 8.1 kaliwɛgɛ ki táanmɛ gè.. Asafi wuʔu gī#81.1 Wéli baa 50.1 kaliwɛgɛ ki táanmɛ gè..
2Yeri fundaanra yékpuʔulo wáari Kulocɛliɛ kɔli mɛ́ gè;
wire wī weli ŋɔri dè !
ʔaan, yeri kòkuʔulo wáari Yakuba Kulocɛliɛ mɛ́ wè !
3Ye‑ ŋúnugo káà le, yeri pìnbile kpúɔn lè,
yeri gɔripile tàanna kpúɔn lè, nɛ́ màʔagɛlɛ bɔ̀licɛrigɛ ní gè.
4Ye‑ kàkpanʔa wíi gè yevɔngɔ yiri lɛ̀lɛ nī lè#81.4 Wéli baa Lev 23.24; Tɔ́r 10.10; 29.1. nɛ́ nzùʔu lɛ̀lɛ nī lè,
weli fundaanra tánʔagbuɔlɔ cɛngɛ nī gè#81.4 Náʔa gè kiī nɛ nyu Kpátaapigele Fundaanra tánʔagbuɔlɔ wuʔu nɛ̄ gè. Wéli baa Yir 23.14; Lev 23.33-44; Tɔ́r 29.12-39; Fàn 16.13-15. Ki 'puu nɛ séligi yiɛlɛ ni yeye kɔlisiinwuʔu nɛ̄ gè, yevɔngɔ yiri lɛ̀lɛ nī lè. Fundaanra dàa ti 'puu míɛni bè Kulocɛliɛ wi kacɛ̀ngɛ cɛ́n gè yaliire líɛ lɛ̀lɛ nī lè..
5Nɛ́ ki cɛ́n kiī fànʔa kaala Isirayɛli siɛnnɛ mɛ́ bèle;
Yakuba Kulocɛliɛ wi kàyuʔu siɛnrɛ dī.
6Kire yē nyakungɛngɛ siɛnrɛ dáà wi 'tɛ́ngɛ Yusufu narigɛ nī gè,
bà Kulocɛliɛ wi yé kɛ́ nɛ̀ sɛ́nì tuu Ezipiti kùlo nɛ̄ lè#81.6 Náʔa gè, Yusufu narigɛ kiī nɛ̄ Isirayɛliyé kɛ́nmɛ tíì bè bɛ̀ pe 'puu Ezipiti kùlo nī lè. Wéli baa Yir 11.4..
Mi nyasiɛnrɛ táà lúʔu dàa miì cɛ́n dèʔ,
7a ti 'jo: «Mi nyɛ́nì tugoro tìrige dè yeli fíkɛnyɛ nɛ̄ yè,
mi nyɛ́nì yeli kiyɛ yige yè sùkulomɔ gòcaaya nī yè#81.7 Wéli baa Yir 1.11-14..
8Bà yeli yé puu funbiɛnrɛ nɛ̄ dè, a yeli 'mi yeri á mi 'yeli líɛ nɛ̀ yige#81.8 Wéli baa Yir 2.23-25..
A mi 'lúʔu yeli mɛ́ mi làridiʔɛ nī gè, kàsakpɛnigɛ nī gè#81.8 Wéli baa Yir 19.16-19..
Baa Mɛriba luɔyɔ tiʔɛ nī gè, a mi 'yeli puu nɛ̀ wéli#81.8 Wéli baa Yir 17.1-7; Tɔ́r 20.1-13.. Ye‑ ŋɔ́ cɛ̀.
9Kire nɛ̄ a mi 'yeli yɛ: ‹Yeri lúru, mi siɛnnɛ, m'bé juu bè yeli sɔ̀mi.
Cí, Isirayɛli, a ki yé nyaa muɔ yé fɔ̀li nɛ lúru m'mɛ́ wè o !
10Kiì yɛli pe 'kulocɛliɛ wáà nyaa yeli sunʔɔmɔ nīʔ !
Muɔ sì yé cɛ́nì yɛli bè káguro cáan kùlo láà kulocɛliɛ yiʔɛ mɛ́ʔ#81.10 Wéli baa Yir 20.3; Fàn 32.12; Ŋún 44.20; Eza 43.12. !
11Mi yē Yewe, muɔ Kulocɛliɛ wè. Mi 'muɔ yige Ezipiti kùlo nī lè#81.11 Wéli baa Yir 20.2,3; Fàn 5.5-6..
‑Muɔ nyuɔ múgu gè kpuʔɔ dí mi sí ki nyì !›
12Kire nɛ́ ki mìɛni, mi siɛnnɛ pe sì mi siɛnrɛ lúʔu dèʔ, Isirayɛli sì fɔ̀li mi nɛ̄ʔ#81.12 Wéli baa Yir 32.1; Fàn 32.15,18; Kàs 1.25,30..
13Kire nɛ̄ a mi sí pe yaʔa pe ngbóluʔubinʔɛnɛ nī gèle;
pe nyɛ́nì taʔa pe nyɛ́ni kele nɛ̄ gèle.
14Cí ! A mi siɛnnɛ pe yé fɔ̀li nɛ lúru m'mɛ́ wè o !
A Isirayɛli 'puu nɛ tári mi koligo nī gè o#81.14 Wéli baa Fàn 5.29,33; 32.29; Eza 48.18. !
15Kiǐ cî puu m'mɛ́ yafiɛn bè pe leguulo kùru bèle bè kɛn pe mɛ́ʔ,
mi cî mi kɔli yiʔɛ gè bè taʔa pe parifɔlilɔ nɛ̄ bèle !
16Bàli 'mi Yewe sì dɛ́ni wèʔ, peli béri gbɔbilɔ mi yiʔɛ mɛ́ gè;
pe faʔama pi bé puu lɛ̀lɛ ó lɛ̀lɛ nī#81.16 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: a Isirayɛliyé bé puu ŋɔ́daala nɛ̄ lɛ̀lɛ ó lɛ̀lɛ nī..
17Gàa ki 'Isirayɛliyé kúɔ bèle,
mi cî de pe nyuɔyɔ kɔ̀ngí yè nɛ́ yaliicɛ̀nrɛ ní,
bé pe tín nɛ̀ sárigɛ ní gè gàa ki kɔ́ngi nyaguruwiʔi nī gè#81.17 Wéli baa Fàn 32.13-14..»
Currently Selected:
Ŋúnuyɔ 81: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
