Ŋúnuyɔ 72
72
Piyē nɛ náari kùlofɔli wuʔu nɛ̄ gè
1 Sulomani wuʔu gī#72.1 Bɛ̀ Ŋúnugo 127 tíɛlɛ..
Kulocɛliɛ yo, ‑weli kùlofɔli sáʔa wè
wi de kàyuʔu nyu gè bɛ̀ muɔ tíɛlɛ,
ma kùlofɔli jaa sáʔa wè
wi de kàyuʔu nyu gè nɛ́ muɔ sínmɛ ní bè.
2Bà ki bé kpíʔile dí wi‑ muɔ siɛnnɛ kàyuʔu juu gè nɛ́ sínmɛ ní,
béri fuunmɔfɔli kele nyu gèle de yɛligi.
3Nyaguruyo yi béri yanyige kanʔa gè siɛnnɛ mɛ́ bèle,
dí nyagurupigele keli sí de yaliire nyuʔɔ dè, sínmɛ pire kɛnmɛ nɛ̄.
4Wi béri tànʔa kanʔa fuunmɔfɔlilɔ mɛ́ bèle,
béri fuunmɔfɔlilɔ pìile suu bèle, bé weli wuʔɔvɔlilɔ muʔɔrɔ bèle.
5A kire 'kpíʔile gè, lɛ̀lɛ ó lɛ̀lɛ nī,
a cɛngɛ ki kɛ́ni yigi gè, a yege míɛni ki yigi gè,
fúɔ bè pa duniya yɛ̀gɛ wè, kɛ̀ngɛlɛ ke mìɛni béri fìʔɛ́ muɔ nɛ̄.
6Kùlofɔli wi béri kacɛ̀ngɛ kpínʔini siɛnnɛ nɛ̄ bèle
majo bɛ̀ kàsaʔa kiī nɛ tun siiye nɛ̄ yè,
bɛ̀ kàsaluʔɔ tíɛlɛ gàa ki dàala fuɔnri lè.
7Wire cɛnyɛ nī yè, kàa béri tari siɛnsinminɛ nɛ̄ bèle;
bè yege yaʔa gè bile duniya nī wè, yanyige bé puu pe nɛ̄.
8Dí wi kùlofɔlimɔ pi‑ sí kpúʔɔ
bè ki líɛ kuʔɔjii wáà nɛ̄ fúɔ bè sa nɔ̀ wàa nɛ̄#72.8 Kire 'jo Cɛngɛnyɛnijiinmɛ kuʔɔjii kɔli mɛ́ gè fúɔ bè sa nɔ̀ Yasuʔɔniʔɛgɛ kuʔɔjii, kire ga laa Nyàʔanivɛgɛ Tiire kuʔɔjii nɛ̄ wè, cɛngɛnyɛnifoligɔli mɛ́ gè.,
bè ki líɛ Cáʔa nɛ̄ gè bè sa nɔ̀ duniya láʔala nɛ̄ lè.#72.8 Efirati cáʔa kire ki 'puu Isirayɛli láʔala lè, kùlofɔli Sulomani lɛ̀lɛ nī lè; kire tiʔɛ gáà kire Kulocɛliɛ wi yé nyuɔ fɛ̀ni Ezipiti yirile lɛ̀lɛ nī lè (wéli baa Yir 23.31; Fàn 11.24).
9Waama kùlo tɛ́nivɔlilɔ bèle, pe béri káguro cáanri wi yiʔɛ mɛ́ gè;
kùlofɔli wi leguulo pe béri cúbugo laala gè.
10Kùlofɔlilɔ bálì pe 'kɔ́n Tarisisi kàʔa mɛ́ gè#72.10 Tarisisi kàʔa ki yé puu Ɛsipanyi kùlo nī; kire ki 'puu peli mɛ́ duniya láʔala lè.,
nɛ́ bàli pe 'kɔ́n kuʔɔjii gògoyo nɛ̄ yè,
pe béri báan de kɔ̀nnɔ kɔ̀ngí bèri kanʔa wi mɛ́.
Saba kùlofɔli wè, nɛ́ Seba kùlofɔli ní wè#72.10 Saba kùlo ni 'puu baa Arabuulo tɛ́nimɛ nī (wéli baa Kùlo1 10.1); Seba kùlo ni 'puu Siɛnnɛwuɔlɔ kùlo nī (wéli baa Sél 10.7; Eza 43.3).,
peli míɛni béri kpuʔɔrɔ yɛrɛ kanʔa wi mɛ́.
11Kùlofɔlilɔ bálì pe mìɛni béri káguro cáanri wi yiʔɛ mɛ́ gè,
kùlogolo ke mìɛni siɛnfeliye yi sí de baara wi mɛ́.
12ʔaan, wi bé fɔ̀ngɔfɔlilɔ píle bèle bè suɔ,
peli bálì pe kòkuʔulo wáari gèle,
nɛ́ fuunmɔfɔlilɔ ní bèle, bàli bīɛlɛ sáʔafɔli wè pe nɛ̄ wèʔ.
13Wi bé nyinimɛ taa siɛntaagilɛ nɛ̄ bèle nɛ́ siɛnmaaminɛ ní bèle,
wi bé siɛnmaaminɛ sìi suɔ wè.
14Kùlofɔli wi bé pe fùgu zuɔ pe wuʔɔfɔlilɔ mɛ́ bèle nɛ́ nɛ̀mɛfɔlilɔ mɛ́ bèle;
siɛnmaaminɛ pe sìsiɛn kiī lagbɛnrɛ yɛgɛ wi yiʔɛ mɛ́ gè.
15Wi‑ kò sìi nɛ̄, dí peri wi kanʔa nɛ́ Saba kùlo tiɛ ní wè !
Peri náari wi wuʔu nɛ̄ gè lɛ̀lɛ ó lɛ̀lɛ nī,
béri diba tari wè wi nɛ̄ súuri !
16Yaliire ti‑ yɛ̀ ti sɛn nìʔɛrɛ siiye nī yè,
dí ti yaliikɛniyɛ yi sí de fíigi kùlo nī mìɛni nī
fúɔ bè sa nɔ̀ nyaguruyo mijuʔulo nɛ̄ gèle,
dí ti sí nyuɔ bɛ̀ Liban kùlo tiire tíɛlɛ dè.
Siɛnnɛ míɛni pe‑ nyuɔ kàʔa nī gè bɛ̀ sìnbirige nyàʔa tíɛlɛ gè.
17Kùlofɔli wi míʔɛ ki de yeri súuri,
dí wi kpuʔɔrɔ ti sí puu baa lɛ̀lɛ ó lɛ̀lɛ nī a cɛngɛ kiī nɛ yigi gè,
bà siɛnnɛ pe béri wi míʔɛ líi gè de diba kpínʔini wè pìye mɛ́ !
Ki 'yɛli kùlogolo ke mìɛni de ki nyu de gbɛ̀ngí
bé jo wiī fundaangbuɔrɔ nɛ̄ !
Gbùʔɔrigɔ wuʔu gáà ki 'juu gè, bè Sɛbɛ Siinwuu kúɔ wè
18 Kpuʔɔrɔ 'yɛli ti de tari Yewe nɛ̄ wè, Kulocɛliɛ nɛ̄ wè,
Isirayɛliyé Kulocɛliɛ wè !
Wire nigbe wī, wiī nɛ kakpoliyo kpínʔini yè !
19Weri wi míʔɛ kpóri gè súuri lɛ̀lɛ ó lɛ̀lɛ nī !
Ki 'yɛli dàala ni mìɛni ni‑ nyì wi kpuɔmɔ nɛ̄ bè !
Ki‑ taa ki puu bɛ̀ !
20Náʔa kire gī Dawuda náariyɛ yi 'kúɔ, ŋàa wī Yese jaa wè.
SƐBƐ TAANRIWUU
(73–89)
Currently Selected:
Ŋúnuyɔ 72: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
