Ŋúnuyɔ 71
71
Ma mi wéli mi sìi wi mìɛni nī
1 Yewe, muɔ mɛ́ mi 'líʔire jó,
fǎga ki yaʔa fìɛrɛ‑ mi taaʔ fíewu bè nyàa#71.1 Koliyo 1-3 tiʔɛ nī gè, wéli baa Ŋún 31.2-4. !
2Bɛ̀ muɔ nɛ kasingele kpínʔini gèle lɛ̀lɛ ó lɛ̀lɛ nī lè,
‑mi cò ma suɔ ma mi tɛ́ngɛ tiɛcɛ̀ngɛ nī ! ‑Líiye cáan m'mɛ́ ! Ma mi suɔ !
3Ma puu mi kàdɛnigbaala,
tiʔɛ gíì nī m'bé làri wè,
tiʔɛ gíì nī mi bé gbàri jíin lɛ̀lɛ ó lɛ̀lɛ nī lè.
Muɔ 'ki yɛ̀gɛ bè mi suɔ wī;
ʔaan, muɔ yē mi kàdɛnigbaala nɛ́ mi làridiʔɛ lìrige gáà gī naamɛ gè.
4Mi Kulocɛliɛ yo, ‑mi píle ma suɔ siɛnpiile pe kiyɛ nī yè,
nɛ́ bàli pe wè nɛ síngi bèleʔ nɛ́ nɛ̀mɛfɔlilɔ pe kadaʔala nī gèle.
5Nɛ́ ki cɛ́n mi Kàfɔli Yewe, muɔ wī mi sɔ̀ngirɔ taʔadiʔɛ gè;
muɔ kiyɛ nī mi nìɛ yaʔa nɛ̀ líɛ mi nàgapunmɔ lɛ̀lɛ nī lè#71.5 Koliyo 5 nɛ́ 6 tiʔɛ nī gè, wéli baa 22.10-11..
6Mi 'sigi nɛ̀ yéri muɔ nɛ̄ nɛ̀ ki líɛ cɛngɛ gíì mi yàa wi 'mi sii wè;
muɔ ma 'mi yige mi yàa liyɛ nī yè.
Muɔ wī mi gbùʔɔrilɔ nyùgo gè lɛ̀lɛ ó lɛ̀lɛ nī.
7Mi 'kò siɛnniʔɛmɛ mɛ́ fìɛ nɛ́ ní kasɔminɔ,
nɛ̀ ki yaʔa muɔ yē mi làridiʔɛ lìrige.
8Mi nyuɔ ki 'nyì muɔ gbùʔɔrɔ ŋúnuyɔ nɛ̄ yè,
mi nɛ muɔ kpuɔmɔ wuʔu nyu gè cɛnguɔmɔ.
9Fǎga mi wáa mi liɛmɛ lɛ̀lɛ nī lèʔ !
A mi 'ŋɔri ti pɛ́nì kúɔ dè, fǎga cíi mi nɛ̄ʔ !
10Nɛ́ ki cɛ́n mi leguulo piyē nɛ mi wori nyu dè,
bàli pe mi palilɛ bèle, piyē nɛ pínɛ nɛ nyu.
11Pe 'jo: «Kulocɛliɛ ní wè nɛ́ wi níʔ !
Ye‑ taʔa wi nɛ̄ ye wi cò ! Siɛn ní wè baa cígini bè wi suɔʔ !»
12Kulocɛliɛ yo, fǎga kò liilige mi nɛ̄ díɛʔ#71.12 Wéli baa 22.2; 38.22. !
Mi Kulocɛliɛ, te báan fáari ma pa mi sáʔa#71.12 Wéli baa 40.14. !
13Bàli pe tíri mi nɛ̄ wè, ‑ki yaʔa fìɛrɛ tɔ́n pe nɛ̄
dí pe‑ sí cɛrigɛ péwu !
Siɛnnɛ bálì pe caa yawuʔɔ‑ mi taa wè, ‑ki yaʔa pe‑ máama,
dí pe sí faʔama taa#71.13 Wéli baa 35.4,26; 40.15. !
14Mi wè, m'bé muɔ sige lɛ̀lɛ ó lɛ̀lɛ nī,
m'bé kàa fàri muɔ gbùʔɔrigɔ nɛ̄ gè cɛ̀ngɛ ó cɛ̀ngɛ.
15M'béri muɔ kakpiʔiligele nyu gèle gálì ke 'sín gèle
nɛ́ míɛni muɔ suɔlɔ woli ní lè lɛ̀lɛ ó lɛ̀lɛ,
nɛ́ ki cɛ́n muɔ kacɛ̀ngɛlɛ kiyě gbɛ̀ tɔ́riʔ.
16Mi Kàfɔli Yewe, m'béri báan de muɔ ŋɔri kakpiʔiligele nyu gèle,
bèri muɔ nigbe sínnɛ wuʔu nyu gè siɛnnɛ mɛ́ bèle.
17Kulocɛliɛ yo, nɛ̀ ki líɛ mi nàgapunmɔ lɛ̀lɛ nī lè, muɔ 'mi tɛnmɛ;
fúɔ nɛ̀ pɛ́nì nɔ̀ pàngɛ nɛ̄, mi nɛ muɔ kakpoliyo jáari yè.
18Kulocɛliɛ yo, fǎga cíi mi nɛ̄ a mi 'liɛ, a mi nzìire ti 'fílige dèʔ,
kire ga buu mi gbɛ̀ jáa bè muɔ ŋɔri kɛnmɛ tìɛ bè kɛ̀nnɛ náà nɛ̄ lè,
nɛ́ muɔ fànʔa ní gè kɛ̀nnɛ náà nɛ̄ lè nàa ni báan lè#71.18 Wéli baa 22.31-32..
19Kulocɛliɛ yo, muɔ sínmɛ piī nɛ yɛ̀gí nɛ̀ sɛ́ni nɔ̀gí nyìʔɛnɛ nɛ̄ lè.
Muɔ nyɛ́nì kakpoliyo kpíʔile ! Kulocɛliɛ, ŋáa wī bɛ̀ muɔ tíɛlɛ#71.19 Wéli baa 36.6. ?
20Muɔ nyɛ́nì ki yaʔa a funbiɛnrɛ nɛ́ yawuɔrɔ 'weli taa kpuʔɔ,
kire nɛ̄ ki míɛni muɔ bé ní sìi kɛn weli mɛ́,
muɔ bé ní mi kɔ́ri bè yige dàala táanmɛ gè,
21bé mi kpuɔmɔ niʔɛ bè, bè sí ní mi yéturo pàari dè.
22A kire 'kpíʔile gè, m'béri ŋúnuyɔ ŋú nɛ́ màʔagɛlɛ bɔ̀licɛrigɛ ní gè
muɔ kányiʔɛ kaala lire kɛnmɛ nɛ̄, mi Kulocɛliɛ.
M'béri gɔri kpúɔn wè bèri muɔ gbùʔɔrɔ ŋúnuyɔ ŋú yè,
muɔ ŋáà wī Isirayɛliyé Tiɛlɛfun Kulocɛliɛ wè.
23Mi nyuɔ ki béri fundaanra yékpuʔulo wáari gèle,
ʔaan, m'béri ŋúnuyɔ ŋú yè bè muɔ kpúʔɔ,
nɛ́ ki cɛ́n muɔ nyɛ́nì mi fùgu nɛ̀ suɔ.
24Bà ki bé kpíʔile dí mi nyinɛ ni sí de
muɔ sínnɛ jáari lè cɛngɛ ó cɛngɛ.
Nɛ́ ki cɛ́n bàli pe caa bè mi wuʔɔ wè
pe nyɛ́nì máama nɛ̀ faʔara taa.
Currently Selected:
Ŋúnuyɔ 71: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
