Ŋúnuyɔ 73
73
Gáa nɛ̄ siɛnpiile piyē nɛ nyuʔɔ ?
1Asafi ŋúnudanʔa gī gàa pe ŋú nɛ́ yakpuɔnrɔ ní dè#73.1 Wéli baa 50.1 kaliwɛgɛ ki táanmɛ gè..
Kányiʔɛ nɛ̄, Kulocɛliɛ wi nyɛ́nì nyuɔ Isirayɛli siɛnnɛ mɛ́ bèle,
bàli bīɛlɛ funyɔ ní yè fìiye yè.
2Nɛ̀ ki yaʔa, gàa ki 'mi kúɔ wè, ki yé kò cɛ̀ri yákuɔ wī
dí mi tɔliyɔ yi sí wàli koligo nī gè,
mi yedaʔala ke ye cɛ́nì pɔ̀li nɛ̀ kúɔ wī.
3Nɛ́ ki cɛ́n yejaʔa 'puu mi nī siɛnpiile kɔli mɛ́ gè,
bàli piyē nɛ pìye nyíɛnɛ bèle,
bà mi 'ki nyaa siɛnpiile pe kele kiyē nɛ nyuʔɔ gèle.
4Fùrɔgɔ wè pe nɛ̄ʔ fúɔ nɛ̀ nɔ̀ pe kùucɛnyɛ nɛ̄ yèʔ,
piyē gbɛ̀nminɛ nɛ́ ní kpolilo céri nɛ̄ dè.
5Wuʔɔgɔ gáà ki tungu siɛnnɛ nɛ̄ bèle, kire kàa wè nɔ̀gí pe nɛ̄ʔ,
kapiʔi wè pe taʔa bɛ̀ siɛnsɛnminɛ tíɛlɛ bèleʔ.
6Bɛ̀ sí ki yē fungboliyo yire yī pe sɛmidingele gèle,
fungbɛnyɛ yire yī pe burugboliyo yè.
7Pe yiɛyɛ yiī kpoliyo sùnmɔ nɛ̄ bè,
a pe nyapigele ke 'nyì nɛ̀ tóri nyabiɛnnɛ nɛ̄ lè#73.7 Eburu siɛnrɛ nī dè náʔa gè, siɛnrɛ dáà tiì fíligeʔ; kire nɛ siɛnrɛ ti yiʔɛgɛnmɛ míɛni piì fílige nɛ̀ juuʔ..
8Piyē nɛ siɛnnɛ tíʔɛ bèle,
níɛ siɛncuʔɔrɔ nyu dè dàa ti 'yáa dè;
piyē nɛ fíkɛnyɛ wúʔuro yè, níɛ nyu nɛ siɛnnɛ máami bèle.
9Pe nyasiɛnrɛ tiī nɛ yɛ̀gí nɛ nɔ̀gí nyìʔɛnɛ nī lè,
pe nyigele siɛnrɛ tiī nɛ nyaari nɛ mári dàala nɛ̄ lè.
10Kire nɛ̄ siɛnnɛ pe nɛ̂ taʔa pe nɛ̄,
níɛ̀ pe siɛnrɛ gbuɔ dè nɛ̀ tín bɛ̀ luʔɔ tíɛlɛ.
11Pe nɛ̂ ki juu nɛ̀ jo: «Mɛni sí Kulocɛliɛ wi bága ki cɛ́n ?
Kulocɛliɛ ŋáà wī Duniya wi Mìɛni Nyùgo nɛ̄ gè,
wi 'kele cɛ́n lé nɛ̀ nɔ̀ kɛnmɛ báà nɛ̄ bè ?»
12Ye‑ ki wéli kɛnmɛ báà pire nɛ̄ siɛnpiile pe yē:
piyē ŋɔ́daala nɛ̄, níɛ lɔri caa dè nɛ gbunʔuni súuri.
13Kire nɛ̄, a mi 'mi fungo cìile gè,
nɛ́ mi kiyɛ jíge yè ki‑ puu fìɛ bè ki tìɛ miì yakaa cɛ́nʔ.
Waʔanɛ lé mi yé ki kpíʔile ?
14Nɛ́ ki cɛ́n fùrɔgɔ yē mi nɛ̄ súuri,
sínbinimɛ ó sínbinimɛ nī, wuʔɔgɔ yē mi nɛ̄.
15A mi yé juu bɛ̀ peli tíɛlɛ wè,
mi cî muɔ siɛnnɛ fáanni bèle, Kulocɛliɛ.
16Bà mi kɛ́nì sɔ̀ngi wè bè ki kɔri cɛ́n wè,
a mi 'ki nyaa ki yé puu gbɛ̀ligɛ mi mɛ́,
17fúɔ a ki kɛ́nì nyaa mi sa jíin
Kulocɛliɛ saawalidɛngɛgɛ nī gè;
kire tiʔɛ nī mi nɛ péli nɛ siɛnpiile kúɔgɛnmɛ nyaa bè.
18Kányiʔɛ nɛ̄, muɔ bé pe tɛ́ngɛ koligo káà nɛ̄ gàa ki pɔ̀lí gè
kire ga buu pe‑ láʔa duu bè cúʔɔ.
19Cí ! Kiì cɛ́nì mɔgɔʔ a pe 'pùunni,
bà kùu fíɛrɛ ti 'pe cɛrigɛ nɛ́ pe cúʔɔ nɛ̀ kúɔ wè.
20 Kàfɔli, a muɔ kɛ́nì yɛ̀ wè, muɔ bé pe cɛrigɛ
majo bɛ̀ siɛn cî kaala nyaa ŋɔ́nigɔ nī gè.
21Bà mi fungo ki yé nyì funbiɛnrɛ nɛ̄ dè,
fúɔ ki 'puu nɛ mi yáa nɛ tíri mi laamɛ nī bè,
22mi yé puu ledogo, miì cé yafiɛn cɛ́nʔ,
majo bɛ̀ yawiʔi yē muɔ yiʔɛ mɛ́ gè.
23Nɛ̀ ki yaʔa mi yē nɛ́ muɔ ní súuri;
muɔ nyɛ́nì mi cò kàliige nɛ̄ gè.
24Muɔ nɛ̂ mi nàʔa nɛ́ muɔ yɛrimɛ ní bè,
nɛ́ míɛni muɔ bága mi nyɔ́gɔ muɔ kpuʔɔrɔ nī dè.
25Ŋáa wī baa mi mɛ́ nyìʔɛnɛ nī lè, nɛ̀ yiri muɔ nigbe nī ?
Yakaa láa ní wè mi nɛ̄ dàala nɛ̄ lèʔ nɛ̀ yiri muɔ nigbe nīʔ.
26Mi céri ti ŋɔri ti 'kúɔ, nɛ́ mi nàzɔn ní wè,
nɛ̀ ki yaʔa Kulocɛliɛ wè, mi kàdɛnigbaala lè,
wiī nɛ ŋɔri kanʔa mi fungo mɛ́ gè.
Wire wī mi kɔrigɔ gè súuri.
27Nɛ́ ki cɛ́n, bàli pe 'líili muɔ nɛ̄ bèle, pe nɛ̂ kùu nɛ̀ pùunni;
muɔ nɛ̂ pe sìi kúɔ wè, bàli pe mìɛni pe 'láʔa muɔ nɛ̄ wè.
28Gàa ki 'mi dɛ́ni gè,
mi‑ sìʔɛrɛ bè kpɔni Kulocɛliɛ nɛ̄ wè.
Mi nyɛ́nì muɔ nyíɛnɛ nɛ̀ kɔ̀n, Kàfɔli Yewe,
muɔ‑ puu mi làridiʔɛ,
kire ga buu mi de muɔ kakpiʔiligele ke mìɛni nyu.
Currently Selected:
Ŋúnuyɔ 73: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
