Ŋúnuyɔ 66
66
Kpuʔɔrɔ ti 'yɛli weli suɔfɔli Kulocɛliɛ nɛ̄ wè
1Ŋúnuŋuminɔ yiɛginiwɛ ŋúnugo gī. Ŋúnudanʔa gè gàa pe ŋú nɛ́ yakpuɔnrɔ ní dè.
Yeri fundaanra yékpuʔulo wáari Kulocɛliɛ mɛ́ wè,
yeli bàli bīɛlɛ duniya siɛnnɛ yeli ye mìɛni bèle.
2Yeri yakpuɔnrɔ kpúɔn dè yeri ŋú yeri wi míʔɛ gbùʔɔrɔ́ gè !
Yeri wi tòbiló wi kpuɔmɔ kɛnmɛ nɛ̄ bè !
3Ye‑ ki juu Kulocɛliɛ mɛ́ wè, ye‑ jo:
«ʔé, gàa muɔ nɛ kpínʔini gè, kiī bògaara wuʔu díɛʔ !
Bɛ̀ muɔ ŋɔri ti 'niʔɛ nɛ̀ tóri dè,
muɔ leguulo pe nɛ̂ pɛn nɛ̀ pɛ́nì pìye cɛ́rigɛ muɔ yiʔɛ mɛ́ gè.
4Duniya siɛnnɛ pe mìɛni nɛ̂ pɛ́nì tuu nɛ̀ cúbulo muɔ yiʔɛ mɛ́ gè,
pe níɛ̀ yakpuɔnrɔ kpúɔn dè muɔ yiʔɛ mɛ́ gè,
níɛ̀ nɛ muɔ míʔɛ ŋú gè.» Ye‑ ŋɔ́ cɛ̀.
5Yeri báan ye pa Kulocɛliɛ kakpiʔiligele wéli gèle !
Gàa wiī nɛ kpínʔini lewiile mɛ́ bèle, bògaara wuʔu gè !
6Wi nyɛ́nì kuʔɔjii luʔɔ yiʔɛ gè a ki 'kò dàawaʔala,
a weli 'ki jeli tɔliyɔ nɛ̄#66.6 Náʔa gè, kiī nɛ nyu Nyàʔanivɛgɛ Tiire kuʔɔjii wuʔu nɛ̄ gè, nɛ́ Zurudɛn cáʔa wori ní dè. Wéli baa Yir 14.16-22; Yes 3.15-16; Ŋún 74.15; 78.13; 106.9; 114.3-5; Eza 44.27; 50.2..
Kire tiʔɛ nī weli 'pínɛ nɛ̀ fundaanra kpíʔile wi kɛnmɛ nɛ̄.
7Wi ŋɔri tire kɛnmɛ nɛ̄ wiī tɛ́niwɛ fànʔa nɛ̄ gè,
wi nyapigele ní gèle nɛ kùlogolo wéli gèle.
Kire nɛ̄, siɛnciile pe fǎri pìye nyíɛnɛʔ ! Ye‑ ŋɔ́ cɛ̀.
8Kùlogolo siɛnnɛ yo, ye‑ kpuʔɔrɔ taʔa dè Kulocɛliɛ nɛ̄ wè !
Ye‑ ki yaʔa wi gbùʔɔrilɔ tùnmɔ pi de lúru !
9Wire wiī nɛ weli sìi suu wè
kire ga buu weli‑ kò siɛnwiile sunʔɔmɔ nī bè,
wiì ki yaʔa weli tɔliyɔ yi‑ pɔ̀liʔ.
10Nɛ́ ki cɛ́n, Kulocɛliɛ, muɔ ma 'wéli siʔɛ nɛ̀ wéli;
muɔ 'fuɔnrɔ yige dè weli nī
majo bɛ̀ pe cî walifiiwe nyɛgɛ wè nɛ̀ fuɔnrɔ yige dè wi nī wè#66.10 Wéli baa Zɔbi 23.10..
11Muɔ 'weli nyɔ́gɔ jùɔ nī wè,
a muɔ 'wuʔɔyɔ tugoro tugo dè weli nɛ̄.
12Muɔ yé ki yaʔa a weli leguulo pe 'suɔnyɔ fɛ̀ yè
nɛ̀ tóri weli nyùyɔ nɛ̄ yè,
kiī majo weli yé sùuri nɛ̀ tóri kàsun nī nɛ́ luʔɔ jeli gè#66.12 Wéli baa Eza 43.2.,
nɛ̀ ki yaʔa muɔ 'weli yige nɛ́ weli kɔ́ri nɛ̀ kɛ́ tiɛcɛ̀ngbuʔɔ mɛ́ gè.
13M'béri waa muɔ saʔa mɛ́ gè nɛ́ yajuuro ní
bè ti kpúu kakuɔrɔ kaasuʔuro;
m'bé mi nyakungɛnyɛ forigo yè mi Kulocɛliɛ mɛ́ wè,
14nyàa mi nyasɛnyɛ yi yé juu yè
nɛ́ nyàa mi nyuɔ 'ki kún nɛ̀ kɛn yè, lɛ̀lɛ líì nī mi yé cɔ̀ri wè.
15M'bé sùnmɔ yajuuro kɔ̀n muɔ mɛ́ ti‑ puu kakuɔrɔ kaasuʔuro,
nɛ́ sìnbapɔlilɔ kaasuʔuro ní dè, dàa wírige ki yɛ̀gí muɔ kɔli mɛ́ gè.
M'bé nìɛyɛ nɛ́ síkapɛngɛlɛ kɔ̀n muɔ mɛ́. Ye‑ ŋɔ́ cɛ̀.
16Yeri báan ye pa lúʔu, ye mìɛni bàli ye fìʔɛ́ Kulocɛliɛ nɛ̄ wè.
M'bé ti juu dìɛ yeli nɛ̄ gàa wi 'kpíʔile m'mɛ́ gè.
17Mi 'kòkuulo wáa wi mɛ́ nɛ̀ wi náari,
mi yé gbòbori nɛ̀ yaʔa bèri wi gbùʔɔrɔ́#66.17 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: gbùʔɔrigɔ 'puu mi nyinɛ nɛ̄ lè. Eburu siɛnrɛ ti 'ki juu nɛ́ jo: gbùʔɔrigɔ 'puu mi nyinɛ táanmɛ lè..
18A mi yé kapiile yaʔa lè mi nàzɔn nī wè,
mi Kàfɔli wiǐ cî lúʔu mi mɛ́ʔ.
19Ki sí n'gɛ, Kulocɛliɛ wi 'lúʔu m'mɛ́
nɛ́ líiye cáan mi náarigɛ mɛ́ gè.
20 Kpuʔɔrɔ ti 'yɛli Kulocɛliɛ nɛ̄, wire ŋáà wiì cíiʔ mi náarigɛ nɛ̄ gèʔ,
nɛ́ míɛni wiì cíi mi mɛ́ʔ wi bànguɔ dɛ́nigɛ nɛ̄ gèʔ.
Currently Selected:
Ŋúnuyɔ 66: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
