Ŋúnuyɔ 65
65
Kulocɛliɛ nɛ̂ dàala wéli lè níɛ̀ ni gbòbori
1Ŋúnuŋuminɔ yiɛginiwɛ ŋúnugo gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2Kulocɛliɛ yo, muɔ ŋáà wī Siyɔn kàʔa nī gè, gáa weli bé ní de nyu#65.2 Eburu siɛnrɛ ti 'ki juu nɛ́ jo: pìirige yē gbùʔɔrigɔ. ?
Muɔ ma yɛli nɛ́ weli gbùʔɔrilɔ ní lè;
weli bè weli nyakungɛnyɛ fori yè muɔ mɛ́.
3Kùlogolo siɛnfeliye yi mìɛni béri báan muɔ mɛ́,
muɔ ŋáà ma weli náarigɛ lúru gè.
4Weli kolimɔ kele ke 'lúbugo mi nɛ̄,
nɛ̀ ki yaʔa muɔ nɛ weli tuudiʔɛlɛ ke mìɛni kàsulugo suu gè.
5Wire wuʔu kiī tànʔa, siɛn ŋáà muɔ 'nyíɛnɛ nɛ̀ kɔ̀n wè
nɛ̀ wi sìʔɛrɛ nɛ̀ kpɔni mìɛ nɛ̄ wè
kire ga buu wi‑ kò muɔ Kòridiʔɛ dàliyɛ nɛ̄ yè !
‑Ki yaʔa weli tín muɔ saʔa yacɛ̀nrɛ nɛ̄ dè,
dàa dī muɔ Gbùʔɔrɔsaʔa wàlidɛngɛgɛ nī gè.
6Weli suɔfɔli Kulocɛliɛ yo,
muɔ nɛ̄ duniya siɛnnɛ pe mìɛni pe 'sɔ̀ngirɔ taʔa dè
nɛ̀ ki líɛ fúɔ bàli bīɛlɛ tɛ́ninɛ duniya láʔagɛlɛ nɛ̄ gèle
nɛ́ kuʔɔjii luɔyɔ táanni yè nyàa yi 'líili yè.
Bɛ̀ muɔ nɛ bògaara kakpoliyo kpínʔini muɔ sínmɛ kɛnmɛ nɛ̄ bè,
weli nɛ ki cɛ́n muɔ nɛ̂ lúʔu weli mɛ́.
7Muɔ ŋɔri ní dè, a muɔ 'nyaguruyo faan yè nɛ̀ yérige,
nɛ́ ki cɛ́n muɔ fànʔa ki 'kpúʔɔ.
8Muɔ wī ma kuʔɔjii tùnmɔ yérigi bè, nɛ́ lakuruyo tùnmɔ ní bè,
nɛ́ kùlogolo siɛnfeliye kàgbaaligɛ ní gè.
9Bàli pe 'tɛ́ni tiɛliiliye nī yè wómiwomi yè,
muɔ kakpoliyo fìɛlɛ piyē pe mɛ́ funwuɔrɔ nɛ́ ní fíɛrɛ.
Bàli bīɛlɛ cɛngɛnyɛnifoligɔli mɛ́ gè,
nɛ́ bàli bīɛlɛ cɛngɛnyɛnijiingɔli mɛ́ gè,
muɔ 'ki kpíʔile peri fundaanra yékpuʔulo wáari gèle.
10Muɔ nɛ̂ dàala wéli lè níɛ̀ ni gbòbori,
muɔ nɛ̂ ni fuɔn fúɔ luʔɔ ki nɛ̂ pɛ́nì ni cíɛn,
muɔ nɛ̂ ni kpíʔile ni‑ nɛ̂ kò tàanna.
Kulocɛliɛ, muɔ lakoligo ki 'nyì luʔɔ nɛ̄ gè; muɔ nɛ̂ dàala gbòbori lè bè yaliire kɛn siɛnnɛ mɛ́ bèle.
11Muɔ nɛ̂ luʔɔ nyɔ́gɔ sánbigele nī gèle fúɔ ke nɛ̂ nyì nɛ̀ tín;
luʔɔ ki nɛ̂ nyì sangoliyo nī yè nɛ gànbori fúu dè nɛ kùnu.
Muɔ nɛ̂ dàala pe lè kàsaluʔɔ ní gè, muɔ nɛ̂ yaliire nyuʔɔ dè dàala nɛ̄ lè.
12Muɔ kacɛ̀ngɛ nɛ̄ gè, yiɛlɛ ni kúɔmɔ pi nɛ̂ tɛ́ni,
tiʔɛ gíì nī muɔ 'tóri gè,
kàsadibarɛ ti nɛ̂ luʔɔ tìrige gè nɛ̀ yaliiniʔɛrɛ kɛn dè,
13fúɔ yajuuro nyàʔakaadiɛyɛ nyáà yī waama kùlo nī lè,
kámɛgɛ nɛ̂ yi fuɔn;
fundaanra nɛ̂ puu nyaguruyɛliyɛ nī yè tiɛrɛ ti mìɛni nī.
14Kpàanjalilɛ pe mìɛni nɛ̂ nyì yajuuro nɛ̄ dè, siiye míɛni yi nɛ̂ nyì yaliire nɛ̄ dè;
ti mìɛni níɛ̀ fundaanra yékpuʔulo wáari gèle níɛ̀ nɛ ŋú.
Currently Selected:
Ŋúnuyɔ 65: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
