Ŋúnuyɔ 64
64
Cɛ̀ngɛ káà Kulocɛliɛ bé wi fuʔɔ tɔ́n gè siɛnpiile mɛ́ bèle
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2Kulocɛliɛ yo, mi nɛ mi dìgire nyu dè muɔ mɛ́; ma lúʔu mi mɛ́ !
‑Mi sìi suɔ wè mi leguu mɛ́ wè ŋàa nɛ̄ mi nɛ fìʔɛ́ wè !
3‑Mi làrigɛ liilige kapiigbiʔilile pe nyalere nɛ̄ dè,
liilige kolimɔfɔlilɔ gboli nɛ̄ lè !
4Pe nyigele kiyē bɛ̀ kapiɛngbuɔn ŋuʔɔnɔ tíɛlɛ gàli pe 'juɔ gèle,
pe nìɛ pe siɛnpiisisorido wáari dè bɛ̀ ŋaaya tíɛlɛ,
5bèri ti wáari làrimɛ nī kanaasingbiʔiliwe nɛ̄ wè.
Pe nɛ̂ ti fuu nɛ̀ wáa wi nɛ̄, pe nɛ̌ cɛ fíɛʔ !
6Piyē nɛ lèbaanna nyɔ́gi pìye nī bè pe nàri kele kpíʔile gèle,
níɛ nyu gáriyɛ wuʔu nɛ̄ gè nyàa pe bé pari yè làrimɛ nī bè;
pe nɛ̂ ki juu níɛ̀ jo: «Ŋáa wi bága ki nyaa ?»
7Piyē nɛ caala kpínʔini nɛ sɔ̀ngí
kɛnmɛ bíì nɛ̄ pe bé pe kanaasinzinmɛ kpíʔile bè,
pe nɛ̂ ki juu níɛ̀ jo:
«Weli kanaasinzingele ke nyɛ́nì sɔ́migɔ nɛ̀ nyuɔ !»
Cí ! Siɛn fungo laamɛ bè, nɛ́ wi nàzɔn ní wè,
kiī bɛ̀ kàwiisicuugo tíɛlɛ.
8Nɛ̀ ki yaʔa Kulocɛliɛ yē nɛ wi ŋaaya ŋɔgi yè pe nɛ̄;
a cɛ̀ri sìʔɛrɛ, pe m'bɛlɛ wi nɛ̂ pe kpúɔn nɛ̀ cáan.
9Peli tíimɛ nyigele keli ke nyɛ́nì pe cáan;
bàli pe mìɛni pe pe nyaʔa bèle, pe nɛ̂ nyùyɔ koli yè !
10Lewiile pe mìɛni nɛ̂ fíɛ, níɛ nɛ ki nyu gàa Kulocɛliɛ 'kpíʔile gè.
Pe nɛ̂ sí tɛnmɛnɛ taa kire kaala nɛ̄ lè.
11Ki 'yɛli siɛnsinwɛ wi de fundaanra kpínʔini Yewe nī,
dí wi sí Yewe kpíʔile wè wi làridiʔɛ !
Bàli pe mìɛni funyɔ yi 'sín yè, pe béri Yewe gbùʔɔrɔ́ wè wi kakpiʔiligele kɛnmɛ nɛ̄ bè.
Currently Selected:
Ŋúnuyɔ 64: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
