Ŋúnuyɔ 59
59
Kulocɛliɛ yē mi làridiʔɛ cɛ̀ngɛ
1Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Fǎga ki cúʔɔ gèʔ». Dawuda ŋúnuzɛbɛgɛ#59.1 Ki kɔri wiì fílige nɛ̀ cɛ́nʔ. Wéli baa 16.1 kaliwɛgɛ ki táanmɛ gè. gī, gàa ki 'sɛbɛ lɛ̀lɛ líì nī Sawuli 'siɛnnɛ tun pe sa Dawuda saʔa màʔa gè bè wi kpúu wè#59.1 Wéli baa Sam1 19.8-17..
2Mi Kulocɛliɛ yo, ma mi píle ma suɔ mi leguulo pe kiyɛ ní yè !
‑Mi wéli, ma mi yɛ̀gɛ naamɛ bè tóri
siɛnnɛ bálì nɛ̄ pe 'yɛ̀ mi kúrugu bèle !
3Ma mi píle ma yige pe kiyɛ nī yè bàli pe kapiʔile kpínʔini mi nɛ̄ wè !
Ma mi suɔ kire sìsiɛnwobilo siɛnnɛ mɛ́ bèle !
4Nɛ́ ki cɛ́n pe m'bɛlɛ piyē nɛ mi palilɛ,
fungbɛnyɛfɔlilɔ piyē nɛ túngu nɛ́ mi ní,
nɛ̀ ki yaʔa mi sì tuudiɛlɛ kpíʔileʔ, mi sì kapiile kpíʔile, Yeweʔ.
5Miì koli pe wàa mɛ́ʔ, nɛ̀ ki yaʔa piyē nɛ fé, piyē nɛ pìye gbòborí.
Kulocɛliɛ yo, ma yɛ̀, ma pa mi kpàli, ma ki wéli !
6Muɔ Yewe wè, Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli wè,
Isirayɛliyé Kulocɛliɛ wè, ma yɛ̀,
ma muɔ fuʔɔ tɔ́n gè kùlogolo ke mìɛni mɛ́ gèle !
Fǎga nyinimɛ taa kpìlikpilifɔlilɔ bálì pe wàa fáala nɛ̄ʔ,
kapiigbiʔilile bálì nɛ̄ bèle. Ye‑ ŋɔ́ cɛ̀.
7Pe nɛ̂ koli nɛ̀ pɛn cɛnguʔɔ táanni gè,
nɛ̀ pɛ́nì kò nɛ kòkuʔulo wáari gèle bɛ̀ pɔ̀nminɔ tíɛlɛ,
níɛ̀ kò nɛ kàʔa mári gè#59.7 Wéli baa 59.15..
8‑Pe wéli: kpɔ́rigɔ kiī pe nyuɔyɔ nī yè;
pe nyasiɛnrɛ tiī nɛ kɔnigi bɛ̀ kapiɛngbuɔn ŋuʔɔnɔ tíɛlɛ.
Pe nɛ̂ ki juu níɛ̀ jo: «Ŋáa wi bága ti lúʔu ?»
9Nɛ̀ ki yaʔa, muɔ Yewe wè, muɔ nɛ pe tíʔɛ wī,
muɔ nɛ mìɛ nyíɛnɛ kùlogolo kálì siɛnnɛ bálì pe mìɛni nɛ̄ bèle.
10Muɔ yē mi ŋɔri taadiʔɛ, m'béri wéli muɔ mɛ́.
Nɛ́ ki cɛ́n, muɔ Kulocɛliɛ wè, muɔ yē mi líʔirejodiʔɛ.
11Wi bànguɔ dɛ́nigɛ kire kɛnmɛ nɛ̄ bè,
Kulocɛliɛ wi bé pɛn bè pa mi kpàli.
Kulocɛliɛ wi bé ki yaʔa mi‑ mi leguulo tuugɛnmɛ nyaa bè.
12Fǎga pe kpúu fáariʔ, kire ga buu mi siɛnnɛ pe ga fìʔɛ nɛ́ pe níʔ#59.12 Pe wuʔɔgɔ ki 'yɛli bè puu kasɔminɔ siɛnnɛ mɛ́ bèle. !
Gàa gī baa gè, ‑pe yaʔa peri fáala de mári muɔ ŋɔri barigɛ nī wè,
‑pe yaʔa pe‑ tuu, mi Kàfɔli, muɔ ŋáà wī weli timɔzigege gè.
13‑Pe yaʔa pe‑ cò pe fungboliyo gáriyɛ nɛ̄ yè,
pe kapiʔile siɛnrɛ tire kɛnmɛ nɛ̄,
nɛ́ pe dɛ́ngɛ siɛnrɛ nɛ́ pe káfinɛrɛ tire kɛnmɛ nɛ̄,
dàa pe nyu nɛ taʔala dè siɛnnɛ nɛ̄ bèle.
14‑Pe cúʔɔ yo ! Muɔ fundanʔanigɛ ní gè, ‑pe cúʔɔ yo !
Pe fǎga ní de pe nyaʔaʔ !
Dí siɛnnɛ pe‑ ki cɛ́n fúɔ bè sa nɔ̀ dàala láʔagɛlɛ nɛ̄ gèle,
muɔ yē Kulocɛliɛ ŋáà wī Yakuba siimɛ kùlofɔli wè. Ye‑ ŋɔ́ cɛ̀.
15Pe nɛ̂ koli nɛ̀ pɛn cɛnguʔɔ táanni gè,
nɛ̀ pɛ́nì kò nɛ kòkuʔulo wáari gèle bɛ̀ pɔ̀nminɔ tíɛlɛ,
níɛ̀ kò nɛ kàʔa mári gè#59.15 Wéli baa 59.7..
16Pe nìɛ fáala nɛ mári nɛ pe yaliire caa dè;
a piyè lìi nɛ̀ tín bèleʔ, pe nɛ̂ kò nɛ kúnʔɔri.
17Gàa ki 'mi kúɔ wè, m'béri muɔ ŋɔri wuʔu ŋú gè,
béri muɔ bànguɔ dɛ́nigɛ tòbiló gè sínbinimɛ táanni bè.
Nɛ́ ki cɛ́n muɔ yē mi suɔdiʔɛ,
nɛ́ líʔirejodiʔɛ mi funbiɛnrɛ cɛnyɛ nī yè.
18Muɔ yē mi ŋɔri taadiʔɛ; m'béri ŋú nɛ́ yakpuɔnrɔ ní dè muɔ mɛ́ !
Nɛ́ ki cɛ́n Kulocɛliɛ wī mi líʔirejodiʔɛ gè,
bànguɔ dɛ́nigɛ Kulocɛliɛ wī.
Currently Selected:
Ŋúnuyɔ 59: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
