Ŋúnuyɔ 58
58
Kulocɛliɛ wi 'fànʔafɔlilɔ kàyuʔu juu gè
1Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Fǎga ki cúʔɔ gèʔ#58.1 Eburu siɛnrɛ nī dè náʔa gè, siɛnrɛ dáà tiì fíligeʔ.». Dawuda ŋúnuzɛbɛgɛ#58.1 Ki kɔri wiì fílige nɛ̀ cɛ́nʔ. Wéli baa 16.1 kaliwɛgɛ ki táanmɛ gè. gī.
2Yeli fànʔafɔlilɔ bèle#58.2 Eburu siɛnrɛ nī dè náʔa gè, siɛnrɛ dáà tiì fíligeʔ. Siɛnnɛ pálì nɛ̂ tiʔɛ gáà siɛnrɛ yiʔɛ nɛ̀ yɛli nɛ́ kɛnmɛ bíì ní pe 'ti cuɔnri dè nɛ́ jo: kulocɛlɛlɛ kire ga laa: yeli bé pìiri wī lé (bè kàyuʔu juu gè) ?, yeli nɛ siɛnnɛ kele nyu gèle lé nɛ́ kányiʔɛ ní lé ?
Yeli nɛ lewiile kàyuʔu nyu gè lé nɛ́ sínmɛ ní ?
3ʔúnʔun ! Kapiʔi kire yeli nɛ gbòborí yeli funyɔ nī yè.
Yeli kiyɛ yire yi fungbɛngɛ kele niʔɛgi gèle dàala nɛ̄ lé.
4A pe 'taa nɛ̀ yiri pe yàa liyɛ nī yè, siɛnpiile pe nɛ̂ puu cíimɛfɔlilɔ;
káfinɛrɛfɔlilɔ pe nɛ̂ kojɛ̀ngɛ wáa gè, nɛ̀ ki líɛ pe sii lɛ̀lɛ nī lè.
5Suɔnrɔ yē pe nī, bɛ̀ wɔ̀bugɔ wori tíɛlɛ dè,
dàa dī wɔ̀mɔri wori dè, gàa ki nɛ̂ ki ngbúʔulo tɔ́n gèle,
6wɔ̀bugɔ gáà ki wè nɛ ki birefɔli ŋúnuyɔ lúru yèʔ,
ki birefɔli ŋáà wi sícilimɛ ŋúnuyɔ sɔ́migi yè nɛ ŋú yè.
7Kulocɛliɛ yo, ‑pe gànʔana kabari gèle pe nyuɔyɔ nī yè !
Yewe yo, ‑jàriyɛlilɛ bálì pe gbandeliye muʔɔrɔ yè !
8‑Ki yaʔa siɛnnɛ bálì pe‑ cɛrigɛ majo bɛ̀ luʔɔ cî nɛ̂ fúu gè !
‑Ki yaʔa a pe 'sandaliyɛ píle yè, pe ŋaaya yi fǎga kɛ́ʔ#58.8 Eburu siɛnrɛ nī dè náʔa gè, siɛnrɛ dáà tiì fíligeʔ. !
9Pe‑ waʔa bɛ̀ nyafungbokorigo tíɛlɛ,
gàa ki fulolo nɛ waa gè !
Pe‑ puu bɛ̀ pìfinʔɛ tíɛlɛ
gàa ki 'cúʔɔ ki yàa liyɛ nī yè; kiì kpìɛnmɛ nyaa bèʔ !
10Sɛ́ni kàjɔli ni 'ki cɛ́n wíire kàsun wírifuugo yē baa gè,
a ki 'nyaa wíige sìpirige gī yo,
kire ga laa wíige gáà gī waʔaga gè yo#58.10 Eburu siɛnrɛ nī dè náʔa gè, siɛnrɛ dáà tiì fíligeʔ. Siɛnnɛ pálì nɛ̂ tiʔɛ gáà siɛnrɛ yiʔɛ kɛnmɛ sáa nɛ̄. Sɔ̀ngirɔ dáà ti 'kpúʔɔ ti nī dè kire gī: kàyuʔu ki bé tuu pe nɛ̄ fáari.,
káfalijuulo bé siɛnpiile bálì líɛ bèle bè kɛ́ nɛ́ pe ní.
11Siɛnsinminɛ pe béri fundaanra kpínʔini,
nɛ́ ki cɛ́n pe nyɛ́nì ki nyaa
bà Kulocɛliɛ 'fuʔɔ tɔ́n gè, pe béri pe tɔliyɔ jíri yè
siɛnpiile sìsiɛn nī gè.
12Bà siɛnnɛ pe bé ki juu bé jo:
«ʔaan, tɔ̀ni yē baa siɛnsinwɛ mɛ́ wè !
ʔaan, Kulocɛliɛ yē baa ŋàa wiī nɛ kàyuʔu nyu gè dàala nɛ̄ lè !»
Currently Selected:
Ŋúnuyɔ 58: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
